اطباق حلقة السبت 8/30 على دنيا يا دنيا

اولا اسمحولي اشكركم على كل اللطف والدعم والمتابعة اللي عم تعملوها...جد اني فخورة بانه لدي معارف واصدقاء مثلكم...وفي نفس الوقت اشي محزن ومضحك معا اديش في ناس تشعر بالاسى الداخلي لدرجة انها تكتبلي اشي مثل تعليق شخص وبدون ذكر اسماء من حلقة السبت الماضي على دنيا يا دنيا وقناة رؤيا بانها بتكرهني!!! جد!!! بتكرهيني!!! لهالدرجة!!! يعني الكره كلمة وشعور  قوي جدا في قاموسي وما بنحكى الا اذا الشخص اللي بكرهه اذاني بشكل كبير...وحتى يمكن ما اقدر اكرهه بمعنى الكراهية او استخدم عبارة مثل هيك خاصة والشخص اللي علق لا بيعرفني ولا عملتله اشي!!! جد اشعر بالاسف على نوعية قلب هاد الشخص وشو شكل حياته اذا هو شاغل حاله ومساحة من قلبه بانه يعبر عن شعور قوي زي الكراهية وعلنا وكمان لشخص ما بيعرفه ولا سواله اشي غير انه بيطلع يطبخ على التلفزيون؟!!! طيب مين قاله يتفرج؟!! جد!!! اللي مش حابب يشوف ما في ضريبة اذا قلب المحطة!!! اشي بيضحك وببكي بنفس الوقت!!! يعني تفسير عميق وواضح ليش بنضل نقول والله الوضع صعب والناس مش هي الناس...وهي عينة من هالناس...يمكن البعض يفكر اني زعلانة بس والله ابدا...مش على حالي...بس زعلانة على مستوى الاخلاق اللي انحدر بانه الواحد يبهدل او يشتم او يجرح شعور شخص هو ما بيعرفه اصلا...!!! جد الله يجيرنا من الاصعب...وما الي غير مقولة " كل اناء بما فيه ينضح" وبس...

وبالمقابل والحمد لله في ناس محترمة جدا حتى لو انتقدت وعلقت بشكل ما على وصفة وقالت انها  مش الوصفة الاصلية وغيره...بيكون بشكل بناء...وبحب اقلهم برضه وعلى قد ما بحترم رأيهم..انه الناس اذواق وانه عشان هيك في طباخين كتييير بالدنيا وكل واحد اله طريقته...وبخص بالحكي التعليقات على تسقية الحمص...مش اصلية!..ما فيها ايلي (المادة اللي بتنضاف مع عصير الليمون بعد خلطها بالخلاط ليصير شكلها مثل الحليب)..الخ...يمكن مزبوط بس انا بعملها هيك..وما في شرطة الاكل تقولي ما بيصير تسميها هيك...يعني مثال بسيط ومحلي هو المنسف...كتير ناس بسلقوا اللحمة بالجميد وبيقولوا هي الطريقة الاصلية وفي ناس ما بيحبوا وبيسلقوا اللحم لحال وبعدين بيضيفوا اللبن...وين شرطة الاكل تحاسب؟!!!! الناس اذواق وعلى رأي مثل تاني عامي "كول على ذوقك والبس على ذوق الناس"...تسقية الحمص او الفتة الشامية اللي عملتها على رؤيا الاسبوع الماضي هي الطريقة اللي انا بعملها ببيتي..وعيلتي بتحبها...انا ما قلت انها الاصلية ولا اعتديت على التراث!!! ولا قلت رح اعمل تسقية بالفقسة (يعني الايلي)...وانا اختصرت خطوة طحن الحمص للتسهيل ولاني بدي اغير...واكيد بالنهاية بيرجع الكم...يا بتعملوها مثل طريقتي او بتغيروا...وبرضه ما رح اكون شرطة الاكل عشان احاسب اي حد...هاد اكل بالنهاية وحرية شخصية... والف صحة على قلوبكم بغض النظر عن الطريقة اللي بتختاروها...

