الخميرة الطبيعية والخبز الريفي



 من اكثر الوصفات رواجا حاليا بعالم الخبز هو الخبز بالخميرة الطبيعية.... الموضوع مش موضة ولا اشي... فعليا هو موضوع الرجوع للاشي الاصلي والاول قبل ما يخترعوا الخميرة الفورية واللي صح بتفش القلب وبساعة بتكزن العجينة تضاعف حجمها...بس اثارها على الهضم واضحة جدا على الاقل انا بحس لما اكل بيتزا مثلا بالخميرة الطبيعية بتكون معدتي ممتازة مقابل انتفاخ لما اكل عجينة من الخميرة الفورية واذا اكلت بيتزا من برة الوضع بيكون اسوأ مع استخدام المطاعم لمحسنات الخبز وغيرها. ففعليا الخميرة الطبيعية اشي مش جديد بس الناس رجعت اله مع التوجه للاشياء الصحية ونمط حياة صحي...

العملية الاولى بالخميرة الطبيعية هو انه تعملوا الخميرة بعدين بتصير الامو مجرد عمل صيانة اسبوعية للخميرة وبس

لنعمل الخميرة بدنا مكونين فقط

طحين وماء

مهم الطحين يكون نوع جيد unbleached وافضل الانواع للبدء بالخميرة هو طحين الجاوادار Rye Flour

موجود باغلب السوبرماركتات انا استعملت النوع اللي بالفيديو ومودو بكارفور وياسر مول بعمان وغيرهم من السوبرماركتات الكبيرة

اما المي فالافضل ماء معدني مشان ما يكون فيو كلور

اما الادوات:

مرتبان زجاجي مع غطاء عادي

ميزان

اليوم الاول

على الميزان بنحط المرتبان وبنصفر الميزان وبنضيف 20 غم طحين جاوادار بعدين 20 غم ماء بنحرك لنضمن كل الطحين اختلط مع المي ونغطي المرتبان بشكل عادي (غير محكم) انترك مجال للخميرة تتنفس وبنحطها على الكاونتر بمكان بعدي عن الحرارة الشديدة او الهواء البارد وبنتذكر الوقت لانه رح نرجع الها تقريبا بنفس الوقت الايام القادمو لهيك اختاري وقت مناسب بتعرفي انه عندك 5 دقايق فيه تفضي للخميرة

اليوم الثاني

 تكرر نفس خطوات اليوم الاول

اليوم الثالث

نكرر نفس الخطوات بس بنحط 30 غم من الطحين و30 غم مي وبنحرك (المفروض نبدأ نلاحظ شوبة فقاقيع ولو بسيطة)

البوم الرابع

نتخلص من نصف الكمية ونضيف للنصف اللي بدنا اياه 30 غم طحين و30 غم مي 

اليوم الخامس

المفروض يكون حجمها عم بيزيد وفي تكون فقاقيع 

نكرر نفس خطوات اليوم 4

اليوم السادس

نكرر خطوات يوم 4 و5

اليوم السابع

نكرر نفس العملية ولكن المفروض هلا تكون امورها تمام واذا بدنا نعمل خبز القسم اللي بدنا نتخلص منه لازم نحطله 30 غم طحين (هون ممكن ويفضل نبدأ نستعمل طحين unbleached  بدل ال Rye) و30 غم مي للجهتين (اللي بالمرتبان واللي بدنا نستعملها للخبز) ونتركه مغطى 3-4 ساعات بحرارة الغرفة ليتضاعف حجمه ونستخدمه باي وصفة والباقي اللي بالمرتبان بنحطه بالثلاجة لاسبوع

باليوم السابع بنطلع المرتبان وبنرجعه لحرارة الغرفة وبعدين بنتخلص من النصف (وممكن نطعميه اذا بدنا نعمل خبز) وبنطعمي النص الباقي لمرتبان وبنرجعه على الثلاجة فورا ليضل كمان اسبوع وهكذا واللي بالمرتبان بيكون خميرتنا الطبيعية اللي اذا حبيتوا تعطوها اسم بيكون روعة

الخميرة الطبيعية بتضل سنين وسنين وفي ناس بيهدوها وبيورثوها لبعض ...ما تضحكوا لانه هاي حقيقة بالغرب .... :)

بتمنى ما تواجههوا اي مشاكل في عملها بس طبعا ممكن واهم اشي تاحظوا وانتو بتعملوها انه ما في ريحة تعفن...ولو شميتو ريحة مثل السبيرتو عادي هاد من التفاعل يعني مش ضار بس ريحة اشي معفن ابدا ما بدنا...بدنا نشم ريحة تخمر عادي

وبالتوفيق وهي وصفة الخبز الريفي بالخميرة الطبيعية

 الخبز الريفي بالخميرة الطبيعية

المقادير:

300 غم طحين جيد يفضل خليط من طحين القمح والابيض ال unbleached  وفي بالسوق نوع ممتاز Artisan حطيتلكم صورته بالفيديو

6 غم ملح بحري

100 غم خميرة طبيعية (مخمرة يعني مطعمينها 30 غم طحين و30 مي وتاركينها ترتاح وتخمر 4 ساعات قبل الخبز)

200 غم مي معدنية بحرارة الغرفة

الطريقة:

شاهدوا الفيديو للخطوات



واللي حابين يعملوا الخبزة الريفية بدون الخميرة الطبيعية هي الفيديو ورابط الوصفة على المدونة


للوصفة المكتوبة على الرابط


Comments

Popular Posts