منيو الاسبوع القادم وبروسكاتا للعشاء

انا من الناس اللي ممكن يقعدوا بالبيت 5 ايام واكثر وما بزهقوا وما عندي مشاكل...بالعكس الثلج حجة ممتازة اني ما اطلع بس المشكلة مش هون...المشكلة شو ممكن تعملي لتسلي ولد عمره سنة و5 شهور طول النهار...؟!!! صدقوني ما ضل اشي الا عملناه...ركض وبالدراجة والعاب انواع واشكال وبلالين صابون وبلالين عادية ومعجون...وعيد يا سعيد...قصدي يا منال.....أخخخخ ...حزنت عليه امبارح..اله يومين ما طلع من البيت (لانه مرشح ومش ناقصني يمرض بزيادة) فنعم ما لعب بالثلج وانا متأكدة انه لو بدا يلعب ما بيدخل على البيت بس الجو بدا يبرد بزيادة من الظهر والهوا اشتغل...فمش مستعدة للعواقب بصراحة!! واللي زعلني عليه بزيادة انه الكبار واللي ممكن يعملوت كتير اشياء من النترنت للتلفزيون لللعب بالثلج والاعاب التانية زهقوا، شو يحكي هو!!!

اما ياسمين وسلطان فبعد ما لعبوا بالثلج واتجمدوا (الصبح وكان الوضع لسة يعتبر دافي بالنسبة للانعكاسة اللي صارت بالطقس بعد الظهر) المهم انهم راحوا مع عمتهم على تاج مول وبالرجعة علقوا عند الدوار الرابع 3 ساعات (بدون مبالغة) والحمدلله الله ستر وصلوا وناموا عند عمتهم...وبالتالي صار هارون بده تسلية اكثر لانه الاولاد مش بالبيت...الوضع كان زينون!!! قلتلكم اني ما بحب الثلج..صح؟!!! يمكن عشرين مرة بس!!!!

والحمدلله اني مش من محبي التلفزيون...كان انجنيت بزيادة لانه كل شوي اطلع ونظف الستالايت وبعد شوي بقطع الارسال...مسكينة امي اليوم نظفت هي (الله يقويها) الستالايت والجماعة بالصلاة ونظفت للجيران كمان :) (هي مثال على انه الواحد يعمل اشي حلو ومش متوقعينه الناس التانيين وخاصة انه الجيران زلمة وست كبار بالسن وما عندهم حد)...برافو ماما!!!

انا عم بكتب البوست والساعة 11:30 ليلا وعم بتطلع من الشباك على العاصفة الثلجية المستمرة....الله يعطي كل حد محتاج الدفا ويعطي كل ايد وكل شخص ساهم بمساعدة الناس اليوم الف الف عافية...بغض النظر عن التهكمات اللي قرأتها على الفيسبوك بس كتر خيرهم..كل القوات المسلحة وحسب الاخبار عم تشتغل والثلج ما وقف الا شوي...يعني كتر خيرهم...

نرجع للي بفهم فيه...الاكل...هههه ...موعدنا اليوم منيو جديدة للاسبوع الجاي وبالنسبة للاسبوع الماضي فعملت كل اللي على القائمة ما عدا الدجاج المحشي وشوربة الفريكة وشوربة الفاصوليا البيضاء والسلطة الروسية وبالمقابل عملت ملوخية ووصفة بروسكاتا للعشاء عجبت الجميع وخاصة السيد سلطان (معلش لانه اكثر واحد ما بيعجبوا العجب)...منيو الاسبوع الجاي بتلاقوها على قائمة الطعام 4

اما وصفة اليوم في ممتازة للعشا...بروسكاتا بالبندورة والمايونيز...



بروسكاتا البندورة والمايونيز
المقادير:
رغيف خبز فرنسي مقطع شرائح
1/2 كوب مايونيز
1/4 كوب بارمزان
2 حبة بندورة مزالة البذر والعصير ومفرومة
ملح، فلفل اسود
رشة بيزل ناشف وزعتر
حبة ثوم مهروس
جبنة موزريلا للوجة

الطريقة:
تخلط كل المقادير ما عدا البندورة والموزريلا
تدهن شرائح الخبز بالخليط
توزع البندورة على الخبز
ترش بالجبنة
تخبز بالفرن من 12-15 دقيقة وتقدم مع كاسة شاي :)



Comments

  1. يسلمووا ايدكي كتتير
    انا بصراحة بحب هاي الاكلات الصغيرة والسهلة
    مع اوقات بلاقي صعوبة باسمها ههههه
    بس بحسها حلوة كتتيبر باجتماعات العائلة على العشا

    ReplyDelete
  2. هههههههه مااحلى اجواء التلج ان شاءالله بتنعاد هالسنة وبنضل نتزكر فيها ،يسلمو ايديكي ع الاشي الزيز

    ReplyDelete

Post a Comment

Popular Posts