كعكة الفيريرو روشية

كل عام وانتو بخير...بتمنى تكونوا قضيتوا عطلة عيد مريحة..مبسوطة كتير على امطار الخير والحمد لله وانا عم بكتب البوست وبالرغم من اني مش من عشاق فصل الشتاء بسبب البرد والغيوم بس بحب المطر...انتعاش وبدء حياة وفرصة لغسل الشوارع والنباتات وقلوبنا كمان...

هاد العيد كان مميز والحمد لله بالمناسبات العائلية السعيدة من خطب وزواج وجمعات مع الاهل والاصدقاء واسترخاء كمان بالمزرعة باجواء صيفية لطيفة... ومن احلى الاشياء بالعيد وبالرغم من اني كنت شوي مستغربة من انه في دوام على رؤيا بالعيد الا انه كان نصيبي اول يوم بالعيد واجواء رائعة بالستديو الدنيا عيد من الموظفين والمذيعين والفرقة الموسيقية والضيوف...جد مرق الوقت بسرعة وكانت حلقة حلوة بالرغم من العجقة اللي صارت شوي بس كانت استمتاع تام..

باول يوم العيد عملت وصفة كباب الشاورما والموجودة على المدونة والوصفة نزلت على صفحتي على الفيس بوك مع صوص الثوم والمحمرة وبسكوتة الشوكولاتة تشبس الكبيرة...رح انزل الوصفة الها هاليومين...

قبل العيد كان عيد ميلاد حماتي وقررت اعمللها كعكة مميزة هي كعكة الفيريرو روشية واللي طعمها خيالي وبندق وشوكولاتة ونيوتيلا وانزل ياللي بتنزل...هههه بس فعليا الواحد ما بيقدر ياكل كتير لانها دسمة .فما تخافوا من صغر حجمها لانها بتكفي عدد ممتاز...قطعة واحدة صغيرة لكل شخص...


كعكة الفيريرو روشية
المقادير:
5 بيضات
6 ملاعق طعام سكر
2 ملعقة صغيرة فانيلا
3/4 1 كوب بندق مقشر ومحمص خفبف مطحون ناعم (يقاس بعد الطحن)
2 ملعقة طعام طحين
2 ملعقة طعام كاكاو
2 ملعقة صغيرة بيكنج باودر
للحشو:
كوب ويفر بنكهة البندق مكسر
للكريما:
7 ملاعق طعام نيوتيلا
2 اصبع زبدة بحرارة الغرفة
1/2 1 كوب رقائق الشوكولاتة، مذابة

الطريقة:
يخفق البيض والسكر لمدة من 5-7 دقيقة على سرعة عالية ليصبح منفوش وخفيف الكريما، تضاف الفانيلا
يخلط البندق والدقيق والكاكاو والبيكنج باودر
تضاف المكونات الجافة وتقلب بملعقة مطاطية بخفة لكي لا نخسر من الهواء الموجود بالبيض
توضع في قالب مدهون متحرك القعر في فرن على 175 درجة لتنضج وتجتاز اختبار الكيك (حوالي 25-30 دقيقة)
تترك لتبرد على سلك معدني
تقسم من النصف
تخفق مكونات الحشو معا لتصبح خفيفة القوام
تحشى الكعكة بكوب من الكريما ويوزع الويفر
تغطى بالطبقة الثانية من الكعكة وتوزع الكريما على الكعكة والجوانب
تزين بحبات شوكولاتة الفيريرو روشية




Comments

  1. ممكن اتدلينا على اسم ويفر بالبندق؟ و نكسره ليصير بودرة مثلا و لا قطع اكبر؟

    ReplyDelete
  2. منال بس ملعقتين طحين بالكيكة؟!

    ReplyDelete
  3. أسفة للرد المتأخر.. اي ويفر ممكن وبكون زاكي وتكسيره وسط مش ناعم.. دكتورة شلير نعم بس معلقتين طحين

    ReplyDelete
  4. منال انتي مبدعه..شكلها من الاخر....وهشه صح

    ReplyDelete
  5. بموت في الفريرو روشيه

    ReplyDelete
  6. يسلمواا ايديكي
    كيكة طيبة ودسمة
    صح مكلفةة شوي
    بس بتضلها انظف واحسن ما نشتريها من الاسواق
    انا بصراحة بحب كل شي مشغوول بالبيت لانو بحس فيه بدف العائلة وحنان الام لما بتعمله لاولادها

    ReplyDelete
  7. يسلمو ايديكي منال بتشهي كتير و طعم البندق بجنن خصوصا مع استخدام النوتيلا اكييد خيالية

    ReplyDelete
  8. يممممي شكلها من اللآخر... أخ بس لو انعزم عليها ؛-)

    ReplyDelete
  9. This comment has been removed by the author.

    ReplyDelete

Post a Comment

Popular Posts