Three cold desserts to cool you off this Ramadan

بتفصلنا ايام قليلة للعيد....شو تحضيراتكم عادة بالعيد؟ انا من الناس اللي طبعا بكون معجوقة بسبب طلبيات العيد وطبعا باب النجار مخلع فما تضحكوا بالعادة ضيافة العيد بتكون اللي بيزيد من شغلي للزباين يعني ممكن يطلعلي 1/2 كيلو هون و1/2 كيلو هناك... بس هاد العيد كتير حابة اعمل اشياء جديدة ان شاء الله يسعفني الوقت..

التقليدي بالعيد انه الضيافة كعك ومعمول بس انا بحب اقدم اشياء تانية مثل الغريبة و الجوزية او البسكوت وهي لينكات لبعض الافكار اللي بتطلع روعة بالعيد....حتى الحلويات اللي رح اشارككم اياها اليوم هي حلويات بتطلع روعة لضيافة العيد...يعني ليش لازم بس كعك ومعمول وبسكوت...هاد العيد بجوز اغير واضيف اشي بارد لانه الدنيا ناااار يا حبيبي ناااار بس بوعدكم اذا عملت هيك رح اشارككم الحلو قبل العيد مشان تعملوه معي اذا حبيتو...

بس بما انه لساتنا رمضان والحلو البارد مطلوب خاصة بهالاجواء الحارة ...عمركم عملتوا مهلبية شوكولاتة خرافية بالقهوة؟ ولا جربتوا بوسيت العسل مع الفانيلا بين Vanilla bean؟ طيب شو بالنسبة للبوظة العربية؟ بهاد البوست 3 انواع حلويات اتمنى انها تنول اعجابكم ورضاكم كنوع من التعويض عن عدم كتابة بوستات كتير مؤخرا..

3 انواع حلو بارد سهليين ومرتبين لاي ضيافة برمضان او بالصيف بشكل عام بهالجو الحار

البوسيت هو حلو اوروبي سهل جدا جدا والمواد اللي بيطلبها جدا بسيطة بس مهم اختيار كريما خفق ممتازة (كريما حيواني) مشان النتيجة تكون افضل وكمان الطعم... 

بوسيت بالعسل

المقادير:

2 كوب كريما خفق

1/4 كوب عسل (ممكن تزيدوا شوي اذا بتحبوه احلى)

1/3 كوب عصير ليمون

عود فانيلا فريش (يقسم من النصف بالطول وتستخدم السكين من الخلف لازالة الحبوب ) اذا مش متوفر عادي باله ملعقة ونصف فانيلا سائلة

الطريقة:

توضع الكريما والعسل والفانيلا الفريش (في حالة استخدام السائلة تضلف في التهاية) بقدر على النار وتحرك لتغلي تخفض الحرارة وتغلى 3 دقلئق مع استمرار التحريك وترفع

يضاف عصير الليمون وتسكب بصحون وتبرد من 3-4 ساعات

والنتيجة كاسترد كريمي لززززيييييزز.... كريمي وحلو خفيف وحموضة منعشة....اشي لزيز خاااالص

شايفين الحبيبات السود بالكاسترد الابيض.... لا شيء يضاهي الفانيلا الفريش بس اذا مش موجود عادي استعملوا الفانيلا العادية

اما الحلو الثاني فهو من المفضل لدي واكيد لعشاق الشوكولاتة والقهوة في هذا العالم...

لما قررت اني اعمل هاي المهلبية كتير حبيت اضيف النكهة والطابع العربي الها....جربوها ورح تنال الرضا جدا

مهلبية الشوكولاتة بالقهوة والهيل

المقادير:

1/2 1 كوب كريما

1/2 كوب حليب

2 ملعقة طعام نشا

1/3 كوب قهوة تركية بالهيل

عود قرفة

5 حبات هيل

1/3 كوب شوكولاتة سيمي سويت يعني الغامقة بس مو المرة

ملعقة طعام كاكاو

كريما مخفوقة للزينة

الطريقة:

بقدر يوضع 1/4 كوب حليب مع الكريما

نضع القهوة والهيل بقطعة قماش شاش او بالعلبة اللي بنحط فيها اوراق الشاي وتوضع بالكريما وتترك ساعة لتاخذ نكهة الهيل والقهوة وتعصر الشاشة جيدا لاستخراج النكهة

يوضع القدر على النار مع الكاكاو وعود القرفة

يذاب النشا ببقية الحليب وحين يشارف المقدار على الغليان نضيف الحليب بالنشا ونحرك ليسمك

يرفع وتضاف الشوكولاتة وتحرك لتذوب تماما

تسكب بقوالب (انا استخدمت فناجين القهوة السادة...صراحة لقيتهم ممتازين لهاد الغرض)

تبرد عدة ساعات

تزين بالكريما المخفوقة

اما البوظة العربية بالفستق والمستكة فهي حدث ولا حرج من اكتر البوظة المحبوبة خاصة عند الاكبر سنا.. مرات بستغرب شو بيصير بحواس التذوق عندنا لما بنكبر وكيف انها بتنقلب 180 درجة...يعني لما كنا نروح واحنا صغار عند ناس ويضيفونا بوظة يطير عقلنا ...بس لما اشوف انها بوظة عربية ينقلب الحماس لخيبة امل كبيرة بالنسبة الي...بس هلا ابدا الموضوع مش هيك....عجيب كيف بنتغير... بالمناسبة البوظة العربية كانت ضيافة عرس ماما وبابا....وطبعا كانت تعتبر بمقياس السبعينات من الضيافة المميزة خاصة بالصيف بدل الكنافة...بهديك الايام ما احلاه كانوا يعزموا الناس ويضيفوا اشي بارد للشرب وبوظة او مهلبية او كنافة وخلص...ساعتنين زمن وخلص...يعني فعليا كان الهدف هو الاعلان والاشهار للزواج....وما يدفع الواحد اللي فوقه واللي تحته مشان يتزوج ...هاد وباب بيقولي جاب جرسونين للضيافة والكل اعتبر هاد الاشي انه مغلب حاله...ههههههههه عنجد الزمن انقلب تماما...

ما علينا نرجع للبوظة...

البوظة العربية

المقادير:

1/2 2 كوب حليب

1/2 كوب كريما

1/2 كوب سكر

3 ملاعق طعام نشا

6 حبات مستكة مطحونة مع ملعقة صغيرة سكر لتصبح بودرة

كوب فستق حلبي محمص ومجروش

الطريقة:

نأخذ 2/3 كوب حليب ونذيب بها النشا وتترك جانبا

في قدر على النار تسخن الكريما وبقية الحليب ليشارف القدر على الغليان ثم نضيف المستكة المطحونة

بعدها نضيف خليط النشا والحليب وتحرك على نار منخفضة من 5-7 دقائق لتسمك قليلا

ترفع وتترك لتبرد بحرارة الغرفة

تبرد بالثلاجة عدة ساعات

توضع بوعاء له غطاء وتوضع بالفريزر وتحرك كل نصف ساعة لتجنب وجود كتل من الثلج اويضاف الفستق عندما تصبح جامدة قليلا او توضع بالة البوظ وتستخدم حسب تعليمات الجهاز