سلطة الخيار بالشبت والجبنة

الحمد لله بحب اخبركم انه بيتي تعزل بشكل ممتاز (اعتقد!!!) بس ضايل نعيد على الشبابيك الاسبوع الجاي بعد الشتا...بدي استمتع باليومين اللي جايين ان شاء الله لانه يوم الثلاثاء بتبدأ امتحانات آخر السنة عند الشباب!!! جد وين الوقت راح!! وبعتقد اني مثل كتير ستات عنا علاقة حب وكره مع المدرسة...يعني جد انها بتضب الاولاد نص نهار فما بتضلك قلقانه انهم مقضيينها نوم وكسل وبتعملي 7000 اشي الصبح وهم بالمدرسة...وفي نفس الوقت بكره ادرس واسمع واضلني اعيد اسطوانة روح ادرس...روحي ادرسي...آآآه...اظن انه كتير منكم بشعروا بهادا الشعور!!!

المهم اني لا اتطلع مطلقا للاسبوعين الجايين من ناحية الامتحانات والله يعينا ويعينهم ويوفقهم وينجحهم. اما على صعيد الاعمال المنزلية فحابة ابلش هادا الاسبوع بشوية مشاريع منزلية ديكورية ..(اذا كانت هذه كلمة!!!) في عندي حيط بدوه تعليق صورة عليه ولازم زراعة بعض الاماكن في الجنينة وكم قوار على البرندة. وعندي عزومة على العشا ان شاء الله يوم الاربعاء واللي بيعرفوني بيعرفوا اديش بحب العزايم...كانوا صاحباتي في الشغل ينصدموا من حماسي للعزايم :)


امبارح الحمد لله قضينا يوم لطيف بالمزرعة مع كمشة اولاد :) وزي ما حكتلكم المرة الماضية انه من اكتر الاشياء اللي بحبها بالصيف والروحة على المزرعة (او رحلة) السلطات اللي ممكن الواحد يعملها...يعني خلينا نطلع بره قالب السلطة اليومية التقليدية...سلطة اليوم منعشة كتير وخفيفة وما بدها خضرة غير خيار وبصل (بفضل احمر) وشبت ونعنع...وهي الوصفة:

سلطة الخيار بالشبت والجبنة
المقادير:
5 حبات خيار وسط مقطع بالطول ثم قطع كبيرة شةي
بصلة حمراء صغيرة مقطعة شرائح رفيعة
2-3 ملاعق طعام نعنع مفروم
2-3 ملاعق طعام شبت مفروم
زيتون اسود (اختياري) انا ما حطيت
1/2 كوب جبنة فتة

الصوص:
2 ملعقة طعام خل عنب
2 ملعقة طعام عصير ليمون
1/2 ملعقة صغيرة اورجنو
6-7 ملاعق طعام زيت زيتون
ملح

الطريقة:
تخلط مقادير السلطة وتوزع عليها الصوص وتقدم وصحتين...


Comments

  1. يسلموا ايديكي
    السلطة رائعة وباردة وشهية
    وبالنسبة للاولاد والمدرسة ووجع القلب روحي ادرسي وامتحانات
    بكره فترة الامتحانت من كل قلبي
    لانو الجيل اختلف وبطل يحب يدرس .. صار كل همه الالعاب الاكترونية بس :(

    ReplyDelete

Post a Comment

Popular Posts