بعد شهر من البعد....كعكة اللوز الرائعة

آخر مرة كتبت فيها على المدونة كانت قبل شهر تقريبا...شكرا لكل اللي سالوا عني واستفقدوني واللي كانوا اروع من اخوات خلال الفترة الماضية ومن غير ما اخوض في التفاصيل هم عارفين حالهم وعارفين الظروف...انا مش بس محظوظة انكم بحياتي...انا متأكدة انه ربي راضي عني...الله يسعد قلوبكم ويجعل ايامكم كلها خير وحب وسعادة مع الناس اللي بتحبوهم...

ولاني مش حابة ابعد اكتر من هيك قررت انه لازم ارجع على الاقل للمدونة لانها المساحة الخاصة اللي بتخليني اتواصل معكم واشارككم حبي الكبير للمطبخ واي اشي اله علاقة بالبيت والاعمال اليدوية...

وقبل ما انسى كل عام وانتو بالف خير..بتمنى انكم قضيتوا عيد سعيد ومبارك ان شاء الله...العيد عنا كان مليان بالزيارات العائلية "الحمد لله" وبعض الطلعات العائلية على الفطور والغدا...وبالرغم من انه العيد ممكن يكون متعب للبعض منا الا انه كسر رائع لروتين الحياة اليومية وفرصة نشوف الاهل والاحباب وخاصة انه الكل يدوب يلحق هالايام على اموره الشخصية...بس كل الزيارات والعجقة خلتني احن لايام الجمعات واشعر اديش مهم هادا التجمع العائلي ووجود الناس بحياتنا...ما بعرف بالنسبة الكم كيف الامور بس انا في بيتي الامور عادة هادية كتير والتجمعات العائلية محدودة...عشان هيك مفكرة اكسر هادا الروتين واحاول اني الاقي الوقت ليصير فيه زيارات عائلية اكتر مثل ايام زمان...مش بس عشاني ...عشان الاولاد اللي هالايام فقدوا الشعور بالصلة للعائلة الممتدة ..اغلبهم بيفضلوا يروحوا عند اصحابهم او يقعدوا بالبيت ولما بتناقش بالموضوع مع اي حدا من الناس بيقولوا "ما هو الزمن تغير!!!" جد !!! من امتى صار انه الواحد يتعرف على افراد عيلته مش اشي "كوووول"..ارحموني مشان الله!!! بالنسبة الي يا رب يقدرني واقدر اكسر هادا القالب والمعتقد ببيتي...من احلى ذكرياتي هي الاوقات اللي كنت اقضيها مع اولاد خالاتي واخوالي وعمتي والجيران وحتى اصدقاء العيلة اللي كانوا جزء من العيلة بحكم العلاقة الوطيدة...يعني الزيارة العائلية كانت بتخص كل افراد العيلة مش بس ماما وبابا لحال...او البنت لحال او الولد لحال...الكل كان يجتمع والكبار يتسلوا والصغار كمان...حتى هالايام بحس انه الاولاد مش اجتماعيين ابدا...لما بيزورنا حدا ومعاه اولاد قدهم بيقعدوا كلهم على التلفزيون او كل واحد على موبايله!!! جد اشي محزن!!! ايامنا كنا نطلع نلعب البنات والاولاد مع بعض او البنات في غرفة ونبربر ونضحك ونلعبلنا لعبة شدة او مونوبولي...جد يا خسارة انهم فقدوا متعة الاحساس بهادي النكهة الخاصة للحياة اللي اعتقد انها السبب انهم ما بيقدروا قيمة اشي هادي الايام ولو راحوا على احلى مكان...الا تلاقي في نقطة انتقاد او حدا يقولك كلمة "ازهقت" لانه الاكس بوكس عم تستنى بالبيت وانه يلعب عليها اهم من انه يقضي الوقت مع عيلته!!! اشي مضحك مبكي صار بالعيد لما كنا على الغدا باحد المطاعم كان في طاولة عليها عيلة ما شاء الله عددها منيح...الكل وبدون استثناء كان على الموبايل!!!! طيب ليش نطلع مع بعض اذا كل واحد بده يقعد لحال؟!!!

ما علينا!!! بس ما في احلى من العيلة واللمة وما في اشي بيجمع العيلة اكتر من الاكل!!! صح!!! عشان هيك الاكل هو جزء مهم من ثقافة وحضارة الشعوب...حوليه بنضحك وبنشارك اللي بنحبهم لحظات وذكريات...بس بشرط الموبايلات مطفية!!!!!