انا من الناس اللي بحب اعبر عن رأيي وما بستحي اني احكيه طالما لا عم بضايق حد او بجرحه او بشتمه..وبالنهاية هاي مساحتي الخاصة للبربرة الاكترونية واللي بفكر فيها بشكل مكتوب وبصوت عالي...

ما علينا بكفي بربرة ..وندخل بالمفيد...فيديوهات السبت الماضي والطرق زي ما وعدتكم مكتوبة..

الحيدري 
المقادير:
700 غم لبن مصفى من الماء قليلا
200 غم جبنة فتة
1/2 ضمة بقدونس مفروم
1/2 ضمة نعنع مفروم
1/2 ضمة شبت مفروم
2 حبة ثوم مهروس
ملعقة طعام عصير ليمون
للوجة: شرائح فلفل احمر حار، زيتون اسود، بقدونس، زيت زيتون


الزيتون الحلبي
المقادير:
2 كوب زيتون اخضر مزال البذر
بصلة صغيرة مفرومة ناعم
2 ملعقة طعام شطة حمرا
فلفل اخضر حار مقطع شرائح
حبة ليمون مفرومة ناعم
حبة بندورة مفرومة ناعم (اختياري)
زيت زيتون




فول مدمس بالقشطة والفليفلة والطحينة
المقادير:
علبة فول مدمس مهروسة
2 ملعقة طعام زبدة
بصلة صغيرة مفرومة ناعم
2 حبة ثوم مهروس
حبة فليفلة خضراء صغيرة مفرومة ناعم
حبة بندورة مفرومة ناعم
ملح
2 ملعقة طعام كريما او ملعقة طعام قشطة
3 ملعقة طعام طحينة
عصير ليمونة
1/4 كوب بقدونس مفروم
1/4 كوب كزبرة خضراء مفرومة (اختياري)
للوجة: زيت زيتون 


قالب الكنافة بالسميد
المقادير:
لطبقة الكنافة
1/2 كيلو كنافة خشنة
اصبع زبدة مذاب

لطبقة السميد:
كوب سميد ناعم (فرخة)
1/2 1 كوب حليب بودرة
5 كاسات ماء
ملعقة كبيرة ماء زهر
بضع حبات مستكة مطحونة

لطبقة الوجة:
كريما مخفوقة
فستق حلبي
كرز مجفف 

للتقديم:
قطر بارد

واخيرا وليس آخرا الطبق اللي عمل ضجة وبلبلة...هههههه وانا مصرة وحابة اسمي تسقية الحمص وعلى طريقتي :)



تسقية الحمص على طريقة منال عبيدة
المقادير:
3 كوب حمص مسلوق مع القليل من ماء السلق
2 رغيف صغير خبز مقطع مكعبات مقلي او محمص 
كوب ونصف لبن
3 ملاعق طعام طحينة
عصير ليمونة 
حبة ثوم 
ملح

للوجه:
صنوبر
سمنة او زيت زيتون
رشة من الفلفل الاحمر والكمون 
بقدونس ناعم
القليل من الحمص

Comments

  1. شكرا لك سيده منال على كل الحلقات اارائعه
    والوصفات الرائعه والسهله جداااا
    حابه احكيلك انه ارضاء الناس غايه لا تدرك
    اتمنى لكي المزيد من التوفيق

    ReplyDelete
  2. يسلمو اديكي اكلاتك.كتير سهلة ومش معقدة انا.بحب الي بتعمليه كتير.انا متابعيتك من امريكا وبتمنالك مزيد من التقدم والنجاح ام ﺣﻼ

