صينية البطاطا المخبوزة بالسبانخ

لما غنت صباح "عل بساطة البساطة..ياعيني عل البساطة...غديني جبنة وزيتون وعشيني بطاطا"!!! ما كذبت لانه البطاطا من اروع الخضار الموجودة بكل المواسم واكثرها توفرا وسعرها مناسب (ولو انه هالايام عم بتكون أغلى من ما لازم)..بس هي مفيدة وبتشبع ولذيذة ومحبوبة الجماهير من كبار وصغار وعدد الاطباق اللي ممكن تنعمل منها كبييييير جدا..يعني مش بس مسلوقة ومقلية ومشوية...حتى افخم المطاعم بتقدمها بطرق "او لا لا" عشان تعطيها الشكل الفخم وبتبطل عل البساطة!!! انا شخصيا الي علاقة خاصة مع البطاطا وحب وشغف كبيرين...بدوا من زمان بس اكثر ما بتذكر انه في اجازة الدراسة للتوجيهي (كانت امي معلمة) كنت اضل بالبيت لحالي لانه الكل بالشغل والمدرسة...ويجي على بالي بطاطا مقلية الصبح...ومش عارفة اركز...فاقوم واقلي 3 حبات بطاطا وبدون مبالغة آكلهم زي التوتو...ولما بدت الامتحانات...كانوا كل صاحباتي ضعفانين ووجوهم باين عليها الدراسة..الا انا!!! ما شاء الله وجهي مبطبط من كتر البطاطا اللي اكلتها بالعطلة !!!! والحمد لله اثمرت معي وجبت بالتسعين!!!!هههه يعني اللي عندها حدا توجيهي طعميه بطاطا...هههه مجربة!!!

اكلة البطاطا اليوم هي صينية مخبوزة بالفرن مع السبانخ والبصل والثوم والجبنة...كيف بالله!!!! اكيد اشي زاكي وصحن جانبي رائع...جربوه وما رح تندموا...

صينية البطاطا المخبوزة بالسبانخ
المقادير:
3 حبات بطاطا كبار مقشرين ومسلوقين بماء مملح ومهروسين
1/4 كوب زبدة
1/2 كوب حليب او ممكن كريما اذا حبيتيها ادسم
ملح وفلفل اسود
ملعقة طعام زيت زيتون
بصلة متوسطة مقطعة شرائح رفيعة
سن ثوم مهروس
6 اكواب - 8 من السبانخ الطازج المفروم
1/2 1 كوب جبنة شدر حادة او متوسطة الحدة

الطريقة:
تخلط البطاطا المهروسة الساخنة مع الزبدة والحليب
يوضع زيت الزيتون بمقلاة ويضاف البصل ويقلب ليصبح طري
يضاف الثوم والسبانخ ويطبخ ليقل حجمه وينشف ماؤه
ترص البصاطا بصحن البايركس
ثم طبقة السبانخ بالبصل
ثم الجبنة وتخبز على 175 من 20-30 دقيقة لتحمروتقدم ساخنة كصحن جانبي
وصحتين




Comments

  1. ههههه يا الله شو بحب اسلوبك :) بسيط وحلو زي البطاطا
    بس شو بالنسبه للنصاحه يا منال؟؟؟ يعني زبده وبطاطا والله كتير ,,,
    يسلمو هالايدين اكيد رح اجربها ولادي كتير بحبو البطاطا

    ReplyDelete
  2. شكرا سمية على التشجيع المستمر :) وجربيها وبعدين رياضة...هههه

    ReplyDelete
  3. looks yummy I will try it soon thanks manal

    ReplyDelete
  4. looks yummy I will try it soon thanks manal

    ReplyDelete
  5. Thanks for stopping by..please do and let us know how it turns out...happy cooking!!!

    ReplyDelete
  6. يسلموا ايديكي
    بحب افكارك الابداعية
    الي من حبة بطاطا او بيتنجان بتعملي فيهم الف اكلة وكلهم زااااكين
    يسلموا كتيييير

    ReplyDelete

Post a Comment

Popular Posts