فتة القرع الاصفر

صار لي فترة مش فاضية افتح الكومبيوتر او اقعد زي الناس واكتبلي اشي...الصيف الصيف بكل انشغالاته وعجقته الحلوة سواءا على الصعيد الشخصي او العملي...امبارح كان عندي درس في الحلويات وعملنا 4 انواع حلو منها نوع بصوصين...كان درس ممتع ومتفاعل من كل الستات والصبايا اللي شاركوا فيه...بوجهلهم شكر خاص...ولكل اللي حابيين ياخدوا الدرس مرة تانية ان شاء الله بحكي معكم وبرتبلكم شي قريب...

اليوم صحيت على الساعة 5:30...مش بسبب النشاط...بس بسبب ناموسة قرصتني بايدي الشمال بالزبط 7 قرصات بس!!! وفي الآخر صحيت على صوتها جنب وجهي مستعدة للهجوم...المهم راحت عليها لانها من كتر ما هي تقيلة مو عارفة تطير!!! ما علينا!! فقررت اني اضل صاحية واشتغل على طلبية بسكوت لعرسان ليوم السبت خاصة انه بيت سلفي جايين اليوم من السعودية والكل معزوم عندي على الغدا على منسف ان شاء الله...

اليوم حابة اشارككم بوصفة انا متأكدة كتير منكم بعرفوها ويمكن كتير ما بعرفوها وهي مناسبة لشهر رمضان الفضيل لانه كلنا منحب الفتات المختلفة برمضان سواءا على الفطور او السحور...الفتة اليوم هي فتة القرع الاصفر...مفيدة جدا وتغببر وبتسبه بطعمها فتة الحمص..

كنت اشتريت قرعة صغيرة قبل فترة وقررت اني اسلقها وافرز جزء لاكلات مستقبلية مثل الفتة واعمل الفتة على عزومة كانت عندي على العشاء يوم الاثنين الماضي

وكمان جزء منها راح باكل هارون والبزر تحمص بشوية زيت زيتون وملح بعد ما غسلته وخليته ينشف ليلة...


اما الفتة فطريقتها كالتالي:
فتة القرع الاصفر
المقادير:
2 كوب قرع اصفر مسلوق ومهروس
1/3 كوب طحينة (واذا حسيت بدها كمان بضيف شوي)
سن ثوم كبير مدقوق
2 ملعقة كبيرة لبن
عصير ليمونة كبيرة (يضاف المزيد حسب الرغبة)
ملح
6-8 شرائح توست مزال الحواف
القليل من ماء سلق القرع لتسقية الخبز
لحمة مفرومة  مقلبة بزيت للوجه
صنوبر مقلب بسمنة حيوانية (انا بحس انه هادا اللي بيعمل الفرق بالطعم وممكن تستعملي زيت زيتون)
بقدونس وسماق للتزيين

الطريقة:
يفرد الخبز في صحن التقديم ويسقى بالقليل من ماء سلق القرع ليطرى
في الخلاط يطحن القرع والطحينة والثوم واللبن والليمون والملح للحصول على قوام (يميل الى اليولة اكثر من قوام الحمص) ونتذوق لنرى ان كان يحتاج الى الليمون او الملح او الطحينة
يسكب فوق الخبز
يزين باللحمة المقلبة والبقدونس المفروم والسماق
نقلي الصنوبر بالسمن ونضعها ساخنة فوق الفتة
وصحتين

(الصورة كانت قبل ما اعمل الصنوبر)


Comments

  1. كتير بسمع عن فوائد القرع بس ولا مرة دقته او جربت اطبخه
    بس وصفاتك فعلا ممميزة ورائعة

    ReplyDelete
  2. يسلم ايديك منال اليوم عملتها ممممم بتشهي عنجد الله يسعدك ..أنا بحب القرع كتير وبجيب ببيعوه هون شرحات ومرات بعملوا عروض فبجيب وبقطعه وبحطه بالفريزر مكعبات ووقت ما بدي بسلقه وبهرسه أو بحطه مع المفتول أو صينية الخضار وصراحة طعمة القرع لحاله زكرني بالمتبل اللي بتعمله ماما بالقرع نفس الطعمة وبحبه كتييير...يعطيك العافية حبيبتي...تهاني

    ReplyDelete
  3. الف صحة حبيبتي تهاني شكرًا الك لتطبيقاتك ومتابعتك يا قمر

    ReplyDelete
    Replies
    1. حبيبتي انت الك كل الشكر على أحلى مدونة بتابعها وفعلا تعلقت فيها كتير شكرا شكرا

      Delete

Post a Comment

Popular Posts