بسكوت الحظ الصيني...سهل ومفيد للاحتفال بمناسبات كثيرة

اليوم كان عندي درس صيني لسيدات ال جي الحقيقة انه كان درس سريع جدا وخلصنا فيه 6 اطباق ب ساعة ونصف...الف صحة وهنا على قلوبكم..وكنوع من الشكر للستات الحلوين حبيت انهي الدرس باشي بسيط هو بسكوت الحظ الصيني واللي قررت اعملة عملاق الحجم والون العجينة لاحصل على الاشكال التالية:


وكان فيه لون ازرق بس نسيت اصوره...هذا البسكوت كثير سهل بس المهم عملية طويه لما تطلعيه من الفرن يكون سريعة ولازم تكوني حذرة انه ما تحرقي ايديكي...

بسكوت الحظ الصيني:
المقادير:
بياض اربع بيضات
كوب سكر
كوب طحين
رشة ملح
ملعقة صغيرة فانيلا او 1/4 ملعقة صغيرة روح اللوز
3 ملاعق طعام كريما سائلة
5 ملاعق طعام زبدة مذابة

الطريقة:
يخفق بياض البيض مع السكر لمدة دقيقة.
ينخل الطحين مع الملح ويضاف للمزيج ثم الزبدة والكريما والفانيلا
يحمى الفرن الى 200 درجة وتبطن الصينية بورق الخبز او شريحة الخبز غير اللاصقة..
يوضع مقادر ملعقتين صغار على الورق وتفرد دائرة وبشكل خفيف جدا بحيث يمكنك تقريبا رؤية الورق والهدف انا بدنا اياها تكون رقيقة وتخبز عدة دقائق مع المراقبة وعندما تنشف وتبدا الجوانب بالاحمرار قليلا (لاننا لا نريد عليها لون) نخرجها من الفرن ونكون قد جهزنا اوراق الحظ او الحكم او النكت على ورق ونقصه شرائط طويلة ونطويها ونضعها في منتصف البسكوتة وباستخدام ملعقة الكفتة نرفع طرف ويطوى فوق النصف الاخر ونمسك الطرفين المقابلين ونطويهم لنقربهم من بعض ولان البسكوتة رقيقة جدا فيجب العمل بسرعة وستبدأ بالنشفان فورا لتصبح مقرمشة وتلف وتقدم.
ملاحظة:
انا عملتهم كبار بس الاصل يكونوا صغار عشان هيك حاولي ما تحطي اكثر من 2 في الصينية وبعديهم عن بعض حوالي 5 سم عشان ما يلزقوا ببعض ولانه اذا حطيتي عدد اكبر يمكن ما تلحقي تطوي قبل ما ينشفوا.
اما بالنسبة للون فحطيت جزء من العجينة في عدة اوعية ولونتها وبس. وهذا اللون الاصلي
وبس بردوا تماما سيحت شوكولاتة وغطستهم بالشوكولاتة وزينة الكيك...وممكن تكون هذه طريقة حلوة كثير للاحتفال برأس السنة اذا عاملة جمعة بحيث تحطي فيها حكمة او حظ للسنة الجديدة وممكن تكون جزي من لعبة Truth or Dare في اعياد الميلاد وممكن تكون طريقة لشكر اصدقاء الك في مباركة وممكن تكوني مخبية فيها هدية صغيرة ما ممكن الشخص يتوقعها مثل خاتم خطبة من العريس للعروس...وصحتين...

ملاحظة اخيرة...اللي رح يعملوا رح يلاقوا طعمة زاكي وقريب من قرطوس البوظة وبالتالي ممكن تستعملي نفس الوصفة لعمل اوعية لتقديم البوظة في الصيف او قراطيس...

Comments

  1. ما احلى الالوان-يسلمو

    ReplyDelete
    Replies
    1. غادة..يعني مش هيك الرد بعد سنتين..ههههه آسفة وشكرا يا قمر

      Delete
  2. يسعدلي ياك جميلة جدا

    ReplyDelete
  3. فكرة حلووة كتير
    يسلموا ايديكي

    ReplyDelete
  4. This comment has been removed by a blog administrator.

    ReplyDelete

Post a Comment

Popular Posts