تقاصيل غرفة المونة ووصفة عمل طحين الكيك والطحين ذاتي التخمير بالبيت وفيدويوهات حلقة السبت من دنيا يا دنيا


شكرا لكل الكلمات الحلوة بخصوص غرفة المونة واللي بعترف انه الصور مش معطياها حقها...ولانه في منكم سألوا اني اكتب بالتفصيل شوي شو عملت فقررت انه هاد البوست يكون عن هاد الموضوع وبالمرة بدي اشارككم وصفتين لخلطتين في البيت لطحين الكيك والطحين ذاتي التخمير واللي كتير وصفات بتطلبه وبنروح نشتري طحين كيك منلاقيه بمبلغ وقدرة فبنبطل نعمل الوصفة او بنستعمل طحين عادي وبنقايس واكيد النتيجة ما رح تكون نفسها...

قبل غرفة المونة هي وصفات السبت الماضي من دنيا يا دنيا

الليموناضة البرازيلية


سلطة البازيلا الباردة


كبسة لسان العصفور


بالنسبة لغرفة المونة اللي عندي فهي مساحة مش كتير كبيرة ولكا كنت حاطة الرفوف البني بالاول كانوا ماكلين المساحة وعددهم قليل بالمقابل عرضهم كبير بيوسع اشياء كتيرة بس الا ما تتكوم الاشياء فوق بعض بسبب السرعة وعدم مساعدة نفس الترتيب علىانه الامور تكون انظم مهما حاولت. وكمان اللون البني كان كابس على نفسي ومش معطي اضاءة وروح للغرفة. وبمكن تضحكوا وتقولوا "هو من امتى لازم يكون في جمالية بغرفة خزين او مونة؟" !!!!! بالنسبة الي هادي اهم غرفة بالبيت لانه فيها الاشياء اللي بتهمني من اكل وادوات....!!! شايفين المنطق!!!

المهم التغييرات اللي تسوت بالغرفة هي التالية:

1. انقامت كل الاشياء منها (وعينكم ما تشوف الا النور على الكركبة والاغراض...والبنت الجديدة اللي عندي علقت...مدام هاي دكان!!! هههههه
2. تم دهنها باللون الابيض لتعطي ضو احسن
3. تغيرت الاضاءة من ضو عادي ل 2 نيون ابيض ليعطي اضاءة اكبر
4.اتركبت من فوق لغاية اكتر من الوسط بشوي 5 رفوف لون ابيض. وسبب عدم تكملة الرفوف للآخر هو وجود خزاين التدفئة من تحت ولازم نقدر نفتحها فالفكرة او الحل هو اشي متحرك ولاني كنت بدي سلات للبصل والثوم والبطاطا فكانت فكرة استعمال السلات على قاعدة بارجل متحركة لتحريكها لما بجنا نفتح الخزابن لمواسير التدفئة. 
البداية كانت باللف على الاماكن اللي بتبيع الرفوف واولها كان ايكيا...عندهم خيارات تنظيمية فظيعة بس لما عمانا الحسبة طلعت بتكلف كتير والحل كان رفوف الديكسون اللي بتنعمل بالدكاكين (عشان البنت اللي عندي ما تزعل وجد تصير دكانة!!!) بس السعر فرق كتير وكان ارخص ونفس اللي ركب وفرلي السلات الكروم اللي حطيتها تحت الرفوف واستعملت 6 سلات وخليت جهتين بدون سلات لوضع جرتين غاز وصوبتين الشتاء وورا الباب مشان ما يبينوا كتير.
5. بعد التركيب والتنظيف اجى وقت ترتيب الاشياء وترجيعها وفرصة للتعزيل واعرف شو عندي وما عندي فرتبت الرفوف بالشكل التالي:
- من فوق حطيت صناديق كرتون بتركبوا بالبيت من ايكيا (كل باكيت بيجي صندوقين مع غطاء وليبلز) واخترت لون زهري وفستقي وفيهم اترتبت كل ادوات الكيك والقطاعات والكريما وادوات الطبخ الصغيرة اللي بستعملهاش دايما مثل قوالب الكعك والمعمول...الخ)


- كنت شارية اوعية بلاستيكية مفتوحة (بدون غطاء) من كارفور وفيهم قسمت المكسرات، الخلطات الجاهزة، الفواكة المجففة، الشوكولاتة للطبخ، الوان الطبخ وغيرة وكنت حاطة من اول عليهم ليبلات عملتهم من الطوابع اللي عندي من المدرسة بعد ما رشيتهم بدهان السبورة (التفاصيل ممكن ترجعولها هون)


- رتبت كل المرتبانات بطريقة (قد ما بقدر مرتبة لانها مش كلها زي بعض بس قلت شوي شوي بغرها وعلى مهل وكله علية من الطوابع ومكتوب اسم الاشي اللي جوا المرتبان بالطبشور)


- بقية الرفوف اخدت الاكل من معلبات لصوصات وغيره وخصصت رف لاكل هارون الخالي من الجلوتين وعدة رفوف للاكل اللي مش مفتوح من معلبات وغيره ورف لرقائق الفطور ورف للمشروبات من حليب وعصير ومشروبات غازية.




