سلطة البروكلي بالبيكون وساندويش الحبش بالافوكادو...

صباح الورد للجميع...صاحية نشيطة انا اليوم لاني معزومة على الفطور عند اهلي...والحقيقة انه اذا انا جيدة في الطبخ فامي الله يسعدها فنانة...يعني بكل صراحة بس اروح عندهم على الفطور باكل كتيييير منيح مش بس لانه الاكل زاكي وكمان لاني مش تعبانة في وبالتالي بستمتع تماما...والاشي التاني اللي محمسني اليوم هو الصبايا اللي بجروب الطبخ الخاص بي على الواتس آب واللي الله يرضى عليهم بيخبروني بخلاصة تجاربهم للوصفات على المدونة وبيقولولي انها عجبتهم...ولعيون كل واحدة فيهم قررت اني انزل بوستين اليوم....واحد للبسكوت زي ما اتفقنا امبارح قبل العيد والتاني لوصفتين نزلوا بمجلة نكهات عائلية في عدد اللغة الانجليزية للشهر الماضي...يا ريت اتابعوا المجلة لانها مفيدة كتير وانا بكتب باللغتين بالعربي والانجليزي... ,وهي لمحة من عدد شهر 8
http://www.familyflavours.com/familyflavours/Magazine/En/Default.aspx

واشي ثالث بحب اخبركم فيه وهو اني حابة ابدا ب نظام جديد بالمدونة ابتداءا من اليوم اول آب هو كالتالي:
- من امبارح ولغاية آخر يوم رمضان ان شاء الله رح يكون فيه وصفة بسكوت...
- بعد العيد ان شاء الله رح ابدأ عدة مقالات بانماط معينة كالتالي:
1. سلسة "من البواقي ...اكلة جديدة"...رح يكون فيه مقال واحد كل اسبوع وانا كتيييير بحب احول بواقي الاكل لاكل جديد بحيث انه اذا عندك افراد ما بياكله البواقي فممكن هيك "تضحكي عليهم" !!! :)
2. رح استمر بسلسة "اصنعي في بيتك" مرة بالاسبوع لكل الاشياء اللي ممكن نعملها بالبيت بدل ما نشتريها جاهز ونقارن السعر واكيد الجودة
3. بدينا بأول درس طبخ في المخبوزات ورح يكون فيه مقال مرة بالاسبوع للمخبوزات لمدة شهرين...يعني لآخر شهر 9 ان شاء الله بعدين بنبدأ بدروس في موضوع تاني مثل الكيك او الحلويات...الخ
4. سلسة "صحنك الجانبي" واللي ممكن يكون شوربة او سلطة او مقبلات او ساندويش وهادا ممتاز خاصة اذا عندك بواقي او على العشا...
5. سلسلة "اكلة وحكاية"...بحب كتير اني اشارككم اكلات قديمة من ايام ستي وطبعا باستشارة ماما للتأكد من الاكلة وقصص الي معها كل ما امكن (يمكن ما رح تكون كل اسبوع بس كل ما تيسر)
6. مقال حر...بيعتمد على البوست والوقت واللي بعمله وهاد ممكن يكون اي شي او استضافة لسيدة ووصفة الها زي ما عملنا مرتين قبل هيك فتشجعوا وابعتولي...
واليوم السابع عطلة...اكيد بتكونوا زهقتوا مني برضه!!!...

بتمنى انه نستمر ويا ريت تعلقولي وتقولولي شو رأيكم واقتراحاتكم...

الوصفة الاولى لسلطة بالبروكلي...مش اعتيادية كتيير بس زاكية كتيير...


سلطة البروكلي بالبيكون
المقادير:
2 راس بروكلي مقطع زهرات صغيرة
1/3 كوب ماء ساخن
4 ملاعق طعام سكر
4 ملاعق طعام خل

كوب مايونيز
7 شرائح بيكون بقري مقطع مكعبات ومقلي (بدون زيت في مقلاة غير لاصقة حتى يقرمش)
2 كوب جبنة شدر
بصلة خضراء مفرومة ناعم

الطريقة:
يذاب السكر في الماء ويضاف الخل ويضاف كل المزيج للبروكلي في وعاء بايركس عميق ويغطى ويوضع في المايكرويف ليطرى قليلا...ممكت تسلقي البروكلي شوي وبعدين تحطي عليه الخليط وتتركيه حوالي 1/2 ساعة ليتشرب الطعم
يصفى الماء المتبقي وتخلط جزء منه او كله مع المايونيز للحصول على الصوص
تضاف بقية المقادير للبروكلي والصوص وتبرد قليلا في الثلاجة وصحتين



والوصفة التانية لساندويشات التيركي والافوكادو المفتوحة...جربوها ورح تحبوني :) ممتازة للسحور اليوم....


ساندوبشات الحبش والافوكادو المفتوحة
المقادير:
خبز فرنسي مقطع بالورب شرائح (عشان تكون المساحة اللي بنحط عليها اغراض الساندويشة اوسع)
1/2 كوب زيتون اسود مفروم (الخاص بالبيتزا)
1/2 ملعقة صغيرة بودرة Chili او شطة حمراء(اذا ما عندك اياها مش نهاية العالم )
1/2 ملعقة صغيرة كمون
رشة ملح
1/3 كوب مايونيز
1/3 كوب لبن زبادي
1/3 كوب بصل تخضر مفروم ناعم
علبة شرائح حبش مدخن
حبة افوكادو مقطعة شرائح رفيعة ومرشوشة بليمون عشان ما تسود
2 حبة بندورة وسط مقطعة شرائح رفيعة
1/2 1 كوب جبنة شدر مخلوطة بمونتراي جاك (او اكياس الجبنة المبشورة Mexican Blend)

الطريقة:
يخلط الزيتون والبهارات ونأخذ 2 ملعقة طعام من المزيج على جنب (للوجة)
نخلط بقية الزيتون مع المايونيز والزبادي والبصل
تقرد كمية من الخليط على شرائح الخبز
تضاف عليها شريحة تيركي (اذا كبيرة اقسميها) وشريحة بندورة وافوكادو وجبنة والقليل من الزيتون الذب احتفظنا به
تصف في صينية وتوضع في الفرن على 175 حوالي 10 دقائق ليتحمص قاعها قليلا وتذوب الجبنة
والف صحة وهنا...


Comments

  1. يسلموا ايديكي
    وصفات حلوة وتنويع بالاكل
    ومعك حق انو الواحد بياكل اكتر من الاكل الي ما تعب وهو يحضره
    سبحان الله بحس حالي بشبع من الشغل ومن فرحة اطفالي وزوجي لما بلاقيهم انبسطوا على الاكلة الي طبختها انا

    ReplyDelete

Post a Comment

Popular Posts