المسخن وخبز الطابون


آخر شهر بالسنة وكل عام وأنتم بخير... ولأنه آخر شهر فقررت يكون مميز على المدونة وملئ بالبوستات... شهر ١٢ ان شاء الله رح اركز على عدة أشياء :
١. أني رح اسميه "ما يطلبه الجمهور" لاني بدي أخصص كل الوصفات اللي فيه لطلباتكم واللي ما شاء الله بتعطيني أفكار للإمام ...فأي حد فيكم عنده أكلة معينة حابب يتعلمها يكتب تعليق بأسفل هادالبوست عشان ان شاء الله نخصص بوست لاله
٢. بما انه اخر السنة فقررت أني اركز على الأشياء الموجودة عندي بالبيت ( بالمونة والفريزر وبالثلاجة ) عشان أخفف مصاريف ورح أخبركم بآخر الشهر اديش وفرت وكيف)
٣. رح ابدأ ان شاء الله بوضع وصفة واحدة بالشهر كبداية مخصصة لحساسية القمح وحساسية الحليب لانه موضوع مهم كتير ولازم يتم النظر فيه 
٤. رح يكون في جائزة بنهاية الشهر لاكتر شخص بيعلق على المدونة ولازم يكون معرف ( يعني لازم يسجل كعضو) ويعلق باسمه لانه كتير بيكون في تعليقات بس غير معرفة ... والشخص اللي بيعلق اكتر بنهاية الشهر رح يحصل على جائزة حلوة رح احط تفاصيلها بكرة ان شاء الله او اليلة على الفيس بوك

فان شاء الله بيكون شهر لطيف وظريف وفيه تفاعل كبير منكم ومني...

اليوم اول الشهر وبالتالي موعد كتابة وصفة التحدي لجروب نكهة عربية... هاد الشهر تحدتنا حبيبتنا نسرين رحال انه نعمل المسخن الفلسطيني... ونسرين بطلبها كتبت
 "اكله المسخن من الاكلات الفلسطينيه اللي بتتقدم بالمناسبات و الافراح ووالجمعات الحلوة,, اكله معروفه كتير و مكوناتها كلها كانت تحضر من الالف الى الياء من زيت الزيتون المعصور من شجر الزيتون, لخبز الطابون من قمح الارض, للبصل و السماق و اللوز اللي يزرع في الارض و يستخدم في الطبخ,,, و الدجاج بربوا الاهالي في القرى ليستفيدوا منه في اكلهم و نحن رح نحاول نعملها بالمكونات المتوفره عنا لنحصل على اقرب طعمه للمسخن على اصوله :)ان شاء الله تعجبكم هل الاكله و تلاقي استحسان بعد تطبيقكم، و تدعوا لفلسطين و اهلها بالخير و النصر و الحريه ."

طريقة المسخن من نسرين رحال

المقادير :

4 ارغفه متوسطه الحجم من خبز الطابون (و من الممكن استخدام الخبز الايراني او الافغاني اذا لم يتوفر خبز الطابون)  لخلطه الدجاج :
 كيلو دجاج مقطع اربع قطع
 ربع كوب زيت زيتون اصلي
بصله مقطه ارباع
 سنين توم مقطع (انا صراحة ما حطيت)
ورق غار 
سبع حبات هيل صحيح
 2 عود قرفه
خمس حبات كبش قرنقل
 ملعقه صغيره بهارات مشكله مطحونه
ملعقتين كبار سماق بلدي ( لونه احمر فاقع و طعمته حامضه و حده)
 ملعقه صغيره ملح.
تلات ارباع كوب ماء
لخليط البصل :
9 حبات بصل مقشر ومفروم خشن
 3-4 ملاعق سماق بلدي
 نصف كوب زيت زيتون
 ملعقه صغيره ملح
 رشه كمون (اضافه من نسرين على الوصفه من اجل النفخه )
للتزين لوز و صنوبر مقلي

الطريقة:
 بعد تنظيف الدجاج جيدا يوضع في صنيه فرن مع اضافه كل المكونات السابقه عليه و نغطي الصنيه بورق القصدير و ندخلها الفرن على درجه حراره عاليه اول ربع ساعه, ثم نوطي الحراره الى 160 و نتركه ليكمل استواء. نرفع ورق القصدير عن الدجاج و نحمره لياخد لون جميل , و من ثم نطفي الفرن و نضع قطع الدجاج في طبق على جنب. نصفي مرق الدجاج و نتركه جانبا.
 في طنجره متوسطه الحجم نضع جزء من مقدار زيت الزيتون و نضيف البصل و على نار هادئه نقلب البصل حتى يذبل و يصبح لونه شفاف تماما, نطفي النار تحته و نضيف باقي زيت الزيتون و السماق و الكمون و نحركه جيدا , نضيف 4-5 ملاعق كبار من مرق الدجاج فوق خليط البصل و نتركه جانبا.
 الان لتطبيق المسخن : نحضر اول رغيف خبز , نوزع عليه كميه مناسبه من خليط البصل, و نرجع نرش رشه من السماق , نزين باللوز و الصنوبر و نضع رغيف الخبز الثاني فوقه , نوزع كميه من خليط البصل , ثم رشه سماق, ثم لوز و صنوبر و هكذا نكرر الخطوات مع باقي الارغفه. (بعدها من الممكن ادخال الخبز 5 دقائق للفرن حتى نحضل على خبز مقرمش قليلا او لا ليظل طري) . في الاخير على اخر رغيف خبز نضع قطع الدجاج فوق البصل و نرش السماق و اللوز و الصنوبر و يقدم بجانبه سلطه خيار بلبن او شوربه فريكه.