    ReplyDelete
  3. اكلاتك طيبه وفيها تجديد يسلموا ايديكي

    ReplyDelete
  4. شكرا الكم جميعا للدعم والمتابعة...واكيد انه ارضاء الناس زي ما قالت سوزان غاية لا تدرك بس المهم طريقة التعبير عن عدم الرضا تكون بادب واخلاق...على كل حال وزي ما قلت "كل اناء بما فيه ينضح"

    ReplyDelete
  5. يسلمو ايديك على كل اكلاتك وجهودك....ولا يهمك حد .....ممكن طريقة تجفيف البندورة ...شكرا لك

    ReplyDelete
  6. ولا يهمك منول هاي تسقية ونص وكثير زاكية

    ReplyDelete
  7. بسلموعلى الاكﻻت الزاكية ودائمافنانة ومبدعة

    ReplyDelete
  8. انا اللي صاحبة سورية بتعملها متل ما عملتيها بالزبط وبتطلع بتشهي.. ؛)
    ما يهمك كلام الناس هدول غيرانين

    ReplyDelete
  9. مرحباً منال بالعكس ان من اول مرة دخلت مدونتك وما طلعت الا لما خلاصتها تخيلي يمكن أسبوع من كتر ما أنا مستمتعة والله بعلم قديش بندعيلك بس هو فعلا فيه ناس عندهم هواية يكتبوا كلام مستفز كأنهم غيرانين من نجاح الآخرين وهدول للأسف انتشروا لأنهم يقدروا يعبروا من دون اسم وهاد اكبر دليل على انهم جبناء وكل حكيهم عالفاضي وانا بعرف انه مش رح ياثروا فيك بس الواحد بستغرب كيف فيه هيك ناس موجودين ... وعنجد من كل قلبي الى الامام منال ومن نجاح الى نجاح ان شاء الله وآسفة طولت عليك :)

    ReplyDelete
  10. شكرا الكم جميعا كلكم زوق ولطف وانا لولاكم ما بكون هون...مع حبي

    ReplyDelete
  11. منال الطبق يلي عملتيه هو تسقية بسمنة هي بينحطلها لبن و بقدونس..............و في نوع تاي من التسقية اسمو تسقية بزيت و هي يلي بدها القلي و ما بينحطلها لبن................يلي انتقدك عامل ميكس بين تسقية الزيت و تسقية السمنة

    ReplyDelete
  12. فعلا زي ما قلتي "كل إناء بما فيه ينضح" ..انا ما حضرت الحلقة بس اكييد كل اشي منك زاكي و بيكفي احنا اللي بنحبك متابعينك وين ما رحتي :)

    ReplyDelete
  13. يسلموا ايديكي
    وصفات حلوة واستمرررري
    الحلو بالمدونة بوصفاتك انو كلها محبة وبنحس كانو نحنا معك وعم نشتغل معك

    ReplyDelete
  14. انا جربت التسقية عطريقتك كتير طيبة ..بجد بشجع اللي ما جربها يجربها

    ReplyDelete
  15. يسلمو ايديكي وانتي انسانة رائعة وراقية ورقيقة وناجحة ماشاءالله عليكي وفي اعداء للنجاح بعبرو عن غيظهم بلكراهية لانو اصلا ماجربو يلتمسو الشعور بالنجاح والابداع والبساطة ، ماعليكي منهم وبالعكس لانك ميزة دايما بتضيفي لمسة خاصة فيكي ع كل شي بتعمليه وصدقا هاللمسة هاي بتكون السر ف انو نجرب وصفاتك بكل ثقة وبننبسط عليها وبننسى الاصلي وبنعتمد وصفتك بدون مبالغة والله

    ReplyDelete
  16. تم
    حنان ابوغوش
    زيتون

    ReplyDelete
  17. تم
    حنان ابوغوش
    تسقية

    ReplyDelete
  18. تم
    حنان ابوغوش
    كنافة خشنة

    ReplyDelete
  19. This comment has been removed by the author.

    ReplyDelete

Post a Comment

Popular Posts