بونبون التمر وعصير اليموناضة والبطيخ البارد

جمعة مباركة على الجميع...والحمد لله الي الجو لطيف وعلى غير العادة درجات الحرارة اخفض مما هي عادة عليه بهالوقت من السنة...ان شاء الله من رحمة ربنا فينا برمضان...

هينا بثالث يوم من رمضان...مش معقول كنا نستناه وهي الوقت بيمرق...العيلة امبارح تشاركوا بالبواقي من اليوم الاول والاضافة كانت من بيت بنت حماي الثالثة بصينية دجاج وبطاطا وسلطة. اما انا فاستقر الامر على اني عملت سلطة يونانية...

مهمتي لليوم مش واضحة لغاية الآن لانه ما اتفقنا امبارح...انا روحت بدري لانه هارون منكد (شكلوا رشح!!) وبالتالي قررت اني اطبخ واللي بيزيد بيتاكل بكره ان شاء الله...وكنت مخاصة كل شي الساعة 11 لاني صحيت على ال 9 وبديت...بس كنت مرتبة الاشياء من امبارح لانه ما كان في شغل كتير...
فاللي انعمل امبارح كان:
حشوة السبرنغ رولز
تطليع العجينة للثلاجة
سلق الورق دوالي
نقع الارز بالليل
وتطليع اللحمة من الفريزر للثلاجة لتسيح
تقليب البندورة والبصل تحت الورق في الطنجرة

والصبح لفيت الورق ورتبته فوق البصل والبندورة ولفيت السبرنغ رولز وكان عندي قطعتين ستيك كنت مطاعتهم بالغلط من الفريز ومقلبين بشوية زيت وعليهم مرق...فقررت اعمل شوربة الارز باللحمة...

وعلى هذا الاساس مهمتي اليوم هي: ورق دوالي، شوربة الارز باللحم وسبرنغ رولز وطبعا لبن جنب الورق دوالي...والعصير هو بنش (اللي عملته بدورة اهلا رمضان) وعصير مانجا ان شاء الله

ومتل ما خبرتكم...الحلو كان لفائف التمر بعجين رقائق الفيلو (من الانواع السنبلة او الهنا) والوصفة هي:
بونبون التمر
المقادير:
1/2 باكيت عجينة رقائق الفيلو مسيحة في الثلاجة قبل بيوم من الاستعمال وتغطى تماما ببشكير نظيف اثناء العمل كي لا تجف..
تمر مزال منه النوى (انا استعملت نوع طري عشان يكون اسهل بالاكل)
لوز كامل مقشر مقلي بزبدة لحشو التمر بدلا من النوى او محمص بالفرن لتخفيف الدهون
القليل من الماء بالطحين (لاغلاق العجينة)
زيت للقلي
سكر ناعم وقرفة للوجه

الطريقة:
تقسم كل رقاقة عجين ال قسمين بالطول للحصول على شريط طويل ثم يقسم كل شريط من النصف بالعرض ليصبح هناك 4 اقسام من العجينة
توضع التمرة المحشوة باللوز على الطرف وتلف مثل السيجارة وتغلق الحافة بالقليل من الماء والطحين وتكون التمرة بالوسط وباستخدام القليل من الماء والطحين نجمع جهتي العجين لتصبح مثل حبة التوفي او البونبون ونكمل الباقي (وستجدين ان تشكيل بعض الحبات اسهل احيانا من غيرها )
يحمى الزيت وتقلى لتصبح ذهبية وترش بالسكر الناعم والقرفة وتقدم..

طريقة ثانية...يمكن دهن العجينة بالزبدة المذابة والقيام بنفس خطوات الحشي ولكن خبز البون بون بدل القلي...



اما عصير الليموناضة بالبطيخ فهو لذيذ ومن اسهل ما يكون
عصير الليموناضة بالبطيخ
المقادير:
ليموناضة جاهزة (ليمون وسكر وماء ) حضريها بالطريقة التي ترغبين وممكن استعمال مسحوق عصير الليمون اذا رغبت..
بطيخ احمر حلو مخلى من البذور يطحن على الخلاط ويصفي (وممكن ما تصفيه)

الطريقة:
كميات متساوية من الليموناضة والبطيخ وتقدم مع الكثير من الثلج...

وصيام مقبول باذن الله...


Comments

  1. كتيير حبيت فكرة بوبون التمر بس ما عرفت شو هي العجينة المطلوبة
    هل هي نفسها تبع الاوزي؟؟
    رقائق الهنا؟؟

    ReplyDelete

Post a Comment

Popular Posts