حلاوة السميد

بتمنى تكونوا قضيتوا عيد سعيد ملئ بلحظات من الفرح وصلة الرحم والضحكات والتعب من اللف...ههههه الحمد لله اللي قدرنا نصوم شهر رمضان والله يتقبل منا جميعا ونعود لروتين الحياة اليومي وخاصة بعد كم من اسبوع والعودة الى المدارس...

طيب وبما انه الروتين سيعود خلينا نتذكر مع بعض شو اتفقنا قبل العيد بالنسبة للمقالات على المدونة...
1. سلسة "من البواقي ...اكلة جديدة"...رح يكون فيه مقال واحد كل اسبوع لتحويل البواقي لاكلة جديدة
2. سلسة "اصنعي في بيتك" مرة بالاسبوع لكل الاشياء اللي ممكن نعملها بالبيت بدل ما نشتريها جاهز ونقارن السعر واكيد الجودة
3. مقال مرة بالاسبوع للمخبوزات لمدة شهرين...يعني لآخر شهر 9 ان شاء الله بعدين بنبدأ بدروس في موضوع تاني مثل الكيك او الحلويات...الخ
4. سلسة "صحنك الجانبي" واللي ممكن يكون شوربة او سلطة او مقبلات او ساندويش وهادا ممتاز خاصة اذا عندك بواقي او على العشا...
5. سلسلة "اكلة وحكاية"...للاكلات القديمة من ايام ستي  (يمكن ما رح تكون كل اسبوع بس كل ما تيسر)
6. مقال حر...بيعتمد على البوست والوقت واللي بعمله وهاد ممكن يكون اي شي او استضافة لسيدة ووصفة الها زي ما عملنا مرتين قبل هيك فتشجعوا وابعتولي..


وبما انه اليوم الاحد فرح اعتبر انه هو بداية الاسبوع عشان نبدا مع بعض سلسة المقالات الجديدة واللي ما رح تكون بالترتيب اللي فوق بس حسب الظروف وعملية الطبخ في مطبخي... اليوم رح يكون مقال حر ورح اشارككم وصفة حلو تقليدي لذيذ كتير وكان مناسب برمضان بس هو مناسب باي وقت كمان وهو حلاوة السميد...



حلاوة السميد
المقادير:
2 كوب سميد ناعم
اصبع زبدة
3 كوب قطر بارد
250 غم- 350 غم جبنة بيضاء محلياه (انا استخدمت جبنة القطايف)
كوب ماء
2 ملعقة كبيرة ماء زهر
فستق حلبي مطحون او صنوبر او لوز للوجة

الطريقة:
يحمص السميد والزبدة على نار متوسطة مع التحريك والتقليب المستمر بحيث تذوب الزبدة ويشتربها السميد وبدون ان يأخذ لون امدة 1/4 ساعة (ممكن تخفيض الحرارة اذا حسيتي انه لونه بدأ بالتغير)
يضاف القطر تدريجيا مع الانتباه لانه السميد والطنجرة ساخنة ويقلب على نار منخفضة مدة 10 دقائق
يضاف الماء وتحرك 5 دقائق
تضاف الجبنة وتقلب وستبدأ الجبنة بالذوبان وبتصير تمط وهو المطلوب
يضاف ماء الزهر وترفع وتسكب وتزين بالمكسرات والقشطة اذا رغبت ويفضل ان تؤكل ساخنة وصحتين





Comments

  1. متل مبدأ الكنافة تقريبا
    بس شكلها طيبة كتير وشهية
    يسلمواا ايدكي

    ReplyDelete

Post a Comment

Popular Posts