معجون الزيتون (تاباناد) من سلسلة اصنعي في بيتك وخبز التاباناد (الدرس الثاني في المخبوزات)

اذا حد فيكم انتبه...(واكيد في ناس انتبهت) اني ما حطيت وصفة اول امبارح حسب الجدول...وعشان احنا متفقين :) (متفقين متفقين...متذكرين هاي الاغنية؟ قديمة لرونزا واختها...مش متذكرة شو اسمها) بس زوجي كتير مرات بيعلق لما نتفق على اشي وبيغنيها :)...المهم اني اليوم رح احط وصفتين...واحدة من ضمن سلسة اصنعي في بيتك لمعجون الزيتون الاسود (تاباناد) واللي بناكله بالمطاعم مع عيدان الخبز المالح وانواع خبز تانية...ممكن ينشرى جاهز بس لييييش؟ انتي ممكن تعمليه بالبيت اوفر وازكى... ومنه رح نستعمل جزء لدرس المخبوزات التاني لعمل اقراص خبز بالزيتون (التاباناد)...ما بدي احكي كتيير لانه فيه حكي كتييير جاي وصور فخلينا نبدأ بالتاباناد

معجون الزيتون (تاباناد)
المقادير:
كوب زيتون اسود نوع جيد مزال البذور (انا بستعمل التركي اللي بيجي بباكيتات بلاستيك..سعره ممتاز وزاكي)
سن ثوم مدقوق
ملعقة طعام بقدونس مفروم
2 ملعقة طعام قبار
2 ملعقة طعام زيت زيتون
ملعقة طعام عصير ليمون
ملعقة صغيرة زعتر ناشف

الطريقة:
توضع كل المقادير في محضرة الطعام وتطحن لتحصلي على المعجون...قدمية مع البسكوت المالح او عصايات الخبز المالح واللبنة وادعيلي :) (ادعيلي مش من الوصفة :) )


اما وصفة الخبز ودرسنا الثاني في المخبوزات فبدي تركزوا معي منيح...


تحمستوا بس شفتوا الصورة...يا الله نشوف كيف بنعمل...

خبز التاباناد
المقادير:
1/2 3 كوب دقيق (ممكن نحتاج المزيد للعجن)
2 ملعقة صغيرة خميرة
ملعقة طعام سكر
100 ملم ماء دافئ
200 ملم حليب دافئ
50 ملم زيت زيتون
3/4 ملعقة صغيرة ملح
بياض بيضة

للحشي:
2 ملعقة كبيرة تاباناد
50 غم (1/2 اصبع) زبدة بحرارة الغرفة


للوجة:
صفار بيضة
ملعقة طعام ماء
ملعقة طعام زيت زيتون
فلفل اسود (لازالة زفر الصفار)
سمسم غير محمص
حبة البركة

الطريقة:
تخلط الخميرة والسكر والماء وتحرك لاذابة السكر وتغطى وتترك لتخمر 10 دقائق لتحصلي على نتيجة مثل الصورة

ملاحظة: (حرارة الماء مهمة جدا فاذا كانت ساخنة تقتل الخميرة واذا كانت باردة لن تخمر الخميرة وبالتالي يمكنك التأكد من الحرارة بواسطة ميزان لتكون 110 ف او باصبعك الصغير بحيث يتحمل الحرارة)


ينخل الدقيق والملح
في العجانة توضع كل المواد السائلة (الحليب، الخميرة مع الماء، الزيت، بياض البيض بعد خفقه قليلا بالشوكة لتكسير البروتين ليمتزج بشكل اسهل) وتحرك لتختلط ثم يضاف الطحين ونبدأ بالعجن. (يمكن استعمال اليد ولكن ستكون العملية اطول


تعجن العجينة اتبدأ بالتكور على الخطاف ونعجن من 7-10 دقائق بالعجانة او من 12- 15 دقيقة باليد ونعرف انها جاهزة عندما يصبح سطحها املس ولا يوجد اي بقايا مواد على جوانب صحن الخفق (مثل الصورة)



نخرجها ونكورها (في الصور مبين طريقة العجن بباطن كف اليد بحيث تلف العجينة وبزاوية 90 درجة كل مرة)
ندهن الصحن بالقليل من الزيت ونغطيها لتخمر حوالي ساعة ليتضاعف حجمها

وبعد ان تخمر نخرجها ونقطعها الى 12 قطعة (قدر الامكان متساوية) ونغطيها بقطعة قمائ نظيفة لنبدأ العمل بدون ان تنشف القطع


نفرد القطعة بالطول مثل الصورة


وندهنها بالقليل من الزبدة (نحاول تجنب الحواف)


والقليل من التاباناد


ونلفها رول ونغلقها جيدا (مثل الصورة)


ونبدأ ببرمها قليلا لتطول


وهلأ رح نبدأ باللف فانتبهوا منيح... والصور احسن من الحكي
بنلم الطرفين وبنعكسهم
بنعملهم مثل العقدة (كأنه عم نربطهم وبنخبي الاطراف للاسفل وبنضغط



ولما نخلصهم كاهم بنغطيهم بفوطة نظيفة وبنتركهم يخمروا 15 دقيقة وبنحمي الفرن على 190
بنخفق الصفار والزيت والماء والفلفل وبندهن الوجه ونرشة بالسمسم وحبة البركة


والنتيجة رائحة اكثر من رائعة وطعم ولا الذ...قدميها ساخنة مع زيت الزيتون وطبق معكرونة...وصحتين والف عافية...واللي عندها سؤال يا ريت تعلق على المدونة تحت عند اترك تعليق...وبتمنى تجربوهم وتخبروني...



Comments

  1. هل ممكن استخدامها للبيتزا ؟

    ReplyDelete
    Replies
    1. ممكن اكيد مع مراعاة ملائمة التوبينغ (الاطعمة التي ستوضع فوقها)

      Delete
  2. بالنسبة لمعجون الزيتون يسلمواا ايديكي على الوصفة السهلة جداا
    انا كنت متخيلتو كتيير صعب ينعمل بالبيت بس طلع ولا اسهل واكييد انظف :)
    بالنسبة للمخبوزات اشي رووووووووووووووووووووووووووووووووعة :)
    يسلموا ايديكي
    وصور الخطوات رائعة جداااا وبتوضح كل شي

    ReplyDelete
  3. منال يسلم ايديكي حبيبتي، شو القبار اللي بمعجون الزيتون؟

    ReplyDelete
  4. اهلًا دكتورة هو مخلل ثمار الفلفل الأسود واسمه capers بالانجليزي ممكن تستغني عنه

    ReplyDelete

Post a Comment

Popular Posts