اكلة من ايام زمان...رز وعدس

بعد عطلة طويلة (على الاقل بالنسبة الي) 4 ايام ما في طبخ...رجعت للمطبخ وروتين الحياة اليومي وهو اشي محبب الي بالرغم من انه الراحة كانت شعور لطبف ... اليوم حابة احكيلكم شوي عن طبق بسيط جدا ولكنه في ذاكرتي كطفلة كان من اكثر الاطباق المحببة لقلبي...سهل وبسيط وتكلفته بسيطة كمان...في عيلتي احنا بنسميه "رز وعدس" عند ناس تانيين يمكن اله اسم تاني...اصل الطبق فلسطيني واهل يافا واللد كانوا يعملوه كتيير...والدي كان يحبه كتيير وكان يطلبه من امه الله يرحمها وعلى حد قوله كان يقول عنه "رز وعلس" واظن اني انا طالعة لابوي...كنت احب هادا الطبق والي زمااااااااان ما اكلته..اليوم عملت صحن والاولاد حبوه كتير حتى هارون لانه ما بده مضغ وهو مثل الحراق اصبعة بالنسبة لسمك الخليط...امي قالتلي انه في الايام الخوالي لما كانت احوال الناس صعبة والعدس والارز هي مواد اساسية وثمنها رخيص للكتير من الناس...مناسب للشتاء كتيير وبيتاكل دافئ او بارد (زي ما بتحبوا)


ارز وعدس
المقادير:
1/2 1 كوب عدس اصفر
كوب ارز غير منقوع
ملعقة كبيرة كمون
1/2 1 لتر ماء (ممكن اضافة المزيد اذا احتاج الامر)
ملح
مكعب مرق دجاج (اختياري)
بصلة كبيرة مفرومة وسط الى  ناعم
1/4 كوب زيت زيتون
عصير ليمون للوجة ورشة سماق

الطريقة:
يوضع العدس والارز والكمون والماء في قدر عميق على النار وعندما يغلي تخفض الحرارة ويحرك من حين الى آخر لكي لا يلتصق بقاع القدر حتى ينضج العدس والارز نضيف الملح ومكعب المرق والماء اذا احتاج الامر
نحمي زيت الزيتون في مقلاة ونذبل البصلة بدون ان تأخذ لون ونسكب البصل والزيت الساخن فوقه مع الاحتفاظ ببعض البصل للوجه
نسكبها في صحن كبير او صحون فردية ونزينها بالبصل والسماق ويعصر عليها الليمون عند التقديم...

هي اكلتنا هادا الاسبوع من ايام زماااان...

صحتين



Comments

  1. ما في بعد الاكلات الشعبية والاكلات القديمة الي كلها فوائد وطعمتها بتجنننن

    ReplyDelete
  2. في ناس بسموها "جليمة".. وفي ناس بضيفوا عجين أو رشتاية عليها..
    شخصيا بحبها مع زيت زيتون وخبز وبصل عادي او اخضر وزيتون..
    خلدون البرغوثي

    ReplyDelete
    Replies
    1. شكرا للاضافة سيد خلدون ...اول مرة الصراحة بسمع بالتسمية..هل تعود لاهل منطقة معينة؟ وهي فعلا الذ اشي مع لبزيتون والبصل والفجل والجرجير وكل هالقصص اللذيذة جنب نوع الاكل هاد

      Delete

Post a Comment

Popular Posts