العودة للاساسيات: صوص البندورة الايطالي

نمنا امبارح وما كان فيه اي بوادر للثلج...واليوم الصبح سمعت صوت السيارات بتمشي بالشارع فقلت والله شكلة المنخفض فلسع ولا ثلج ولا ما يحزنون...ولما رحت على غرفة القعدة ولا الدنيا كابسة ولابسة ابيض بابيض...ما شاء الله والله يعين اللي بردان ويبعتله الفرج...
شو مخططاتكم اليوم؟ طبعا متأكدة انه اللعب بالثلج واحدة منها... مش عارفة اذا رح اخلي هارون يلعب..مرشح شوي بس بعرف انه رح يطير عقله...الساعة 9:20 وسلطان لبس كل العدة من هلأ مع انه خالد لسة ما صحي...

اما على صعيد المطبخ...مش عارفة...مكسلة شوي اليوم...بس للغدا في عندي بواقي والفطور كان فطاير الشواية (اذا لاحظتوا اني تركت البوست عدة ساعات ورجعت اكمل)



المهم خلينا اليوم نحكي شوي عم العودة للاساسيات...ووصفة صوص البندورة الايطالية واللي ممكن تعمليها بكميات كبيرة وتحطي منها بالفريزر وتستعمليها للاسباجيتي واللازانيا والبيتزا اذا حبيتي...بس بتضيفي الخضار او اللحم المفروم حسب الوصفة اللي بدك تحضريها...جربوها واهم اشي تعطوها وقت بالطبخ..

صوص البندورة الاساسية
المقادير:
2 ملعقة طعام زيت زيتون
1 ملعقة طعام زيت نباتي
بصلة متوسطة مفرومة ناعم
2 اصبع كرفس مفروم ناعم
3 حبة ثوم مهروس
رشة ملح
ملعقة طعام سكر
رشة فلفل احمر (اختياري)
1/2 1 ملعقة طعام اعشاب ايطالية او زعتر وبيزل
ملعقة طعام خل ابيض
ملعقة طعام رب بندورة
ورقة غار
4 علب بندورة مهروسة باليد او بالخلاط حسب درجة رغبتك بشكل الصوص النهائي
2 ملعقة طعام بقدونس مفروم
كوب - كوب ونصف ماء

الطريقة:
نضع الزيت بنوعيه في قدر كبير على النار (متوسطة )
نضع البصل والكرفس ونقلب 5 دقائق ليصبح طري (الوقت مهم لانة بدنا الحلاوة تطلع من الخضار)


نضيف الثوم ونقلب دقيقة
نضيف الملح والسكر والفلفل الاحمر والاعشاب والخل ورب البندورة

تقلب دقيقتين ثم تضاف البندورة والبقدونس وورقة الغار و1/2 كوب ماء ونضيف القليل من الملح وتترك لتغلي ثم تخفض الحرارة الى منخفضة وتترك لتتسبك مدة ساعة بدون غطاء مع التقليب من حين لآخر واضافة الماء اذا احتاج الامر

الصوص رح تكون سميكة وطعم مركز وبتسوى كل الجاهز


انا قلبت اللحم المفروم مع بصل وملح وفلفل اسود وضفتة للصوص للاسباجيتي وصحتين
ملاحظة: ما تنسوا تقيموا ورقة الغار قبل التقديم



Comments

  1. يا سلاااااام وصلت الريحه لعندي :)
    يسلمو هالديات

    ReplyDelete
  2. روووعة
    يسلموا ايديكي
    كتيير بحب هاي الصوصات وخصوصا المحضرة بالبيت

    ReplyDelete
  3. يسلمو ايديكي منال انا دايما بعملها وبستخدمها لكل شي بس مابحط فيها بصل بكتفي بالتوم

    ReplyDelete
  4. يسلمواا ايديكي ممكن نعرف قديش بتضلها صالحة بالفريزر؟

    ReplyDelete
  5. اهلًا ميمونة من ٨- ١٠ أشهر وممكن سنه اذا مغلق الكبي بأحكام

    ReplyDelete
  6. حبيبتي منال لو سمحتي بدي اسالك لو علب البندوره مو متوفرين شو بديلهم وهل بكون نفس الخليط الناتج

    ReplyDelete
  7. اهلًا منار، البديل بندورة حمراء مقشرة وبدل العلبة ٤ حبات وسط وبدها وقت اطول شوي بالطبخ

    ReplyDelete

Post a Comment

Popular Posts