المأمونية الحلبية

مش طبيعية الازمة برة اليوم...من غير مبالغة كنت رح اعمل 3-4 حوادث والله ستر مع اني بعتبر حالي سواقة مش بطالة بس الازمة لا تطاق واللي كفى وغطى اليوم سيارة هامر كبيرة قررت اللي سايقتها انها توقف على باب الدخلة بشارع رئيسي في الشميساني وانا متأخرة عن موعد بسبب الازمة وزمر زمر وحضرتها بالسيارة ولا هون ولا كأنها عاملة اشي...قال شو بدها تسال عن عنوان ..طيب راعي السير المكدس وراكي وصفي على جنب وما تسكري الشارع بالبارجة اللي انت سايقاها...وبعدين بتجحر في انه ليش بومر...مع اني مش من مناصري التزمير بس لهيك نوع من الناس ما في اشي بفش القلب غير زمور قاتل...مع اعتذاري لكل اللي ازعجتهم...وقال شو ينصلح حال الامة!!! من وين بالله!!!!

ما علينا بكفي شكونة وخلينا ندخل بالاكل...

لاني وعدتكم اشارككم بوصفات الاسبوعين الماضيين بالفيديو فبتلاقو الروابط هون

طريقة تجفيف البندورة والخبز بتلاقوها على الفيديو التالي
 والمعكرونة  هون

ووصفات الاسبوع الماضي من البسكوت بتلاقوها على الفيديوهات التالية




وبما انه بداية شهر جديد فمجموعة نكهة عربية الشهر هاد كانت رائعة بوصفة من مستضيفتنا شام كيالي من حلب الشهباء ووصفة المأمونية الرائعة...شام حطتلنا معلومات عن تاريخ الوصفة وهي اللي شاركتنا فيه

"تعتبر المأمونية وصفة حلبية بحتة لاتوجد في اي مدينة عربية اخرى وتعتبر المامونية مصحوبة بالشعيبيات من اهم الوجبات الصباحية التي يقبل عليها اهالي مدينة حلب 

غنية بالسكريات والبروتينات التي تمنحنا الطاقة لتحمل اعباء يوم طويل مملوء بالعمل
ويروى انه من شدة عشق الحلبية لهذه الاكلة انهم كانوا يقولون المامونية هي طين الجنة
كما ارتبطت المامونية بافراح الحلبية وكانت تقدم كوجبة اساسية في يوم (الصباحية) وهو الفطور الاول بعد زفاف العرسان

وقد ذكر العلامة (خير الدين الاسدي) في موسوعة حلب المقارنة بان المامونية حلوى من سميد وسمن وسكر ونعتقد هي ليست نسبة للخليفة العباسي لان حياته مفصلة لدينا ، نعم ابدعها حلبي ويغلب ان يكون من سوق السقطيةواسم المبدع مأمون ونسبت اليه ..يقيني ان لا فطور اذكى واطيب من صحن مامونية مع القشطة والشعيبية بجانبها صحن الجبن العزازي

وتحضر المامونية كالتالي :
كوب سميد خشن
من اربعة ل خمسة كوب ماء
كوب و نصف سكر
ملعقة صغيرة ممسوحة قرفة
3ملاعق طعام سمن حيواني
حفنة من الجوز او مكسرات حسب الرغبة للتزين

- يوضع الماء على النار ويضاف له السكر و يترك حتى يغلي .
- في وعاء اخر نقوم بتحميص السميد مع السمنة الى ان يشقر لونه .
- بحذر نضيف السميد بالتدريج للقطر و هو على النار. ونحرك بخفة وسرعة الى ان يتجانس .
- نضيف القرفة الناعمة وتترك على النار مدة عشر دقائق الى ربع ساعة
- توضع بطبق التقديم وتزين بالقشطة والمكسرات والقرفة و تقدم ساخنة مع الخبز الطازج ."


وهي تطبيقي لاحلى وصفة...يسلم ايديكي يا شام والله يهدي بال اهل الشام ويروق النفوس وترجع الشام وحلب زي الاول واحسن



Comments

  1. بنفع سميد ناعم؟

    ReplyDelete
  2. عندي صاحبة من حلب علمتني اياها ايام الجامعة

    ReplyDelete
  3. منال هل المامونية هي نفسها حلاوة السميد

    ReplyDelete
  4. هي المامونية الي بحكوا عنها بالمسلسلات
    واخيرا شفتها
    يسلمواا ايديكي كتييير

    ReplyDelete
  5. يسلمو انك عم تعرفينا ع وصفات جديدة والله كتير مبسوطة فيكي والحلو انو كلهم بسيطين ومكوناتهم موجودة بالبيت

    ReplyDelete

Post a Comment

Popular Posts