مربى القرع (اليقطين) بكلس وبدون كلس

قائمة الطلبات لشهر 12 بدها كمان شهرين عشان البيها كلها هههههههه الله يقدرنا لانه انا بحب اني اصور الاكلة وبالتالي تلبية الطلب معناته اني لازم اعملها بغرض التصوير فاتحملوني شوي...اليوم طلبكم كان مربى القرع...يا الله استكمالا للاكلات اللي بالقرع ...حطيت الصورة على الصفحة وكتير فكروه مربى سفرجل وناس فكروه برتقال ...وانطلب مني مربيات عديدة منها الفراولة ومنها الباذنجان...انا شخصيا ما بحب مربى الباذنجان...بعتذر من اللي بيحبوه اذا زعلتهم بس ان شاء الله بنعمله عشانهم...

مربى القرع هلأ موسمه واله طريقتين....اهل نابلس بيعملوه قطع طويلة رفيعة وبيستعملوا الكلس او الشيد عشان يعملوه ورح احط الطريقة بس طريقة الصورة هو مربى عادي...فالطريقتين موجودين للي بيحب يستعمل اي واحدة فيهم...اهل نابلس بيقدموا حلاوة اليقطين او اذا بدكم مربى اليقطين مع الزلابية المقلية...بتشبه البوري ورح اعملها واحطها بكرة على المدونة مشان يكملوا بعض وكمان نلي طلب انه نعمل خبز البوري الهندي... 2 في 1... شو احسن من هيك



مربى القرع بالكلس

يقطع اليقطين الى شرائح رفيعة مثل عيدان الكبريت
كل 5 لتر ماء يذاب فيهم 3/4 كوب كلس ماعم (من عند العطار وكباتيلو دايما عندو)
يحرك الماء والكلس ويترك ليهدأ المزيج ربع ساعة
نأخذ الماء اللي على الوجه ونتخلص من الكلس المتبقي في القاع
 ونصب الخليط على القرع وينقع 12 ساعة 
نغسل القرع ونصفيه مرات بماء نظيف
نأخذ القرع ونوزنه وكل كيلو قرع نرشه ب 1/4 ملعقة صغيرة حامض الليمون او ملعقة طعام عصير ليمونونحرك جيدا ونتركه 1/4 ساعة ثم نضيف السكر كيلو سكر لكل كيلو قرع ونتركه بقدر ليلة كاملة او 3 ساعات على الاقل ونضيف 3-4 مسامير كبش قرنفل
نضعه على النار لمدة ساعة وثلث ونضيف ملعقة طعام عصير ليمون ونتركه يغلي 10 دقائق ثم يعبأ في مرتبانات ضغط معقمة بالماء المغلي ومصفاة تماما ومنشفة من الماء.



مربى القرع بدون كلس

يقشر القرع ويبشر على مبشرة خشنة ويرش برشة حامض الليمون ويترك ١٠ دقائق
يضاف لكل كيلو قرع كيلو سكر ويحرك ويترك ليلة كامله او ٦ ساعات على الأقل
يوضع على نار متوسطة ساعة وثلث ويضاف رشة عصير ليمون بالنهاية ويترك ١٠ دقائق ويرفع

الفرق بين المكلس وبدون هو الطعم النهائي.. اللي بالكلس بيكون بيقرش شوي وكتير زاكيين النوعين 



Comments

  1. تسلم ايديكي منال ويعطيكي الف عافية شكلك انت نابلسيه ؟
    انا من القدس تحية لكل اهل فلسطين والاردن

    ReplyDelete
    Replies
    1. وايديكي...جوزي من نابلس...انا لداوية :)

      Delete
  2. شكلو زاكي بس فكرتو مربى قشر البرتقال ممكن تنزلي طريقتو؟

    ReplyDelete
    Replies
    1. حاضر يا فرح رح اعمل يوست خاص للمربيات :)

      Delete
  3. تسلم ايديكي
    شكلو بيشهي واكيد الطعم روووعة

    ReplyDelete
  4. انا عمري ما جربت بالكلس بس طريقتك واضحة. رح جربها

    ReplyDelete
  5. يسلمو ايديكي الصور رائعة

    ReplyDelete
  6. يسلمو اديكي هاد على الوجع هادك اليوم بحكي لامي بس تيجي على امريكا جيبيلي كلس عشان تعمليلي مربى القرع بس امي لسه بدها لربيع بكون يمكن ما في قرع راح اعمل طريقتك بدون كلس يسلو يا عسل دوشت راسك والله بعرف.بس سامحيني بدي الدحدح :(

    ReplyDelete
  7. يسلمو ايديكي .. بس انا جربت طريقة عمل القطر وغلي القرع فيه وزبطت معي بس انا عندي مشكلة انو الوجه تاع مربى المشمش واليقطين بعفن ... كيف بقدر احلها وما اخسر المربى .. الطعم كثير روعة بس العفن !!!!!

    ReplyDelete
    Replies
    1. رش قرفة على الوجه مشان ما يعفن

      Delete
  8. انا فرزت قرع وحابه اعرف بقدر اعمل مربى منه ...

    ReplyDelete
  9. يسلموا ايديكي
    الوصفة والطريقة كتيييير مميزة
    واكيد رح اجرب اعمله قريبااا ان شاء الله

    ReplyDelete
  10. يسلمو اديكي ... نفس طريقة الماما... بس ممكن مربی زهر الليمون.. مره عملته وطلع مر كتير ..

    ReplyDelete
  11. يعطيكي ألف عافيه ست منال ♡

    ReplyDelete
  12. يسلمو الايادي شو انه ماشاء الله شغلك مرتب والتصوير تحفه انا دقته مره وحده لمربى القرع وكان مكلس كتير طيب

    ReplyDelete
  13. لوسمحتي عندي سؤال من وين ممكن نشتري اكياس الكريمه للتزيين وكمان اللي حاطاهم بالهديه الادوات كتير نفسي اجيبهم بس مو عارفه من وين هون بعمان

    ReplyDelete
  14. ابداع كالعادة يا منال الله يعطيكي العافية

    ReplyDelete
  15. بصراحة ولا مرة جربته..بس شكله زاكي..يسلموا ايديكي

    ReplyDelete
  16. مااطيبو هالمربى تيتا بتجبلنا اياه من نابلس مع خبز بيكون كلو زيت وفي حبة قزحة مابعرف شو اسممو ، وبنغمسو فيه زاكي كتيييير وبانتظار مربى الفراولة لانو استخداماتو كتيرة وعشاق الفراولة مابيقاوموه :)

    ReplyDelete
  17. ذكرتني بامي كانت تحب تعملو مربى وكنا ناكله وقتها وما نعرف انو قرع
    هههههه
    لانو نحنا ما بنحب القرع بالطبخ

    ReplyDelete
  18. شكرا وسلم ايديكي يعطيكي الف عافيه.

    ReplyDelete
  19. شكرا وسلم ايديكي يعطيكي الف عافيه.

    ReplyDelete
    Replies
    1. تسلمي سميرة سعيدة بمتابعتك

      Delete
  20. منال حبيبتي بدي اسألك شو الهدف من اضافة الليمون قبل اضافة السكر؟

    ReplyDelete
  21. اذا سمحتي اين اجد الكلس في دبي

    ReplyDelete
    Replies
    1. اهلا ...هو مفسه الجير وموجود بمحلات مواد البناء او العطارة

      Delete
  22. السلام عليكم أنا بأفريقيا و ما عم لاقي كلس شو فيني استبدله لاعمل مربى اليقطين؟

    ReplyDelete

Post a Comment

Popular Posts