صينية البطاطا باللحم المفروم والبشاميل

الي يومين بموود التنظيف بس مش تنظيف البيت (مش معناته اني ما بنظف البيت واللي بيقرأ المدونة باستمرار ادرى!!!) بس تنظيف المساحات الاكترونية...شو يعني؟!!! الايميلات (عندي 2) والاي فون والكومبيوتر.......شعور رائع...تحشيش كيف صرنا...يعني كأنه كان ما بيكفي تنظيف البيت والسيارة...هلأ زاد عليهم تنظيف المساحات الاكترونية!!!! جد ابصر بكرة شو رح نزيد على حالنا شغل؟!!!

المهم...كيف هالطقس معكم؟!!! كتير حلو ؟ ولا انتو زيي بتحبوا الصيف؟!! انا موضوع اللبس التقيل والشعور بتني مربطة نسبيا بالشتاء بضليقني شوي يس اكيد بدنا شتا والحمد لله...

امبارح قضيت يوم حافل بالمطبخ بحضر لصور مجلة نكهات عائلية لموضوع شهر 2 من السنة الجاي ان شاء الله...المجلة كتير منظمة بهاد الموضوع ولازم المقالات تتسلم قبل شهرين مع الصور...تابعوني لانه بكل مقال من المجلة (العربي والانجليزي) فيه نمط حفلة معين وكيف تنظميها من الالف الى الياء...طبعا بالاضافة الى المعلومات والمقالات التانية الرائعة والممتازة...

وعشان هيك كان لازم اعمل غدا سهل وسريع...غدانا كانت فكرته مستوحاه من فطيرة الراعي (صينية البطاطا المهروسة واللحم) مع تغييرات بسيطة عشان ما تكون ناشفة وهي الطريقة:

صينية البطاطا باللحم والبشاميل
المقادير:
1/4 كيلو لحم مفروم ناعم
بصلة متوسطة مفرومة ناعم
علبة ذرة صغيرة مصفاة
ملح
فلفل اسود
رشة من كل من (بهار، قرفة، كزبرة ناشفة)
ملعقة طعام زيت
4 حبات بطاطا وسط مسلوقة بماء مملح ومهروسة ومرشوشة بالفلفل الاسود
لصوص البشاميل السميك:
3 ملاعق طعام زبدة
4 ملاعق طعام مليانة طحين
3 كوب حليب
ملح، فلفل اسود (ما بحب الابيض)
رشة جوزة الطيب
1/4 ملعقة صغيرة بودرة الثوم
1/4 كوب طريما سائلة او قشطة
 كوب جبنة موزريلا مبشورة

الطريقة:
يحمر اللحم المفروم والبصلة بالزيت لينضج وتضاف الذرة والبهارات ويوضع في قاع صحن بايركس


تكور البطاطا وترتب فوق اللحم (معلش مش كتير مرتبين بس تعبت شوي بالآخر)


يحضر البشاميل بتسييح الزبدة وتقليب الطحين ليتحمص فليلا ثم الحليب مع التحريك المسنمر والملح والفلفل وبقية المكونات ليسمك المزيج ويغلي ويضاف فوق البطاطا





تضاف الجبنة على الوجة


تخبز على حرارة 180 من 25-30 دقيقة ليحمر سطحها قليلا وتزين بالبقدونس المفروم



كنت بمووود التصوير :)


Comments

  1. تسلم ايديكي....

    ReplyDelete
  2. انا دايما بعملها بس بدون بشاميل اليوم عملت الازانيا علی طريفتك وان شاء الله الاسبوع الجاي بعمل وصفة صينية البطاطا بالباشاميل

    ReplyDelete
  3. يمييييي بتشهي منال يسلمو كتيير

    ReplyDelete
  4. ممكن سؤال؟؟
    بصير نمد البطاطا مد ولا لازم كرات؟؟

    ReplyDelete

Post a Comment

Popular Posts