A drink, a soup and the 1st part of my kitchen renovation

 بوست جديد انا متحمسة عليه كتير لاني رح اشاركم الجزء الاول من فلوغ التغيير اللي طرأ واخيرا على المطبخ واذا بتتذكروا حكيت عن هاد الموضوع وعن كيف اني بديت احوش مشان يتم واخيرا تم والميزانية للمشروع ككل كانت 1700 دينار شاملة للكاونترات واي اشياء تانية رح اعملها

 مبدئيا الكاونترات مع المجلى طلعت 1500 النوعية كوارتز جبتها من عند نعوم وجبت الحنفية من ايكيا
جبت 3 لمبات جداد من جولي شيك لسة ما وصلوا بس رح يكونوا باذن الله بالجزء الثاني من الفيديو وسعرهم 30 دينار لل 3
ببوست الجزء الثاني بشارككم التفاصيل لكل شي اشتريته ومن وين





اما على صعيد الطبخ فخليني اعمل مشاركة للمنيو وشو صار عليها

وجبات رئيسية
اسباجيتي
تشيلي (رح استخدمها بشكل مختلف عن المعتاد والطرق اللي اقترحتها قبل بالمدونة) الحقيقة اكلناها مع رز
ريش مع خضار
ستيك بالفطر
شرحات مكمورة بالفلفل والبندورة
بقلة طبيخ (عملناها ووصفتها بهاد البوست) 
شوربة عدس مع صفيحة ارمنية بالطحينة (الصفيحة وصفتها هون)
ستير فراي ستيك (وصفتها هون)
دجاج مع سبانخ
ملوخية
بامية
شاكرية (وصفتها هون
تندر دجاج
اجنحة دجاج (من قبل)
افخاد دجاج (من قبل)
كوسا بالبشاميل (رح اشارككم وصفتها)
قلاية بندورة باللحمة (عملت بدالها قرع خرط باللحمة والبندورة)
برغر عربي ورح احطلكم الوصفة فيديو ان شاء الله (لخالد رح يكون بالخس)

جانبي
حمص باللحمة
رز الزهرة (رح اشارككم وصفته بيجنن حتى نويت اجيب صحارة واعمل)
كولسلو (الوصفة هون)
ابو شلهوب (الوصفة هون بس رح اعمله لخالد بالكينوا)

من الشهر الماضي
ساندويشات تونا
فرنش توست
حلقات البصل


  طبعا لاني استخدمت من هدول الاكلات بالعزيمة فاحنا فعليا وتقريبا خلصنا اغلب الطبخات على المنيو ورح اكمل ان شاء الله من الوصفات اللي بالمنيو حسب القدرة واذا تغير اشي بخبركم باذن الله بالبوست الجاي...

بالبوست الماضي ما حطيت فطور العيد...وهي احلى فطور بالعيد...بتعرفوني هلا بحب الفطور كتير :)



ومن ازكى العصائر للفطور عصير الجريبفروت والبرتقال مع الجرانادين


عصير الحمضيات


 المقادير:
لتر عصير جريب فروت
لتر عصير برتقال
عصير ليمونة
جرانادين حسب الرغبة
رمان حب مفروط

الطريقة:
تخلط مقادير الحمضيات معا
نضع الجرانادين في كؤوس التقديم او الابريق ونصب الحمضيات
تضاف حبات الرمان


...ووصفتنا التانية هي شوربة وبالرغم من الجو الحار فهي طريقة ممتازة للاستفادة من بواقي حشوة المحاشي

كم مرة عملتو محشي وزاد حشوة وما عرفتوا شو ممكن ينعمل فيها او كبيتوها...


شوربة بواقي المحشي
المقادير:
( كوب حشوة محشي (رز ولحمة مفرومة وبهارات
اربع اكواب مرق دجاج او ماء
ملح حسب الرغبة
2 ملعقة طعام او اكثر رب بندورة
ملعقة طعام سكر

الطريقة:
عادة الحشوة بيكون فيها زيت فتقلب قليلا علة النار ثم يضاف المرق الساخن ورب البندورة والسكر وعندما تغلي نضبط الملح
وتترك لتنضج الحشوة
في حال الرغبة باضافة لب الكوسا مثلا فهذا سيجعلها وجبة متكاملة
ممكن اضافة المزيد من الماء اذا سمكت كتير
والف صحة وهنا

Comments

Popular Posts