فطيرة الجبنة الكاسات بالثوم وسلة تقديم التمر

كل رمضان بنقول ما بدنا نكتر اكل عشان حرام وما يزيد ومع ذلك الصايم حوالي 16 ساعة اكيد بيبدأ بده يحط كل الاكل اللي عنده على السفرة وب 10 دقايق بيكون وصل الى حد الشبع المفرط!!! الحمدلله على نعمه وطبعا بيزيد الاكل...الله يعين الستات اللي اهل البيت ما بياكله اكل بايت...الحمد لله احنا ما في عنا مشاكل من هادي الناحية...امبارح وبالرغم من الاعداد الموجودة على السفرة ما شاء الله... زاد اكل...وقررنا جماعيا بانه اليوم ما في طبخ...بس فتوش او سلطة وسمبوسك وقطايف لانه هدول خلصوا :)
كيف كانت اموركم انتو؟ بحب اسمع منكم...

امبارح ما عملت الفول لانه حسيت الحريرة والملوخية بنفخوا...ومنيح اللي ما عملته !!!

مهمتي اليوم: تسخين بقية الملوخية وزيادة كمية الارز بقدر كاسة على الزايد وعمل لفائف التمر واللي رح اشارككم وصفتهم بكرة ان شاء الله...ورح اتفق مع سلفتي مين رح يعمل الفتوش ومين السمبوسك فاذا انا السمبوسك رح اعمل السبرنغ رولز...بخبركم بكرة...واذا انا الفتوش بنشوف اذا رح يكون فتوش ولا سلطة يونانية...وطبعا رح اعمل زي العادة شافين عصير...واحد بطيخ وليمون (ورح اشارككم وصفته بكره ان شاء الله) وواحد تانج برتقال.

ولانه ما في شغل كتير اليوم مفكرة اني اعمل بعض الاشياء اللي مراكمتها على من ترتيب...منشوف كيف رح اقضي النهار اليوم ... وكنت حكتيلكم عن سلة تقديم التمر...سلة عادية موجودة عندي وعليها علقت ميداليات فوانس رمضان وبسلك ثبتت لعبة جمل ولزقت عليه قطعة زينة كانت على شوكولاته اجتني هدية السنه الماضية عليها رمضان كريم...وحطيت التمر وصحنين واحد فيهم كرز مجفف مع برش جوز هند وواحد جوز وزبيب (هادي الاشياء مفيدة جدا)



ولما اجى موعد الفطور ضوينا الفوانيس (من البلد الدزينة يمكن بدينار او اقل..عندي من قبل اكثر من 3 سنين) وياسمين حملتها وضيفت



متل ما وعدتكم على السحور امبارح كان فطيرة او معجنات الجبنة الكاسات بالثوم...سهلة ولذيذة وخلصت من البداية الى النهاية باقل من ساعة...

فطيرة الجبنة الكاسات بالثوم
المقادير للعجينة:
ملعقة طعام خميرة
1/2 ملعقة طعام سكر
1/2 كوب حليب دافئ
1/4 كوب ماء دافئ
1/4 كوب زيت نباتي
1/2 ملعقة صغيرة ملح
1/2 1 كوب طحين والقليل زيادة اذا احتاجت العجينة

مقادير الحشوة:
5 ملاعق كبيرة جبنة كاسات
2 سن ثوم
ملعقة طعام زبدة
1/2 كوب جبنة (انا استعملت قشقوان وممكن موزريلا)
اعشاب طازجة مفرومة ناعم مثل بقدونس او شبت

الطريقة:
تخلط مقادير العجينة كلها عدا الطحين (على اليد او العجانة) يضاف الطحين وتعجن من 5-8 دقائق لتصبح ملساء وتترك لترتاح 20 دقيقة.
حضري الحشوة في هذه الاثناء بوضع الزبدة في مقلاة ثم الثوم المدقوق وقلبي ليذبل دون ان يحمر وتضاف الجبنة السائلة ويحرك دقيقة ويرفع
تفرد العجينة في صينية قطرها 30 سم تقريبا وتوزع عليها الحشوة وترش بالجبنة والبقدونس وتدخل الفرن على حرارة 180 مدة تتراوح بين 20-25 دقيقة حسب الصينية والفرن (لغاية ما يحمر القاع والجوانب وجزء من السطح)
تقطع مثلثات وتقدم مع عصير او شاي...الف صحة وصيام مقبول ان شاء الله...


Comments

  1. تسلم ايدك..الصراحة شكلها زاكي.وبتشهي..ان شاء الله بجربها

    ReplyDelete
  2. يسلموا ايديكي افكار حلوة وبتجدد النفسية للطبخ والاكل
    والحمد لله انو انا اهل بيتي ما عندهم مشكلة بالاكل البايت
    بالعكس في اكلات بنحبها تاني يوم بتكووون كتيير اطيب

    ReplyDelete

Post a Comment

Popular Posts