الارز المفلفل باللحم وحليب جوز الهند ووصفات يوم السبت 9/6 على دنيا يا دنيا وقناة رؤيا بالفيديو


بالرغم من كل محاولاتي لاستعادة النشاط مؤخرا حاسة حالي بحاجة الى اما اجازة او جرعة فيتامينات من نوع قوي جدا لاستعيد نشاطي...جد عم بشتاق لمدونتي كتيير وللتواصل معكم اكتر والمشكلة انه عندي مليون اشي اشارككم فيه بس ما في وقت للكتابة مؤخرا...وما عم بقدر اسهر كتيير لاني يا دوب اصحى واجهز الكل للمدرسة وبعدين يدوب بقية اليوم قبل ما يوصلوا من المدرسة يكفي للمهمات الاخرى...وبعد الظهر انسوا الموضوع...لساتني بجلد كتب لهلأ لانه في كتب لسة عم تتسلم كل شوي...آه...الله يعين
هي وصفات السبت الماضي على دنيا يا دنيا بالفيديو

خبز التورتيلا 



صينية الارز المخبوزة بالجبنة



رولات الدجاج المخبوزة


السلطة المنوعة بالفاصوليا وصوص الكزبرة


واخيرا وليس آخرا ناتشوز القرفة بالفراولة وصوص الشوكولاتة


اما وصفة المدونة لليوم فهي الارز المفلفل باللحم وحليب جوز الهند...جربوها ورح تدعولي كتيييير زاكي



الارز المفلفل باللحم وحليب جوز الهند
المقادير
ملعقة طعام سمنة او زبدة
1/2 كيلو لحم خروف قطع كبيرة بدون عظم
2 بصلة مقطعة جوانح رفيعة
3 حبة ثوم مقطع شرائح
3 ملاعق طعام بودرة الكاري
علبة حليب جوز هند (400 ملم)
حبة فلفل احمر شطة شرائح (اختياري وانا ما استعملت)
مرق لحم (حوالي لتر)
1/2 كيلو ارز بسمتي مغسول جيدا بالماء
كزبرة خضراء (حوالي 1/2 كوب للوجة)
لوز مقلي للوجة

الطريقة:
ملاحظة (سنكمل طبخ الطبق بالفرن فيفضل استعمال قدر ممكن ادخاله للفرن او من الممكن اكمال الطبخ على الغاز)
نحمر قطع اللحم بالسمنة لتتحمر من جميع الجهات مع مراعاة عدم وضعها دفعة واحدة كي لا يخرج ماءها 
نرفع اللحم ونضع البصل ونذبلها عدة دقائق ثم الثوم وبودرة الكاري والفلفل الاحمر اذا استعملتيه
نعيد اللحم ويضاف حليب جوز الهند والمرق وتترك مغطاة على نار هادئة لينضج اللحم
نضع الارز مع مراعاة اضافة الماء الساخن اذا كانت كمية المرق لا تكفي لنضج الارز ونضبط الملح والفلفل الاسود وعندما يغلي ندخل القدر على فرن حامي  على 190 ونتركها حوالي 30-35 دقيقة ليتشرب الارز المرق وينضج
نفلفل الارز بالشوكة ونضع اوراق الكزبرة الخضراء واللوز المقلي على الوجة وتقدم مع السلطة واللبن والف صحة وعافية


تحديث..
انطلب مني نوع الرز اللي بستعمله..اسمه تيلدا وهي صورته وبغسله منيح من النشا وبنقعه 20 دقيقة...


Comments

  1. مرحبا ست منال
    برايك ما هو افضل ارز بسمتي متوفر الان في الاسواق...
    شكرا
    تمارا عبو اليونان

    ReplyDelete
    Replies
    1. اهلا تمارا...انا بحب تيلدا ممتاز وفي ناس بتحب بنجاب المهيدب كمان...لساتني ما لقيت النوع السوبر ممتاز ولسة بجرب بس لحد الآن بحب تيلدا

      Delete
    2. شكرا جزيلا ست منال ...
      وين اقدر الاقيه ..ممكن تكتبيلي طريقتك بطبخو...كم تنقعيه و كمية الماء...لان طريقة العمل يمكن كثير بتاثر.(السهل الممتنع)..
      اشكرك مقدما
      و انا من متابعيك على قناة رؤيا و معجبة بوصفاتك و طريقتك الاكثر من رائعين..

      Delete
    3. ولو سمحتي ست منال ممكن صورة لشكل الكيس لاني شفتو عالكوكل في انواع كثيرة باسم تيلدا...شكرا و تعبتك معايا

      Delete
    4. حطيت صورة للكيس فوق..انا بغسله منيح وبنقعه 20 دقيقة ومي بحطله يغمره حوالي 1 سم ونص وبس يغلي بوطي تحته على الآخر وبغطيه ليستوي

      Delete
    5. شكرا جزيلا ست منال...

      Delete
  2. ما عرفت اشوف الخلطه السحريه it is not supported

    ReplyDelete
    Replies
    1. هاد خليط للخبز عملته...بتلافي الوصفة على صفحتي على ال فيسبوك تحت الخليط المتعدد الاستعمالات

      Delete
  3. مرحبا ست منال
    استعملت رز تيلدا و اشكرك لانو طيب و خفيف...
    لكن عندما اشتريتو للمرة الثانية حسيتو غير اول كيس اشتريتو لما بطبخو بيعجن و بيتكسر؟؟؟ لاحظت انو الكيس الثاني واللي بيعجن لما بطبخو تاريخ انتاجو اقرب من الكيس الاول ...ممكن يكون هذا هو السبب؟؟؟
    و لو تسمحيلي ممكن اسالك عن اللحام اللي بتاخذي اللحمة منو لانو ا للحام اللي بشتري من عندو و بعتمد عليه انو يعطيني لحمة منيحة غير مكانو و ما اعرف وينو؟؟؟ و اللحام اللي صار بمكانو بشتري منو لحمة لكن ما بتعجبني و انا بصراحة بعتمد عاللحام لما اشتري لاني ما بفهم في شراء اللحمة...
    شكرا جزيلا لاني عم غلبك معايا و شكرا على الوصفات الرااااائعة....
    تمارا عبو اليونان

    ReplyDelete
    Replies
    1. غريب مش المفروض يصير هيك...بجوز شوي متغير فيه كمان indian gate كويس اما اللحام اللي بروح عنده فهو في الرابية قريب على KFC اللي بشارع المدينة المنورة وهو بسوبرماركت اسمه ليمونة للمونة...اذا حبيتي ممكن ابعتلك رقمه..

      Delete
  4. شكرا جزيلا ست منال ...
    و اكون ممنونة لو بعثتيلي رقم اللحام ....

    ReplyDelete
  5. يسلمو ايديك منال باين انها لذيذة كتير وشكرا انك ذكرتي اسم الرز الي بتستخدميه صراحة نوع الرز الو دور كبير بنجاح وصفات الرز انا عندي نوع بنكد علي كل مااعمل شي في بتكسر وبصير شكلو متل البرغل مع اني مابحركو ، وجربت كزا نوع ماحبيتهم ان شاءالله رح اجرب هالنوع

    ReplyDelete
  6. رولات الدجاج المخبوزة جربتها وطلعت روووووووعة
    يسلموا ايديكي

    ReplyDelete
  7. salam alycom
    i just made rice with coconut milk and meat taste really good , thank you .

    ReplyDelete

Post a Comment

Popular Posts