عيد الام وكعكة شيفون الليمون وطريقة عمل طحين الكيك بالبيت

بتذكر لما كنت صغيرة.كان عيد الام يوم حلو وخفيف وكنا نعمل فيه لامي كرت بسيط سواءا بالمدرسة او بالبيت...اول هدية هديتها لامي بعيد الام كانت قلم حومرة..روج...lipstick اللي بدكم تسموه...وكنت بصف خامس وكان مصروفي 5 قروش وحق القلم دينار...يعني 20 يوم حرمان من المصروف عشان احوش حقه وكنت بقمة السعادة لما روحنا انا وماما ونقت اللون اللي بدها اياه (كان احمر على برتقالي) والعلبة خضراء من برة...الاسم او النوع..والله ما بتذكر بس بتذكر اني كنت ابتسم ابتسامة عريضة كل ما اشوفها حاطة منه...والباقي ذكرى...اولاد هاي الايام وضعهم غير...وانا بحس انه انا شخصيا كنت اشعر بمعناه لليوم اكثر...يعني لما بفكر قبل بشهر بالمناسبة وبخطط لاحوش الها اكيد غير عن لما اقول لابوي (زي اولاد هالايام...مش كلهم) باب بكرة عيد الام لازم نروح نشتري لماما هدبة او ورد بكرة..طبعا اكيد منيح ولا البلاش اللي بتذكروا بس بحس انه احنا جيل مختلف تماما...

سلطان حبيبي من امبارح وهو بزن بدو ياخدني على محل دهب..مسكين بده يحط اللي محوشه كله هالايام على اسعار الدهب النار ..انا ما رضيت...فلسة هو بيفكر شو بده يجيب...ياسمين بتقول انه ما صحلها فرصة تطلع بسبب الامتحانات وانها رح تجيب هدية...ههههه بنشوف...هارون...بالحضانة عملوا مراييل مطبخ...وكأنهم بيعرفوني!!!! وطبعوا ايدين الاولاد على المريول...فكرة كتير حلوة...


  وكشكر من هارون لمعلمات الحضانة عملنا كب كيك ربيعي...باعتبار انه كمان الاعتدال الربيعي بدا امبارح


وهيك بعد ما لفيناهم



واما خالد ...وايمانا منه بالواقعية...العيدية كانت فلوس...يسلموا ايديهم جميعا...
وماما الله يرضى عليها هدتني اشياء للبيت (صحن فضة للتمر كتييير حلو وصحن للترايفل ...بدي واحد من زمان...اما حماتي الله يخليها فكمان هدتني فلوس....عيد ام حلو كتيير الحقيقة...

واصدقائي مجلة نكهات عائلية اهدوني هدية لطيفة وكرت حلو...شكرا الهم كتييير

 اما انا فشو هديت ...حماتي ورد وطقم كاسات كريستال للشاي هي محتاجاه...وامي فضلت اهديها فلوس وورد وكمان للتنتين كيك بالمناسبة...




سويسرول بالليمون وكريما الفواكة العنبية
وامبارح كان يوم حافل بكل المقاييس من حيث الانشغال والاحداث... زرنا خالتي الصبح وافطرنا عندها وعملت كعكة ليمون لذيذة جدا... بنصحكم تجربوها لانها خفيفة...اسمها كعكة شيفون الليمون...ولما نحكي انه كيكة شيفون يعني بنفصل البياض عن الصفار 
... بالعادة عشان تكون هشة ونافخة وخفيفة..

هاي الكيكة بتحتاج طحين الكيك ولتعمليه بالبيت بتخلطي
1 3/4 كوب طحين + 1/4 كوب نشا 
ضاعفي الكمية قد ما بدك وخليها بمرتبان خاص لاي كعكة بدها هاد الطحين


كعكة شيفون الليمون
المقادير
بشر 4 ليمونات
1/2 كوب عصير ليمون
1/4 2 كوب طحين كيك
1/2 1 كوب سكر
ملعقة طعام بيكنغ باودر
ملعقة صغيرة ملح
ملعة صغيرة فانلا
1/2 كوب زيت
6 بيضات مفصول الصفار عن البياض
1/4 كوب ماء
1/2 ملعقة صغيرة كريما الطرطير...Cream of Tartar بتلاقوه عند البيكنج باودر او البهارات
للجليز:
2 كوب سكر ناعم منخول
3-4 ملاعق طعام عصير ليمون
3 ملاعق طعام كريما سائلة او اكثر حسب الحاجة
بشر ليمونة

الطريقة:
ينخل الطحين والبيكنج باودر والملح
يخفق الصفار والسكر والزيت والماء وعصير وبشر الليمون والفانيلا عدة دقائق ليصبح لونة اصفر افتح قليلا
يضاف خليط الطحبن ويخلط بملعقة مطاطية بخفة
في وعاء آخر يخفق البياض مع كريم الطرطير ليرتفع ويصبح مثل الكريما
يضاف البياض للخليط على 3 دفعات وتخلط بخفة لتختلط ولا نخسر الهواء من الكعكة
ندهن قالب بثقب من النصف ونسكب الكيكة
نحمي الفرن ل 160 او 225 وتدخل للفرن على الطبقة الوسطى حوالي 45-60 دقيقة لتجتاز اختبار الكيك
تقلب على سطح معدني ونبقي القالب مقلوب لتبرد تماما
بخفة نرفع القالب ومن المفروض ان تكون قد انفكت عن القالب


للجليز:
ينخل السكر ويضاف عصير الليمون والكريما ..ممكن اضافة المزيد من الكريما اذا كانت سميكة
يضاف بشر الليمون وتسكب فوق الكعكة
وصحتين




Comments

  1. ان شاء الله كل ايامك اعياد وسعادة بين احبابك,,,الهدايا حلوة كتير ,,تتهني يا رب

    ReplyDelete
    Replies
    1. الله يخليكي سمية وانت بالف خير

      Delete
  2. كل عام وانتي بخير وايامك فرح وسعاده

    ReplyDelete
    Replies
    1. وانت بالف خير سوزان...مع كل شكري وحبي :)

      Delete
  3. كل عام وانتي بخير وايامك فرح وسعاده

    ReplyDelete
  4. Hі therе, I еnjoy reading all of your post.
    I wanted to write a little comment to support you.


    Stop by mmy webpage :: parka chilliwack canada goose

    ReplyDelete
  5. I lovе what yoս guys tend to be up too. This kind of clever work
    anԀ coveragе! Keep up the wonderful works guys I've added you guƴs to my own blogroll.


    Here is my web blog; t shirt dolce gabbana

    ReplyDelete
  6. ماشاءالله مااجملها كتير حلوة يسلمو ايديكي

    ReplyDelete
  7. كل الكيكات جميلات
    وفكرة حلوة منك تهدي معلمات اولادك والاروع طريقة عمل الكب كيك وتغليفه
    فعلا انك مزوقة ومرتبة بكال امورك

    ReplyDelete

Post a Comment

Popular Posts