شوربة الجزر والبرتقال

قربت السنة تخلص...واجى الوقت اللي عادة ما الناس بتبدا تفكر بشو بدها تغير بحالها للسنة الجديدة...بتذكر هادا الموضوع طرحته في بداية السنة واديش انا سعيدة اني لساتني بتواصل معكم من خلال المدونة طول هالوقت ...معكم بكون انا بدون اي تحفظات او شكليات...بتواصل معكم وانا بالبيجامة ...عفوا مرات وشعري مش مرتب (منكوش يعني) وما بشعر باي حرج...شكرا لكل متابعتكم وبتمنى نستمر اكثر واكتر...ان شاء الله..

اما عن مشاريعي او الحلول او التغييرات اللي بتمنى اعملها في ال 2014 فهي وببساطة "بتمنى اني اكون اقل قساوة على نفسي واني اترك حالي ارتاح من حين الى آخر" للاسف انا من الناس اللي كتييييير بضغط حالي واحيانا...احم اذا مش غالبا..على امور ما بستاهل واللي بيزيد من عصبيتي يوم بعد يوم..رح تقولوا التعليق اللي كتييير بعلقوه...: "انت عصبية؟ معقول؟! شكلك هادية كتييير" الظاهر للاسف وبالآخر التأثيرات النهائية بتكون على حالي!!! اعتراف صريح فبل نهاية ال 2013 وبتمنى اني اقدر اغير هادا الاشي واقلل من التوقعات من حالي عشان ارتاح واريح اللي حوليي...ادعولي...وانتوا شو تمنياتكم او توقعاتكم من حالكم للسنة الجاي؟ علقوا عشان تحسسوني اني ما ببربر لحالي هون!!!ههههههه
بتمنالكم سنة جديدة سعيدة ومليانة بالفرح والحب والامان والصحة وراحة البال...آمين

ومع هالاجواء الشتوية شوربة العدس هي ملكة الشوربات بس انا اول امبارح عملت شوربة الجزر والبرتقال واللي بنصحكم تجربوها لانها بتدفي وما تزعلوا كتير فيها شوية عدس...

شوربة الجزر والبرتقال
المقادير:
3 ملاعق طعام زيت زيتون
بصلة متوسطة مفرومة ناعم
2 سن ثوم مفروم ناعم
قطعة زنجبيل مبشورة
بشر ليمونة
5 جزرات كبيرة مقطعة
1/4 كوب عدس مجروش
4 اكواب مرق دجاج
ملعقة طعام عسل
1/2 كوب عصير برتقال
ملح، فلفل اسود
كزبرة مفرومة للوجة

الطريقة:
يوضع زيت الزيتون في قدر
يضاف البصل وتقلب لتصبح شفافة
يضاف الثوم والزنجبيل المبشور وتقلب دقيقة
يضاف بشر الليمون والجزر والعسل والعدس وتقلب دقيقتين
يضاف المرق وعصير البرتقال والملح والفلفل الاسودتترك لتغلي وتخفض النار ليستوي الجزر والعدس
تطحن بالخلاط او الخلاط اليدوي لتصبح ناعمة القوام
تزين بالكزبرة وتقدم...
تدفئ القلب والروح..
صحتين





Comments

  1. جوزي بطير عقلو بالشوربات ,,,اكيد رح اجربها
    بالنسبة للسنه الجديدة اكيد في ليستة طويلة عريضه,,,لسا عم بحكي بنفس الموضوع عا مدونتي,,,,بدي اضب مصاري هاي السنة مشاااان الله ليش كتير صعب الواحد يضب مصاري؟؟ هههه
    لازم اتعلم اشي جديد هي السنة وكتير حابة ادخل مجال العمل التطوعي,,,كتير مقصرين من هاي الناحيه.
    يسلمو عالموضوع منال,,,دايمن بوستاتك مفيدة

    ReplyDelete
  2. دايما التوفير مش سهل...Good luck كلنا بدنا نوفر وان شاء الله نقدر...وشكرا سمية دايما على المتابعة...مع حبي

    ReplyDelete
  3. منوووول....لو ما بعلق..بس دايما بستنى كل شي بتنزليه عالمدونة على نااار...وبحب اقرأها بالليل..وقت بريكي بس ينامو اولادي الاشرار...هههههه...
    حكيك عالوجع..لاني من الناس الي كتيير باجي عحالي وبعصب..ولازم اغير بحالي...وتكون اولويتي نفسي...طبعا مستحيل..هههععع....

    ReplyDelete
  4. اهم شي نكون بصحة وعافية نحنا واحبابنا....وان شاءالله بتضلك تكتبي وتفيديناوتبسطي قلبنا ؛)*

    ReplyDelete
  5. حبيبتي اريج...والله نورت المدونة ودايما علقي ...كتييير انبسطت وجد لازم نحاول نتغير...بدها علاج نفسي فكرك؟!!!! هههههه

    ReplyDelete
  6. حبيبتي منووول...انا حاسة هيك...خاصة بعد عطلة الولاد الطويييلة صار بدها علاج رسمي..هههههه

    ReplyDelete
  7. ان شاء اللة بتكون سنة سعيدة على الجميع
    وهاي العصبية مشكلة العصر
    اوقات من كتر ضغط الاشياء المطلوبة منا بنحس حالنا رح ننفجر بس بالنهاية لازم نعود حالنا على تطويل البال ونعد للعشرة قبل ما نعصب

    ReplyDelete
  8. والله الواحد صار صعب يسيطر ع ع اعصابو ويتحكم فيها مو عارفة ليه هيك والكل بتلاقي هيك بس يبدو انو التكنولوجيا الها دور كبير في هالقصة ،المهم انو نضبط حالنا ع الاقل مانعصب ونضغط حالنا ع اي شي لانو في امور بنتعب فيها حالنا وهم بكونو ولا عبالهم

    ReplyDelete

Post a Comment

Popular Posts