اجنحة الدجاج المشوية بالمشمش ومشروع صواني منزلية
يوم جديد ركض ركض ركض...ولسة بكرة معجوق اكتر....مش عارفة ليش هيك بس جد بحس حالي زي الجاجة المقطوع راسها مرات بتروح وبتيجي ومش حاسة بالوقت بس الحمد لله في انجاز...يا رب تباركلنا بالوقت...آمين...
اليوم من الصبح توصيل هارون على المدرسة وغسيل وتعزيل شوية اشياء وتحضيرات وطبخ وتصوير (هاد الجزء الممتع اللي بتمنى يكون اله وقت اكتر)..(هلأ ركضت على الفرن وانا بكتب البوست حطيت احمص لوز ونسيته بس الله ستر كم حبة تحمصوا زيادة والباقي كويس)..شايفين كم بطيخة ..غير جيبي هارون من المدرسة وطعميه وغيريله...الخ الخ الخ...
بكرة من الاشياء الحلوة اللي رح اعملها هي اني رح اشوف ديالا الدباس...رايحة للقاء على نشامى FM لنحكي عن غذاء الاطفال اللي عندهم توحد...وكيف الغذاء مهم في حالتهم...انا لازم اكون هناك 10:30 صباحا :) فاذا بتحبوا تابعونا على نشامى بكرة ان شاء الله
اليوم حسب جدولنا عنا وصفة سهلة وسريعة ورح تلاقي رواج كبير عند الكبار والصغار وهي اجنحةالدجاج بالمشمش...بالمشمش يا سي مشمش ..متذكرين التمثيلية..احم...يمكن اغلبكم كنتوا اصغر..المهم ...اكلة سهلة وسريعة...
اجنحة الدجاج
المشوية بالمشمش
المقادير:
كيلو اجنحة دجاج
كوب مربى مشمش
2 ملعقة طعام خل
تفاح
2 ملعقة صغيرة
صوص حار
ملعقة صغيرة
بابريكا
ملح وفلفل اسود
حبة ثوم مهروس
الطريقة:
تخلط كل المقادير
معا وتفرد الاجنحة على صينية غير لاصقة وتشوى بالفرن على حرارة 200 درجة من 35-40
دقيقة مع التقليب لتتحمر من جميع الجهات وتقدم.
اما الاشي التاني حسب الجدول فهو مشروعنا المنزلي الاسبوعي...خليني اكمل شغل الصواني اللي حكينا عنه..كان عندي صينية قديمة ومش حاببتها وكمان اشتريت صينية خشب مش بطاله ب 5 دنانير مرة..للاسف ما صورتهم قبل بس كانوا لطيفين بس حسيت مع التعديل صاروا احلى
الصينية الاولى رشيتها ازرق وخليتها تنشف
بعد ما نشفت
وبعدين جبت ورق حلو مناسب للون ولزقته عليها
والنتيجة النهائية صينية تقديم حلوة
والصينية التانية دهنتها او رشيتها ابيض لانه اللي تحت كان معرق بعدين رش اسود تبع الواح السبورة (بتلاقوه ب ACE بمكة مول)
وبعدين زبطت الحواف باني دهنتها بفرشاي لون ابيض والنتيجة شوفتوها بصينية السحلب على رؤيا ...صينية تقديم ممكن تكتبي عليها..تخيلوا مثلا تضيفوا صاحباتكم وتكوني عاملة عدة انواع فناجين قهوة اشي سادو اشي وسط اشي حلوة وتكتبي اسم كل واحدة على الصينية قدام فنجانها او رسالة لطيفة لزوجك مثلا وتدللي وتجيبيلوا القهوة وقطعة حلو وكلام حلو مكتوب بالطبشور...او تعملي زيي وتصوري وصفة وتكتبي اسمها على الصينية
بتمنى تعملوا الوصفة وتجربوا تحولوا اشياء قديمة مش حابينها لاشي حلو وجديد وباقل تكاليف...
علب الرش ما بيتجاوز سعرها ال دينارين للالوان ولون السبورة اغلى شوي بس بيضل فترة
اما الاشياء اللي تخلصت منها على مدار ال 3 ايام الماضية ( 21 اشي واغلبها كتب بس بتلم غبر) فهي
.JPG)
منشفتين منسلين من الجوانب رح يتحولوا لخرق للتنظيف
صحن تذكار رح اعمل فيه مشروع منزلي
مرتبان احمر انكسرت غطايته رح احوله لفانوس
قطع خشبية وحجر حف رجلين (ههههه) على القمامة
كنب للتوزيع(اكتر من 20 كتاب)
بتمنى انكم عم تشتغلوا معي بتعزيل بيوتكم والتخلص من الاشياء اللي ماخدة مساحة ومرهقانا ..مع حبي للجميع
يعطيكي العافيه الوصفه قريبآ راح اطبقها وفكرة الصواني رائعة يارب بكره اقدر اسمعك انت وديالا موفقه ان شاء الله
ReplyDeleteشو حلوين الصواني والوصفه غريبه ان شاء الله بجربها يسلمو ايديكي
ReplyDeleteشكرا كتييير الك على الوصفات وجد مبدعة بس لو سمحتي بدي اسال انا من اسبوعين رحت على ace وسالت عن الرش تاع الواح السبورة بس قالولي انو ماعندهم انتي شريتي من فترة قريبة؟
ReplyDeleteدانا والله الي فترة شارياه...بس مستغربة دايما كان يكون عندهم...جربي اسألي بمحلات الدهان لانه في كمان دهان بينحط على الحيط وممكن تجربي البشيتي
ReplyDeleteعنجد مدام منال انك مبدعة و طريقة كلامك بتجذبني..انا بحب الطبخ بس لسه ببداية مشوار الطبخ بس حبيت اعمل مدونه متلك تكوني زي دفتر اسجل فيه وصفاتي و اشعر اني بنجز كست بيت.
