وصفات حلقة السبت 8/9 على قناة رؤيا واكواب الجلو المايلة


الف سنة؟!!!! هيك  احساسي من آخر مرة كتبت فيها هون...شو قصة الصيف هاد...عجقة؟!!! كلمة قليلة عليه!!! انهديت!!! كلمة لا تعبر عن الضغط اللي انا فيه!!!! الحمد لله احسن من القعدة بس جد مش معقول الوضع...طبعا غير الظروف اللي بالمنطقة وحالة النكد اللي احنا فيه وعقدة الذنب اللي مش عارفة شو بدي احكي فيها ولا ولا ولا... تخلونيش ابدا...

من اكتر الاشياء اللي تعبتني هاد الصيف انه البيت ماشي...ماشي بكل ما تعني الكلمة من معنى!!! ما اظن انه في اشي بمحله مزبوط مع كل الركض طول الوقت...مو مصدقة وتبدأ المدرسة وارجع يكون في وقت الصبح عشان اقدر انظم واعيد التنظيم...حديقة البرندة الحلوة اللي متذكرين تعبت عليها...كم يوم شوب والبنت اللي عندي ما سقت الزريعة جابت خبر نص القواوير...عشان هيك قررت قرار حاسم اني ما ازرع الا النبتة اللي متعارف عليها باسم الخبيزة(لانه ورقها مثل الخبيزة)  لانها الوحيدة اللي صمدت بوجه البرد القارص بالثلجة الماضية وبالحر الشديد بالاكم يوم الفايتين...

اما على صعيد الاكل فكتير اشياء انعملت بس ما كان في وقت للتصوير او الصور موجودة وبدها تصغيير او انه المراق مش جاي واعتمدت على انه احنا معزومين تقريبا كل يوم هاد الصيف اما على العشاء او الغدا فالجماعة قضوها اشياء تمشاية حال لانه في اكل مرتب بعدين...بس جد مشتاقة لحالة من الاستقرار الجسدي والنفسي...كيف صيفكم انتو؟!!!

آخر الوصفات السبت الماضي على قناة رؤيا وبرنامج دنيا يا دنيا هي كانت تحت "ما يطلبه الجمهور" وطلباتكم اوامر وحاولت اني اشمل جزء منها...اذا عندكم اي طلبات تانية ارجو تخبروني...

لستيك الدجاج بصوص الفطر واللي بجد بنصحكم تجربوه هي اللينك للفيديو

اما لعمل الحليب المركز المحلى بالبيت وفدج الشوكواتة البيضاء بالبسكوت فهي الفيديو

ولسلطة السيزر باكواب التوست وبدون مايونيز فهي الفيديو

ولخبز الثوم فهي الفيديو

وطبعا من الاشياء اللي شغلتني الفترة الماضية كانت العزايم..من الاشياء اللي بحبها بالعزايم هو التزيين...يعني مش بس للاكل وكمان للسفرة والقعدة...عملت هالفازات لتزين القعدة واستعملت مرتبانين مخلل كبار قمت الليبل من عليهم بالطريقة اللي مرة شاركتكم فيها وحطيت جوا كل مرتبان زجاجة عصير برضه قمت الورقة عنها وحطيت شرايح ليمون اخضير بين المرتبان والزجاجة والتانية شرايح ليمون اصفر وعبيت مي بيناتهم وبزجاجة العصير كمان وحطين الزهور اللي اشتريتها بهالشكل...



وطبعا شرائح الليمون بعد ما روحوا الضيوف صفيتهم وبالفريزر واستعملتعم لتنظيف الدجاج..فما راحوا خسارة..  :)

وهالحلو كان من ضمن الحلويات 


جلو فراولة بتصبي جزء منه في الاكواب وبتميلها حوة صينية (انا استعملت صينية الميني مفن) وبس يجمد (رح يجمد بسرعة) بقية الجلو مع شوية كريما مخفوقة وبتنزليه بكيس الكريما وميلي ليجمد وبعدين كريما مخفوقة وحبة فراولة...سهل ..سهل وببين انك هلكتي وهو سهل كتير..

موعدي معكم بكرة ان شاء الله وبوست جديد...مع حبي


Comments

  1. حبيبتي منال فعلا كلك ذوق وفن .كل اعمالك رائعه سواء الطبخ او التزيين ابداع.بالتوفيق الدائم .

    نوال الحلاق

    ReplyDelete
    Replies
    1. الله يسعدك يا نوال على قد ما بتجامليني :) كلك زوق وشكرا دائما للمتابعة وسعيدة انه عم بتجربي وبتعجبك الاشياء وضلك شاركينا بالتطبيقات :)

      Delete
  2. Manal
    Your recipes are amazing, I have tried the dressing and the jelloo cups and they were just perfect

    ReplyDelete
  3. It is me , your loyal admirer May Al kassem

    ReplyDelete
  4. Thank you dearest May...I am so happy that you and the family are enjoying the blog and recipes...keep these lovely comments coming ;)

    ReplyDelete
  5. بس ياريت ياحببتي تصوري الخطوات انا بحب اوي اشوف الخطواط كلها بتعلم منها وتسلم ايدك تتلف في حرير

    ReplyDelete
  6. راااااااااااااااااااائعه ما شا الله عنك

    ReplyDelete
  7. منال انا جربت ستيك الدجاج بالفطر اشي.من االاخر بشهي والله زي الي بالمطاعم ما بختلف اشي وحتى ازكى يسلمو اديكي

    ReplyDelete
  8. بتجنن فازة الليمون رح اطبقها ان شاءالله واقطف من زهور واعشاب حديقة منزلنا فكرة رائعة يسلمو

    ReplyDelete
  9. ما شاء الله شو مرتبة سواء فازات الليمون او الجلي و حبيت انك استفدتي من الليمون لتنظيف الجاج

    ReplyDelete
  10. افكارك رووعة ومميزة
    والحلو فيكي انك بتستفيدي من كل شي وما بتكبي اي شي وهي صفة حلوة كتييير

    ReplyDelete

Post a Comment

Popular Posts