رمضان كريم...زينة رمضان السنة وشوربة انشلادا الدجاج

رمضان كريم وكل عام وانتو بالف خير...هاي رمضان التاني النا مع بعض على المدونة بتمنى انه اشارككم وصفات حلوة وسريعة وغير مكفة عشان تشاركوها مع اسركم وتستمتعوا مع بعض....

بس قبل الاكل مين فيكم زين لرمضان؟ انا كتير بحب هاد الموضوع وبحطني بجو رائع...طبعا لما الواحد بيروح على المعارض للاشغال اليدوية بيضوف اشياء كتير والحقيقة في اشياء حلوة بس الاسعار نار ومش الكل بيقدر يدفع...انا من الناس اللي مش مستعدة ادفع 70-80 دينار حق شرشف طاولة...لما نزلت على البلد قبل كم يومين اشتريت شوية قمايش وكلف عشان اعمل زينة رمضان (غير الاضوية والتعليقات واللي بالبلد ارخص ...اشتريت حبال الزينة ب 3 دنانير و2 دينار وعندي من السنة الماضية كم واحد وهيك حطيت على شبابيك البرندة والضيوف)...نرجع للشراشف...اشتريت هاي القماشة (مصرية) من البلد 3 متر بعرض متر ونص ب 7 دنانير وكلفة للداير 10 متر بدينار ونص و4 قطع معدنية (اكسسوار) ب دينار...


وبعد الحبك والتركيب




وكمان اشتريت قماش تربيعة اللي بيستعملوه زمان للايشربات...اشتريت 3 ب 5.5 دينار واكسسوارات 2 لكل واحدة تراوحت اسعارهم بين 1/2 الى دينار.......

قبل


وبعد الحبك...لسة بدهم كوي بالمناسبة....(الحبك للكل بكلفة 5 دنانير)...يعني 4 شراشف واحد كبير و3 صغار باقل من 20 دينار...مش بطال ابدا :)




وعلى الباب كنت شارية من كندا بآخر زيارة تعليقة للباب ب 4 دولارات كندي...بحدود 3 دنانير او اقل شوي وعلقت عليهم ميداليات فوانيس رمضان الدزينة بدينار






انطلب مني وصفة شوربة انشلادا الدجاج واللي الها طرق كتير بس بعد التجربة طلع معي هالوصفة هاي واللي بتناسب طبيعة الاشياء اللي موجودة في السوبرماركت عنا وطبيعة ميزانياتنا كمان...بتمنى تجربوها وتعجبكم...



شوربة انشلادا الدجاج
المقادير:
4 صدور دجاج مسحب
3 ملاعق طعام زيت زيتون
بصلة متوسطة مفرومة ناعم
حبة ثوم مهروس
حبة فليفلة خضراء مفرومة ناعم
2 حبة بندورة متوسطة مقشرة ومفرومة ناعم
ملعقة صغيرة بودرة التشيلي (بتنباع عند البهارات الاجنبية)
ملعقة صغيرة كمون
ملح، فلفل اسود
لتر وربع مرق دجاج (بدون بهارات عربية او هيل)
110 غم جبنة كريمية
كوب جبنة شدر مبشورة
للوجة:
3 ارغفة خبز تورتيلا ذرة او طحين مقطعة بالمقص بالطول ومقلية بزيت غزير
بصلة خضراء مفرومة
جبنة شدر
كزبرة خضراء

الطريقة:
يحمى الفرن الى 180 وتدهن صدور الدجاج بملعقة زيت زيتون وترش بالملح والفلفل الاسود وتشوى بالفرن حوالي 30 دقيقة وتبرد وتفسخ
يوضع بقية الزيت في طنجرة على النار وتذبل البصلة ثم الثوم والفليفلة وتذبل
تضاف البندورة وتقلب عدة دقائق وتضاف بودرة التشيلي والكمون والملح والفلفل الاسود
يضاف الدجاج والمرق وتترك لتتسبك قليلا
تضاف الجبنة الكريمية كقطع وتحرك لتذوب 
تضاف الجبنة الشدر وحاولي ان لا تغليها لكي لا تتخثر
تقدم وعليها القليل من الخبز المقلي والبصل والجبنة الشدر ورمضان كريم وكل عام وانتم بخير




Comments

  1. ماشاءالله عليكي يعني ما في حكي ممكن اوصفك فيه الله يحميكي ست بيت بمعنى الكلمة مدونتك اشي خيال انا جديد عرفت عنها واشي مميز وممتع وممكن اضل ساعات فيها لانه جد اشي اكثر من رائع وطريقتك بالحكي وباالشغل قمة...بس عندي بيبي وماخد كل قتي الله يخليلك اولادك .... مزيدا من التألق والنجاح والتقدم يا ست منال مبسوطة كتير اني تعرفت عليكي

    ReplyDelete
    Replies
    1. حبيبتي يارا تسلمي كلك زوق وبتمنى اكون عند حسن ظنكم دايما وحاولي اتابعيني كل ما بوبو سمح هههههه...الله يخليهم :)

      Delete
    2. حبيبتي يخليلي اياكي... فعلا كل ما البوبو بيسمح هههههههههه

      Delete
  2. والله حلو انو نزين بيوتنا ومطبخنا برمضان حتى يحس اطفالنا بأهمية هدا الشهر
    عجبتني فكرة تزيين طاولة الاكل ورح اجربها رمضان القادم ان شاء الله

    ReplyDelete
  3. ما احلى الزينة والشراشف بجنن والله كتير حلوين اجواء رمضانية بامتياز ويسلمو ع الشورية كلها بجنن وبشهي وتغيير عن المعتااد

    ReplyDelete
  4. عجبني شرشف الطاولة كل شغلك مرتب والاحلى انه توفيري ؛-)

    ReplyDelete
  5. حبيبتي كتير حلو الشرشف ما شاء الله ، انا كنت قبل شهرين بالاردن ودورت على هيك قماش بوسط البلد وسوق مانجو بس ما لقيت .ممكن اعرف انت من وين جبتيه بالزبط

    ReplyDelete
  6. قصدي القماش المصري

    ReplyDelete

Post a Comment

Popular Posts