احنا بالاردن محظوظين بوجود خبز طابون بس بغير دول عربية مش متوفر ولأنه حتى الخبز المتوفر مرات بتحسوا طعم الكربونات فيه فقررت انه لازم اعمله بالبيت ولازم أشارككم فيه... أمي الله يسعدها ويخليها بتخبز الخبز العادي والطابون كله بالبيت... يمكن من ٦-٧ سنين ما بيشتروا خبز من برة فمين احسن منها يساعدني بالمهمة... فهي وصفتها لخبز الطابون وبدي تدعولها بالصحة والعافية .. وسعيدة كتير بانه صديقاتي بجروب نكهة عربية جربوا الخبز والطريقة المبتكرة والسهلة لعمله بالبيت وحبووه كتير...




خبز الطابون من ايدين ام علي
المقادير:
1/4 2 كوب طحين ابيض
3/4 كوب طحين اسمر
ملعقة صغيرة ملح 
ملعقة صغيرة خميرة
1/4 ملعقة صغيرة سكر
1/4 1 كوب ماء دافئ
ملعقة كبيرة زيت زيتون
1/2 ملعقة كبيرة بيكنج باودر
2 ملعقة كبيرة حليب بودرة 

الطريقة وبالخطوات ومع صور ( بالله في احلى من هيك... كيف انا معكم :)

١. تعجن المقادير بخلط المواد الجافة معا ثم نضيف الماء بالتدريج (قد لا نحتاج كل الماء وممكن نحتاج شوي زيادة حسب نوع الطحين وحرارة الجو ولازم تكون العجينة طرية وليس جامدة



٢. العجن بحدود 5 دقائق بالعجانة ثم تترك لتخمر ليتضاعف حجمها ثم تقرص كالصورة وحسب حجم الرغيف الذي تريدين (احنا اعملنا قطر 22 سم تقريبا) وتوضع على صينية مرشوشة بالطحين وتغطى لبدأ العمل فورا لانها لا تحتاج الى اعادة تخمير


٣. في هذه الاثناء بتحمي الفرن الى اعلى درجة حرارة وبتجيبي صينية عليها حجار ملساء (احنا بنسميها زلط) متوافرة عند اي مواد بناء او بالبحر الميت (مهم تكون طبيعية لانه في نوع صناعي بستعملوه مع النباتات ما بدنا اياه) انا امي بتحطهم بصاج زي الصورة بس طبعا ممكن صينية عادي ومهم تكون المنيوم ما تتجرح من الحجار..وبندخل الصينية الفرن ومنخليها تسخن منيح (زي مبدأ حجر البيتزا للي بيعرفه)


٤. بنفرد العجينة اللي قسمناها الى دائرة على سطح مرشوش بالقليل من الطحين وبنمسح الوجه بزيت زيتون خفيف (لانه رح نقلب الرغيف على الحجار وما بدنا الحجار تلزق بالرغيف)



٥. اذا عندكم مخدة مدورة زي الصورة بيكون ممتاز لانه بتنقلوا العجينة عليها وبتقلبوا الرغيف بمساعدة المخدة على الحجار بس اذا ما في (والعادي انه ما في) بتقلبوه بايديكم او ممكن صينية تانية بس المخدة بتساعد بالقلب (فرصة تستغلوا اي قماش قديم وتحشوه وتعملوه المخدة لانه بنستخدمها بخبز الصاج كمان)



٦. نطلع الصينية من الفرن وبنقلب الرغيف على الحجار الساخنة زي الصورة...طبعا بحذر..امي كانت تحط ايديها وترص العجينة على الحجر وانا في حالة ذهول :)


٧. وهي عن قرب.




٨. وبنرجعها على الفرن (الفرن اللي استخدمناه هو الفرن البلدي اللي اله بابين وهو بيحمر منيح وبسرعة ومن تحت وفوق سوا بس للفرن العادي رح تضطري تقلبي الرغيف لياخد لون على الجهة التانية

والريحة والطعم...ما تقولوش لعدوينكم عليها ...اكلت خبز وزعتر..وهي من جوة شكله



وهي صورة امي بترص العجينة فوق الحجار المولعة ولا بهمني!!!!!


ولانه الخبز شغل امي الله يعطيها الصحة والعافية فقررت اني اقتبس كلمات الشاعر الفلسطيني الرائع محمود درويش بصورة المسخن اللي عملته وكان لازم الحطة :)


صحتين على قلوبكم مقدما وموعدي معكم بكرة ان شاء الله بوصفة جديدة أنتو طلبتوها... فإلى لقاء..