الوصفة اللي حابة اشارككم فيها هي لكيكة عملتها قبل فترة وحطيت الصور على الفيسبوك...كيكة تفيض بطعم الزبدة الرائع...ان شاء الله تجربوها وتعجبكم

كعكة اللوز 
المقادير:
70 ملم حليب
ملعقة صغيرة عصير ليمون
75 غم زبدة
3 بيض
كوب سكر
2 ملغقة صغيرة فانيلا
كوب طحين
ملعقة صغيرة بيكنغ باودر
1/4 ملعقة صغيرة ملح
للوجه:
كوب لوز شرائح رفيعة
125 غم زبدة
3/4 كوب سكر بني فاتح
50 ملم حليب
1/2 ملعقة صغيرة ملح
ملعقة صغيرة فانيلا

الطريقة:
يدهن قالب التشيز كيك ويرش بالطحين وتلف جوانبة بورق الالمنيوم لضمان عدم خروج العجينة اثناء الخبز
يخلط الحليب بعصير الليمون ويترك 10 دقائق (ممكن استعمال لبن خاثر (اكتيفيا 75 ملم بدل الحليب والليمون)
يحمص اللوز بالفرن من 5-7 دقائق ليصبح ذهبي فاتح
تذاب زبدة الكيكة في طنجرة وتترك لتبرد قليلا
يخفق البيض والسكر والفانيلا مدة 5 دقائق (ليتضاعف حجمه ويصبح سميك القوام واصفر فاتح)
ينحل الطحين والبيكنغ باودر والملح
يوضع 1/3 الكمية فوق البيض وتحرك بملعقة مطاطية ثم 1/2 كمية الحليب وتكرر العملية بالتناوب بالانتهاء يالطحين
ننزل 1/2 كمية الزبدة المذابة ونحرك برفق للتخلص من اي فقاعات هواء ونضيف باقي الزبدة ونحرك
تسكبها في القالب ونضعها في فرن حامي 160 او 320ف  من 25-30 دقيقة
ونحضرالوجه في هذه الاثناء بوضع كل مقادير الوجه في طنجرة على النار وتحريكها بخفة لتذوب الزبدة وتغلي وتسمك قليلا
نرفع الكيكة من الفرن ونرفع الحرارة ل 200 لو 390ف ونسكب الوجه فوق الكيكة ونفرده ونعيدها للفرن لتخبز من 8-10 دقائق وتصبح اغمق باللون وتخرجها من الفرن
نتركها لتبرد قليلا وباستخدام السكين نحركها على جوانب القالب للتأكد من انه غير ملتصق
يفك القالب وتترك اتبرد على سلك معدني وتقدم بحرارة الغرفة وصحتين..




Comments

  1. كتير مبسوطه انك رجعتي وعنجد فقدناكي,,,كل عام وانتي بخير وكل عيلتك بخير يا رب
    بالنسبة للزيارات العائليه ما بقدر اوصفلك قديش انا متدايقه من الجيل الحالي ويمكن احنا السبب كأهل ,,,, اعطيناهم كل التكنولوجيا اللي لهتهم وبعدين بنلوم فيهم ازا ما كانو اجتماعيين,,بس شو الحل؟
    زوجي بقللي عقبال ما نبني بيت بالمزرعه ونهج هناك ونلغي كل التكنولوجيا في البيت ونقعد نربي ماعز وجاج :))) عندو ميول زراعيه الاخ
    الكيكه شكلها بشهي يا ريت لو انها قدامي هلأ
    يسلمو ايديكي

    ReplyDelete
  2. والله وانا اشتقتلكم كمان...معك حق بس المشكلة هي انه نلاقي التوازن والجيل الحالي بس بده التكنولوجيا...لحد الآن يبدو انه مهمتي صعبة...هههه...بس ان شاء الله اقدر...جربي الكيكة وان شاء الله تعجبك...والله يسعدك يا سمية.. :) مبسوطة انك صرت تعلقي...عقبال الباقي :) عشان ما احس حالي بحكي لحالي هون.... :)

    ReplyDelete
  3. ما شاء الله عليك

    ReplyDelete
    Replies
    1. وعندك حق ان ما في احلى من لمة العيلة سواء على طربيزة الاكل او حول صينية الشاي والكعك تحس بجو ما زيه جو ما يتعوض ربنا يخلي ليك عيلتك يا رب

      Delete
    2. شكرا جزيلا للمرور والتعليق والكلام اللطيف :)

      Delete
  4. يعطيكي اف عافية
    تعجز حروف اللغة عن التعبير
    وصفاات روووعة

    ReplyDelete

Post a Comment

Popular Posts