معكرونة بالبندورة والسجق الحلبي


اليوم السبت موعد اول بوست للاسبوع وتأخرت بالبوست بس لاني انشغلت كتييير اليوم بمواعيد ووصلي وجيبي والي فترة من وقت الثلج مش مارقة على اهلي فقعدنا عندهم شوي ...فرح يكون البوست اليوم مختصر مفيد وزي ما اتفقنا..

اليوم السبت موعد منيو الاسبوع وقائمة المشتريات وهيها لهالاسبوع 
ملاحظة: لما رتبت قائمة الاسبوع قررت اني استفديد من الاشياء اللي عندي وما اشتري اشي جديد

السبت: بواقي ملفوف من امبارح
الاحد: برياني ، سلطة شمندر باللبن 
الاثنين: قلاية بندورة باللحمة وارز
الثلاثاء:  شوربة زهرة، بواقي
الاربعاء: اسباجيتي
الخميس: بواقي وسلطة
الجمعة: لسة مش مبين معي لانه ممكن نسافر (اكيد بخبركم ان شاء الله)

قائمة المشتريات :
 اسباجتي بس!!!!!!!! :) لو في شكل بيبين حد طاير عقله كان حطيته لانه اشي غريب اني ما اضطر اشتري اشي غير اسباجتي..جد!!!!

طيب وصفة اليوم هي لطبق مالح زي ما اتفقنا...طبق زاكي وسهل وباستخدام النقانق بدل اللحمة (مثال تاني على كيف ممكن نقدم وجبة متكاملة وغنية بالنكهة وبسعر ممتاز خاصة انه النقانق او السجق ارخص من اللحمة ومليان بالنكهة... انا استخدمت السجق الحلبي من منتجات نبيل ..كتييير زاكي وبتلاقوه بالثلاجة عند اللحوم الباردة 

معكرونة بالبندورة والسجق الحلبي
المقادير:
اصبع سجق حلبي مزال عنه الغلاف الخارجي ومفروم مكعبات
بصلة متوسطة مفرومة ناعم
2 حبة ثوم مهروس
حبة فليفلة خضراء مفرومة
3/4 باكيت معكرونة (انا استخدمت الشبرات لانه متوفر عندي)
2 ملعقة طعام كاتشب
علبة بندورة مهروسة (ممكن تستخدمو بندورة مقشرة ومفرومة حوالي 4 حبات)
1/2 كوب رب بندورة
1/2 كوب حليب مبخر او كريما طبخ (رح تكون اتقل)
1/2 ملعقة صغيرة بيزل
كوب من ماء سلق المعكرونة
1/4 كوب جبنة بارمزان للصوص
ملح، فلفل اسود

الطريقة:
في مقلاة واسعة تقلي السجق بدون زيت لانه رح يطلع دهون
نضيف البصل ونقلب ليذبل
نضيف الثوم والفليفة ونقلب
نضيف القليل من الملح والفلفل الاسود
نضيف البندورة ورب البندورة والكاتشب والبيزل ونتركها تتسبك قليلا 
نضيف الحليب او الكريما وكوب من ماء سلق المعكرونة (النشا في المي رح يساعد انه الصوص تكون اكثر سماكو وكريميه
تضاف المعكرونة المسلوقة والبارمزان وتقدم ساخنة





Comments

Post a Comment

Popular Posts