Comments

  1. حبيت يسلمو هالايدين :)
    وانا من اللي جربوا الطابون على طريقتك ..طلع غرااااام...الله يخليلك الوالدة و يديم عليها الصحة والعافية

    ReplyDelete
    Replies
    1. حبيبتي فداء يسلم ايديكي...صورتك وتطبيقك رائعين وسلامة ايديكي يا قمر وشكرا للمرور :)

      Delete
  2. شكرًا كثير ألك على الوصفه الرائعه وخاصه الخبز
    راح اجربه على طريقه الوالده الله يحفظها
    أنا تعلمت طريقه من حماتي بس كانت تستخدم فرن الطابون
    والمسخن روعه يسلمو اديكي
    أنا عندي طريقه للمسخن ايظا تعلمتها من حماتي بتختلف عن طريقتك ان شاء الله راح اشاركم فيها

    ReplyDelete
  3. حابه أسالك عن أكله اسمها المسفن
    و هي أكله حلوه باستخدام زيت الزيتون
    أذا بتقدري تفديني فيها

    ReplyDelete
    Replies
    1. انا بعرف انه خبز بزيت زيتون وكركم وحبة البركة والسمسم واليانسون...مش شرط يكون حلو

      Delete
  4. شكرًا سوزان..، الطريقة هي طريقة صديقتي نسرين رحال وجد اروع من سلق الدجاج وبعدين حطه على البصل... بيضل الدجاج طري وزاكي

    ReplyDelete
  5. اذا حابة نعملها خليني اضيفها على القائمة :)

    ReplyDelete
  6. يسلموا ايديكي يا منال وايدين امك ويخليلك امك تاج فوق راسك ويخليلها صحتها وعافيتها ويخليلي امي وكل امهات العالم

    ReplyDelete
    Replies
    1. يسلمو.اديكي وادين الماما ويخليها الك يا ﺭﺏ

      Delete
    2. يسلمو نسرين طريقة بتشهي وشكرا منال لانك نشرتي الطريقة

      Delete
    3. شكرا دعد ورانية وسهام :)

      Delete
  7. شكرا كتير على هالوصفة الحلوة...
    وألف شكر وتسلم ايدين الوالدة ويخليها لكم تاج فوق رؤوسكم.. ويخلي كل أمهاتنا ويطول بأعمارهم ويعطيهم الصحة والعافية..
    ماشاء الله شو حبيت شكل إيدين الوالدة.. إيدين خبيرة وقديرة.. نفس شكل إيدين أمي.. ههه حتى الدبلة هي نفس الدبلة اللي ما بتنشلح ابدا وصار لها سنين... الله يحفظهم ويمد بأعمارهم بالخير..

    ReplyDelete
  8. دانيه ابو الروسDecember 2, 2014 at 5:08 AM

    يسلمو ايديكي كتير شكلو زاكيه والله يطول بعمر الوالده يارب

    ReplyDelete
  9. يسلمو شكله بشهي ؛) بس هلا الحاج بكون عليه مرقه بالاخر بدون ما نضيف مي عليه بالبدايه ؟

    ReplyDelete
    Replies
    1. احنا ضفنا شوية مي اذا بتنتبهي بالمقادير وعصارة الدجاج والزيت بيخلوا كمية منيحة واذا نقص ممكن تزيدي شوي

      Delete
  10. يسلمو علی الوصفة شكلها كتير طيبة

    ReplyDelete
  11. شكرا منال ويسلمو هالايدين انتي وماما .. ع فكرة انا بعمل مسخن بطريقة زاكية كمان بس بعجينة العشر دقايق بس بسمك العجينة شوي وبخبزها بصينية .. بس رح اجرب طريقة الوالدة بالخبز لانها عجبتني .. من الصور بتشهي ..بلقيس

    ReplyDelete
  12. الله يطول بعمر الماما ويعطيها الصحه.
    والخبز بشهي انشالله رح جرب اعمله.

    ReplyDelete
  13. يسلمو هالايدين بجد منظرهم زاكي كتير

    ReplyDelete
  14. يسلموو عهالوصفة جربتها و طله بيشههي

    ReplyDelete
  15. شيف اغلبك ممكن طريقة البسيسه؟؟ بتنعمل بنفس العجين؟؟

    ReplyDelete
  16. دعاء على علمي البسيسة كعكة من المغرب العربي

    ReplyDelete
  17. يسلمو ايديكي طريقة سهلة كتيييير بس في خطوة مافهمتها ، هلأ الدجاج بنحمرو بالفرن بدون مانسلقو ؟ ولا بنسلقو وبناخد المرق وبعدين منحمرو؟ مافهمت لانو مكتوب بنصفي مرق الدجاج

    ReplyDelete
  18. ديما ما بينسلق المي اللي بتطلع منه من الشوي بنصفيها من المطيبات

    ReplyDelete
  19. يسلموا ايدها للوالدة والله شي بشهي فعلااااا

    ReplyDelete
  20. Great recipe, I used it yesterday on naan bread. I had some family members over for Iftar and they loved it
    Thank you for sharing

    ReplyDelete
    Replies
    1. That is super... Glad you enjoyed it... Ramada Kareem

      Delete

Post a Comment

Popular Posts