الحمص بالبندورة المجففة

اول خميس من فترة بطلع بزور صاحبة الي مع الاولاد...جد نسيت اديش انه الواحد ممكن يقضي وقت حلو مع الناس واديش الاولاد بينبسطوا...شكرا كتييير سماح على استضافتنا امبارح....سلطان كتيييير انبسط وهارون وانا كمان :) وكعكة البلوبري بالستروسل كتيييير زاكية...بحب انك تصوري قطعة وتعطينا الطريقة كوصفة لضيفة وطاهية ماهرة على المدونة :)

وعلى صعيد البيت فحالة التنظيم والترتيب البطيء والتدريجي جدا ماشية بشكل جيد...هدفي هو التخلص من كل ما لا يلزم وما اكثر الكراكيب!!! اللي خلص لهلأ خزانتي وكومودينتي والدرسر الكبير من غرفتي وخزانة الحمام الرئيسي و3/4 غرفة الخزين و 1/2 مكتبي....مفرقين صح بس حسب وين عم بقضي الوقت...يعني برتب شوي بالمكتب وانا قاعدة على الانترنت وهيك.. عادة بعمل هاي العملية بس ما بتخلص من الاشياء اللي مو لازمة لانه دايما بفكر يمكن يجي يوم واحتاجها وبتمرق ايام وشهور وما بتطلع عليها...المرة هاي قررت انه لأ...اذا ما استعملت لفترة اما على التفريق او الكب حسب حالتها...

طبعا امبارح الجمعة اعطيت حالي اجازة من الموضوع هاد...اما اليوم فالنية استكمال العمل على المكتب وناوية اشارككم وصفة الحمص بالبندورة المجففة..بشبه طعم الحمص العادي بس لونه على احمر شوي وفيه شوية حداقة على حلاوة من البندورة المجففة ونوع من التغيير...


الحمص بالبندورة المجففة

المقادير:
2 كوب حمص مسلوق (انا بحب اجيب جاف واسلقه بالبيت احسن وابرك بكتير واوفر وطبعا صحي اكثر وبحطه باكياس وبالفريزر مع شوية من ماء السلق)
عصير ليمون حسب الرغبة
سن ثوم مدقوق
3 ملاعق كبيرة طحينة (ممكن اكثر للي بحب)
ملح
10-12 حبة بندورة مجففة منقوعة بماء ساخن ل 1/2 ساعة ومفرومة او ممكن استخدام النوع المكبوس بالزيت (بدون نقع حوالي 3 ملاعق طبيرة مفرومة)
زيت زيتون للوجة

الطريقة:
تطحن كل المقادير بالخلاط او محضرة الطعام لتتجانس وتصبح ناعمة (انا قشرت الحمص للحصول على قوام انعم بس ممكن ما تقشريه)
استعملي ماء السلق للمساعدة في الطحن والحصول على القوام المرغوب وصحتين



Comments

  1. منال من وين بتجيبي البندوره المجففه؟ انا اللي عندي جبتها من كوزمو كانت اشي انتاج محلي بس للأسف الطعم ما كان منيح بالمره

    ReplyDelete
  2. سمية انا عادة بعمل بالبيت لما تكون البندورة بسعر مناسب بس اختاري انواع إيطالية بتلاقي بكارفور وسلكت وكوزمو والسيفوي

    ReplyDelete
  3. مرحبا ...اولا شكرا كتير الك على الوصفات الرائعة. ..يسلمو ايديك...ممكن اعرف كيف بتجففي البندورة. ....شكرا لك

    ReplyDelete
  4. فنانة و مبدعة ممكن طريقة تجفيف البندورة

    ReplyDelete
    Replies
    1. حاضر...قريبا ان شاء الله استنوني :)

      Delete
  5. مرحبا يا عسل لو سمحتي انا بعمل الحمص زي طريقتك بس ليه حمص الي برا بالمطاعم بكون على بياض وملمسو انعم في ماده معينه تستخدم عشان بطلع الحمص على بياض ﻭﻳﺴﻠﻤﻮ

    ReplyDelete
    Replies
    1. صح والسبب ممكن يكون اكتر من اشي...ممكن طبخ الحمص منيح (يعني ينسلق كتير منيح ) وكمان يتقشر زي ما حكيت في الطريقة بس انا ما بظن بالمطاعم فاضيين يقشروا فاعتقد انه السبب الارجح شغلتين (آلات الطحن واللي بتكون قوية اكتر ممكن من الخلاط البيتي) وممكن استخدام مادة الالي (اللي بتستخدم في التسقية ..واعتقد انه هاد هو السبب الارجح وممكن تلاقيها عند العطار وبتنطحن مع الحمص وميته والليمون والملح والطحينة والثوم اذا حبيتي)..انا مرات بحط شوية لبن كمان

      Delete
  6. يسلمو يا عسل انا با امريكا عايشه لا في عطارين بس انزل على الاردن والله انك بتفوتي على القلب هيك لانو الي ربنى بحبو بحبب فيه الناس ان شاء الله مزيد من التقدم

    ReplyDelete
  7. يسلمواا ايديكي
    الحمص زاكي بكل اشكاله
    وهي وصفة حلوة ومميزة وجديدة للحمص :)

    ReplyDelete
  8. فعلا وصفاتك رائعه انا من متابعيين كثير ناس بس زيك ما في لانه ةصفاتك سهله واللي بيساعد وجود المدونه

    ReplyDelete

Post a Comment

Popular Posts