بلوبري مفن بغمضة عين..من خليط الكيك

جمعة مباركة الكم جميعا....بتمنى تقضوا عطلة سعيدة وانا متأكدة انه اغلب الامهات في قمة السعادة لانه يوم الاحد مدرسة!!! عطلة شتوية طويلة جد خاصة مع تعطيل ال 10 ايام ثلج اللي قبلها..

مع انه لسة الدنيا برد بس انا بشوق كبير للربيع ولكل اشي معه...الدفا وزخات المطر المنعشة (ان شاء الله تشتي) والخضرة بكل مكان والزهور...كل شي..
الربيع موسم التجدد مش بس للارض والشجر والنا احنا كمان...نغسل قلوبنا ونصفي النوايا...وعلى صعيد البيت..الربيع ببيتي هو اعلان لحالة من التجدد ...نيتي ان شاء الله هاي السنة اني اتخلص من المزيد من الكراكيب اللي ما الها معنى واللي كومناها على مدار السنة الماضية وما اكترها...واهمها الملابس ..هاد برضه من اهدافي ال 101...
لما سافرت على كندا قبل فترة بسيطة كانت الدنيا برد كتير يوم ما وصلنا تورونتو...حوالي -36..جد ما بمزح!! برد قارص...فشناتينا ما وصلوا وقالولنا بيجوا بعد يومين..الحمد لله انه كان معنا غيار بالشناتي اللي بالايد...واللي بيضحك انه الشناتي لما وصلت (وبعد 4 ايام مش يومين) اندمنا انا وخالد انه حطينا فيها اشي لانة الغيار اللي جبنا مع اللي كنا لابسينه وبوجود الغسالة كان كافي جدا خاصة انه احنا مش رايحين نحضر مناسبة او نشوف ناس..وبالتالي اقل كمية ملابس كانت كافية...هاد الاشي هو اللي خلاني اقرر اني اتبرع باكبر قدر من الملابس اللي ما عم بلبسها حاليا..جد...وانا متأكدة مع وجود خيارات اقل رح اقدر اني انقي لبس اسرع لكل يوم..

المهم وعلى سيرة التجدد والتجديد...فطور اليوم هو بلوبري مفن....وصفة البلوبري مفن اللي رح اشارككم اياها اليوم جديدة ولذيذة وبتنعمل من خليط الكيك الجاهز...البلوبري مش رخيص (انا جبته مفرز) وفي طازج وغالي الحقيقة بس ممكن تستعملي فراولة اذا حبيتي تبدلي باشي سعره معقول اكتر...

معلومة على الماشي لعمل المفن بشكل عام
مهم اني احكي عن عمل المفن بشكل عام وانه السر للمفن الرطب والطري هو طريقة خلط المواد وخاصة اذا عندك وصفة مش من خليط الكيك...مهم خلط المواد الجافة مع بعض لحال وخلط المواد السائلة منيح مع بعض بعدين بتخلطيهم سوا بمعلقة خشب او مطاطية ومعلش لو ضل كباتيل (السر عدم زيادة الخلط للحصول على مفن طري)...


بلوبري مفن بخليط الكيك
المقادير:
1/2 1 كوب بلوبري
باكيت كيك مكس ابيض او اصفر
باكيت بودينغ فانيلا (من نوع جلو) موجود بكل السوبرماركتات  عند الجلو
4 بيض
1/2 كوب زيت
3/4 كوب حليب
2 ملعقة صغيرة فانيلا
برش ليمونة
للوجة (اختياري...يعني ممكن مت تحطوه هاي الطبقة)
1/2 كوب طحين
ملعقة صغيرة فانيلا
1/4 كوب سكر بنب
2 ملعقة طعام زبدة مذابة
1/4 كوب جوز مفروم
الطريقة:
في حال استخدام الوجة تفرك المقادير معا لتصبح مثل الفتات
تحلط المواد السائلة معا وتخفق جيدا
تضاف المواد الجافة للسائلة وتحرك لتختلط فقط (مثل الملاحظة اعلاه)
توزع على صينية المفن المبطنة بورق (تملأ 3/4)
توزع كمية الوجة على كل حبة
توضع في فرن حامي على 350 ف او 175 مئوي لتجتاز اختبار الكيك (حوالي 12 -15 دقيقة)
تترك لتبرد على سلك معدني..
صحتين...




Comments

  1. يا سلااام شو بحب المفن !! يسلمو ايديكي
    بالنسبة للتنظيم والترتيب فا الحمد لله عملت الواجب في هاي العطلة ورتبت المطبخ والبيت كلو (شعور انو رح اداوم وما بقدر اعزل غير بالعطلة مرات بكون منيح لانو بيجبرني اني انظف ) عملت شوية افكار تنظيمية للخزاين اللي بالمطبخ رح احطهم عالمدونة قريباً
    بدي اسألك منال,,,من وين لقيتي بلوبيري مجمد؟؟ في وصفة خبز حابة اعملها وما عم بلاقي بلوبيري,,دورت بكارفور وكوزمو ما لقيت :( ضل مايلز وسبينيز ومو عارفة وين ممكن الاقيه

    ReplyDelete
  2. جربي select بالدوار السابع قريب من الملكية

    ReplyDelete
    Replies
    1. شكرا على التعاون والمتابعة والرد...:)

      Delete
  3. اهلا سمية...ويعطيكي العافية...Selectبالدوار السابع بتدخلي الدخلة اللي بدها توديكي على الملكبة...هي اللينك على الفيس بوك...https://www.facebook.com/SelectFoodsShoppe?fref=ts

    ReplyDelete
  4. منال بدي أسألك إيش الورق اللي حطيتيه بالصينيةwax paper وﻻ شو؟

    ReplyDelete
  5. اهلا رولا...نورت الصفحة... الورق هو واكس بس نوع فالكون ممتاز...لانه في نوع اسمه دايموند بيدخن بالفرن...ما بدك اياه :) واهلا وسهلا والف صحة وهنا...

    ReplyDelete
  6. شكرا كتير أنا كتير معجبة فيكي و باسلوبك السهل الممتنع،you really inspired meخصوصا بمواضيع التنظيم و الترتيب.
    يعطيكي ألف عافية

    ReplyDelete
  7. الله يخليكي كلك زوق وبتمنى الكل يستفيد :) مغ حبي

    ReplyDelete
  8. يسلمو ايديكي منال

    ReplyDelete
  9. ولا اسهل من الوصفات الجاهزة
    اوقات الواحد بكون زهقان انو يشتغل بايدو ويعمل ويحضر فمو غلط يستعمل الوصفات الجاهزة

    ReplyDelete

Post a Comment

Popular Posts