- وبعترف وانا برتب اني كنت شاكة انه رح توسع الاشياء المهولة اللي راحت على غرفة القعدة بس المدلله لما رتبت لقيت عندي انه في مساحات ممتازة لاخفف عن المطبخ شوي فرتبت الرفوف وراء الباب بشكل اخدت فيه كتير من ستاندات الكيك والسلات والصحون الكبيرة وقلاية الكهرباء + صناديق بلاسيك مع اغطيتها اشتريتها من ايكيا وفيها حطيت الصجون والكاسات البلاستيك وزينة رمضان ومحارم السفرة (عمري حكتلكم عن نقطة ضعفي واديش بحب اشتري نابكنز!!!!) ما علينا نرجع للمفيد وصندوق للاكياس واللي بحب اجيبها من البلد بالكيلو وباحجام مختلفة لسلات القمامة بالبيت والفريزر والساندويشات وغيره)


وفوقهم حطيت مزهريات وثلاجات الرحلات والترموس الكبير
- اما السلات ففخصصت واحدة للشيبس والبزر وواحدة للبسكوت والاشياء الحلوة وواحدة للبصل والثوم والبطاطا وواحد للطناجر اللي بستعملها كتير يس ماخدة مساحة بالمطبخ وتنتين للاكياس الاكل اللي مش مفتوحة من طحين لمعكرونة لعدس وغيره وواحدة لعجائن السكر وواحدة للزيوت والسمنة والمخلل.
- ورا الباب وبالجهة اللي ما فيها سلات انحطوا الصوبتين وجرات الغاز

احلى شعور بالعالم لما تعملي اشي الك زمان بدك تعمليه وتطلع النتيجة حلوة ومرتبة وتوفري كمان وقت وجهد وفلوس.

اما وصفتين اليوم فهم كالتالي ونصيحتي حضري منهم كميات وحطيها بمرتبانات وعليها ليبل ضروري عشان تعرفيهم من بعض وتميزيهم عم الطحين العادي:

طحين الكيك
بيمتاز بانه لازم يكزن خفيف عشان تطلع الكيكة هشة ومش كل الوصفات تتطلبه ومقاديره هي:
كوب و 3/4 طحين
1/4 كوب نشا

او
كوب طحين ناقص 2 ملعقة طعام


الطحين ذاتي التخمير
بيمتاز بوجود عناصر رافعة لتضمن نفشان العجينة او الكيك واذا بتنتبهوا بالوصفات اللي بتحتاجة ما بيكون في بيكنغ باودر او خميرة ومقاديره

كوب طحين
ملعقة صغيرة بيكنج باودر
1/2 ملعقة صغيرة ملح
1/4 ملعقة صغيرة كربونات

Comments

  1. مرحبا حبيبتي الله يعطيكي العافية على هالمجهود ممكن اغلبك تقوليلي الرفوف الي جبتيهم اديه طولهم وعرضهم واديه سعرهم ومن وين جبتيهم

    ReplyDelete
  2. الله يعافيكي..الرفوف من محل بالوحدات هو بيجي وبيقيس وبيقولك اديش بدل وبيرتب معك كيف يركب..عرضهم 40 سم وطواهم حوالي 95 سم والحلو انهم متحركين يعني ممكن تنزلي الرف وترفعيه حسب الاشياء اللي بدها تنحط عليه (مثل رفوف الثلاجة) اما سعرهم فالاحسن انك تحكي مع الشخص نفسه لانه بيعمل خصم حسب حجم الشغل...اذا حبيتي تحكي معه ممكن تبعتيلي ايميل على manal_obieda@yahoo.com عشان اعطيكي تفاصيل ...مع تحياتي

    ReplyDelete
  3. ههههه هاي عنجد دكانة بصراحة.. شي بشهي و بجنن.. صار نفسي يكون عندي هيك مساحة لارتب فيها اغراضي مطبخي فوق بعضه.. الله يعطيك العافية عهالمجهود

    ReplyDelete
  4. اشي برفع الراس وبريح ست البيت ما في احلی من خزانة المونة لما تكون موجودة ومرتبة

    ReplyDelete
  5. ماشاءالله ع الترتيب والتنظيم والله شي بيفتح النفس ان شاءالله بس يصير الي بيت رح اعمل فيه غرفة مونة جنب المطبخ واحط فيها كل شي متل الترتيب الي عملتيه شو رح يكون المطبخ مرتب وفاضي والبوفيهات مرتبة ياعيني شو رواق

    ReplyDelete
  6. اهم شي ترتيب غرفة المونة وخزاين المطبخ الي فيها اغراض الاكل

    لانو بصراحة اوقات بتخرب اشياء وبتخلص مدتها وما بنكون شايفينها

    ReplyDelete
  7. ما شاء الله شو مرتبة الله يعطيكي العافية،

    ReplyDelete
  8. تم
    حنان ابوغوش
    سلطة بازيلا

    ReplyDelete
  9. هلأ عندي خزانة المونة في المطبخ وامورها تمام وتحت السيطرة 😅 بس بصراحة منظر غرفة المونة عندك وانا متأكدة انه صار تطوير كتير عليها من ٢٠١٤-٢٠٢٠ المهم صرت افكر بغرفة المخزن عندي اعمل فيها نفس اللي عملتيه .... رائعة انت منال وملهمة ما شاء الله عنك 😍😍 الله يحميك ويرضى عليك

    ReplyDelete
  10. This comment has been removed by the author.

    ReplyDelete

Post a Comment

Popular Posts