ReplyDeleteكتير بتفرج على وصفات على اليوتيوب من شفات عربي و اجانب و بتعلم ..بس صراحة انت متميزة بعرضك و تفاعلك مع ستات البيوت ..استمري ..دمت متألقة
و اسفه على الاطاله :)
شكرا حنين وبالتوفيق ان شاء الله :) وبحب دائما تتواصلي معي :)
Deleteتسلمي ..اكيد انا معك على طول :)
Deleteمنال حبيبتي معلش أطلب منك اذا تعملي بوست عن الأكلات اللي حكيتوا عنها للتوحد لأني ما حضرت البرنامج وأنا مش في الأردن هلأ أنا ابني الحمدلله ما عنده بس شاكين الدكاترة انه فيه طيف توحد هو لهلأ ما بيحكي وما بيفهم منيح علينا يعني أخته سنة ونص بتفهم أكتر ومع اني ضد المقارنات بين الأطفال بس الوضع مبين وحتى احنا من وهو عمره سنة ونص مش ساكتين هو حركته كتييييرة ما بيهدا ما شاء الله وعملناله كل الفحوصات وبتحسيه ذكي ومحبوب من الكل يعني شكلا ما فيه شي غريب بس عجزنا نعرف تأخره عل فكرة احنا بغربة وما بنشوف حدا وحتى ما بنطلع من البيت الا نادرا معلش أزعجتك بس قلت انه ممكن يكون عندك فكرة اذا بتعرفي أماكن كويسة أو دكاترة لأنه عجزنا وما حدا دلنا على شي ممكن نستفيد ونفيد هالطفل وصحيح هو هلأ 3 سنين وأشهر
ReplyDeleteاهلا وسهلا...انا ما حكيت عن اكلات كتير بقدر ما حكيت عن نظام الغذائي اللي بيكون خالي من الجلوتين (بروتين القمح) والكازين (بروتين الحليب) والحقيقة اني جربته لمدة 8 اشهر وما حسيت الفرق اللي حكوا عنه بعض اهالي الاطفال اللي عندهم توحد عشان هيك مش مثبت هاد الموضوع علميا تماما لانه 25% من الاهل لقوا فرق بولادهم من هدوء وبداية كلام وغيره...بالنسبة الي انا رجعت على الكل العادي مؤخرا وما لمست اي تغير على ابني (تغير سلبي) عشان هيك قررت ما اكمل...نصيحتي الك انك تقرئي عن الدايت والبدائل وتجربيه لمدة 6-8 اشهر تحت اشراف الطبيب وممكن تشوفي اذا لمست فرق بتستمري...وبالمناسبة هو مش دايت طول العمر يعني بعد ال 6 سنين بتبطلي لانه ببطل يفرق....ما قولتيلي..باي بلد انتي وهل بتروحى على علاج (سلوكي وفيزيائي ووظيفي ونطق) لانه هاي الطريقة الافضل والاحسن وهي ال Therapy وطبعا بدك تشتغلي مع ابنك بالبيت وكمان تحطيه بحضانة او مدرشة عشان يشوف اولاد تانيين ويحتك فيهم...ابني ما تشخص توحد بس اكيد تأخر وعمرة سنتين ونص وعم نعمل علاج وهو بالحضانة مع معلمة خاصة لتخليه يمشي مثل بقية الاولاد وكمان بنعمل مواعيد لعب مع اولاد تانيين مشان يتعلم يتفاعل ويلعب مع غيره...انا جاهزة لاي سؤال تاني او توضيح وممكن تبعتيلي بالايميل manal_obieda@yahoo.com
ReplyDeleteان شاء الله رح أحاول أبعتلك عالايميل أو اذا بتقدري عالانبوكس في الفيس أسهل هلأ أنا بالسعودية وهون بقولوا فيه كتير نسبة في الأطفال بس المراكز المهتمة بهتد المجال قليلة وخدمتها عدم يعني كتير من الأهالي اللي ودوا اولادهم بقولوا ساءت الحالة عن أول ووديناه أخصائي تخاطب بس بتحسيه عالفاضي لأنه ابني لسه ما بيفهم مزبوط ومش ممكن ينضبط بمكان معين عشان يركز ويتعلم ومزبوط لما نزلت عالأردن أخذته على مركز وقالوا بده علاج سلوكي بس من وقت ما رجعت لهلأ ما لقيت هيك شي للأسف :(
ReplyDelete