سلطة الاجاص الشتوية

خلوني اليوم ابدا اقولكم انه هدفي من هالمدونة هو اني اشرككم تجاربي...وبدي اياكم تعرفوا اني ما انولدت هيك!!!! هههههه قصدي من ناحية التنظيم والتوفير والطبخ..الخ الخ الخ...هادا الاشي هو ثمرة شغل سنين واخطاء كتير ولغاية الآن في اوقات بكون في قمة الفوضى والكسل والعشوائية...عشان هيك في امل يا جماعة!!!! يعني خطوات بسيطة و"حبة حبة يا علام" بتصير الامور احسن...شغفي بالتنظيم اجا بحكم الحاجة لاني كنت اشتغل ساعات طويلة واذا ما نظمت الامور بتتدهور تماما...لا في اكل بالبيت ولا غسيل او كوي او حتى دراسة...وانا متأكدة انه في كتييير منكم يتفوقوا علي بالتنظيم والترتيب...بس يا ريت يشاركونا افكارهم هون على المدونة عشان كلنا نستفيد...بتمنى جد انه الزائرين للمدونة وغير المشتركين انهم يسجلوا ويعلقوا ويجادلوني كمان...لانه هاي هي الفكرة :) بشكركم كتييير للمتابعة المستمرة...كلماتكم واللايكات على الفيسبوك هي اللي بتخليني امشي لقدام :)

الجو رجع بارد من اول وجديد...وطبخة الملفوف كانت سيدة الموقف امبارح...كيف بتطبخوا الملفوف؟ الي فترة (حوالي 8 سنين) بحط شبت بالحشوة (زي الطريقة المصرية) زاكية كتير...نصيحتي جربوا شوي بطنجرة صغيرة ويمكن تتحولوا تماما (زيي) لاستخدام الشبت بالحشوة...بتعطي طعم رائع...

بالنسبة لقائمة الطعام لهاد الاسبوع فبتلاقوها على قائمة الطعام 6 مش نشاط عالي بس برضه في اشياء جديدة رح تكون على المدونة ومنها سلطة الانجاص الشتوية اللي رح اشارككم فيها اليوم....واللي استوحيتها من انجاص احمر بيشهي شكلا وطعما من كارفور (الكيلو ب 99 قرش ) :) اكيد شئ يشعرني بالسعادة...زاكي وسعره معقول!!!



سلطة الاجاص الشتوية
المقادير:
6-7 اوراق خس مغسولة ومنشفة ومقطعة
3 اوراق ملفوف مفروم شرائح رفيعة
2 حبة اجاص نوع يابس وبقرش مفروم شرائح رفيعة او مكعبات
حب رمان مفروطة (1/4 كوب زينة للوجة والباقي يعصر للصوص)
1/2 كوب جوز مفروم خشن
بصلة خضراء مقطعة شرائح
3/4 كوب جبنة فتة (يفضل نوع حاد الطعم ليظهر طعم الانجاص)
للصوص:
1/4 كوب عصير رمان (من الرمان المفروط يعصر ويستخرج العصير)
ملعقة طعام خل تفاح او عصير ليمون
ملعقة طعام ماسترد
2 ملعقة طعام عسل
1/2 كوب زيت زيتون
ملح وفلفل اسود

الطريقة:
تخلط مكونات الصوص في زجاجة
يخلط الخس والملفوف
توزع قطع الاجاص والجوز والجبنة والبصلة الخضراء والرمان
تضاف الصوص حسب الرغبة


Comments

  1. ياسلام عليكي يامنال والله اضافاتك رائعة يعني الانجاص اوقات بيكون حامض وفعلا لو نحط بسلطة بطلع طيب كتير افكار رائعة وخيارات كتير مميزة تسلم ايدك

    ReplyDelete
  2. انا كنت استغرب استعمال الفواكه بالسلطات لحتى دقت سلطة التفاح والجوز وفي اشي كمان معهم بس نسيتو
    ووقتها ما بنساااه
    طعم رائع جدا
    واكيد هي الوصفة مميزة الانجاصمع باقي المكونات بيعطي طعم ممميز جدا

    ReplyDelete
  3. فمن الممكن للحفاظ على محصول وفير من التفاح والكمثرى لاستخدامها خلال أشهر الشتاء. تحتاج فقط إلى اتباع بعض الإرشادات البسيطة.

    ReplyDelete

Post a Comment

Popular Posts