Shawerma leftovers

المفروض كان في جزء تاني للطبخ الشهر هاد بس بعد مراجعة للوقت وعدد الوجبات المتبقي قررت اني ما اعمل اشي تاني خاصة انه الاولاد مسافرين (الكبار) على تركيا ب 22 الشهر مع بيت عمهم ففعليا عدد افراد الاسرة من غير شر رح يتقلص ل 3 وبالتالي استهلاك الاكل رح يقل بشكل كبير مشان هيك رح اوفر وقتي وجهدي وفلوسي وممكن هاي الوجبات تروح لشهر 8...

فعليا ومع وجود العيد بشهر 8 لسة لازم اقرر شو الخطة بناءا على المعطيات اللي رح تكون هل رح نسافر او نعمل ستيكيشن؟

بخبركم اكيد

في شغلة حابة احكيلكم اياها قبل ما اكمل البوست وهي اني بتمنى من كل قلبي انه اللي عم بقدمه بينال اعجابكم وبيفيد بس عشان اعرف ضروري انكم تتواصلوا معي باستمرار لتخبروني شو المواضيع اللي بتحبوا اعمل عنها فلوغز وشو تعليقاتكم على اللي بعمله وكمان تطبيقاتكم. كلها بامكانكم تعملوها باسفل كل بوست او تبعتولي خاص زي ما بتحبوا بس خلوني اشعر انكم معي...اتفقنا؟!!

هاد البوست رح اورجيكم شو عملت بمنطقة صغيرة من السطوح (هو لبنت حماي باميركا بس احنا بننشر الغسيل هناك وفعليا يدوب حد يطلع بس اتوقع السنة الجاي بالصيف بدها تسكن فيه ) بس حبيت اعمل قعدة صيفية مؤقتة يلعب فيها هارون هاد الصيف ويتسلى وانا اقضي وقت بهدوء وهو متسلي...

تعالوا معي اورجيكم قبل وبعد

فميزانية المشروع كانت 500 وزادت زي ما شفتوا بس معلش بيستاهل وفعليا كتير اشياء كانت عندي من اول فهاد اشي اسعدني جدا

وزي ما انتو عارفين فانا حاليا بحوش مشان مشروع تاني وهو تغيير كاونترات المطبخ...الله ييسر اموري واقدر باسرع وقت ممكن لانه خلص زهقت من العتمة بالمطبخ بسبب الارضية والكاونترات الغامقين..

وصفات اليوم الها دخل ببواقي الشاروما....اذا عملتي كمية شو ممكن تعملي بالبواقي...وانا عم بحكي عن شاورما اللحمة...شفتوا الفيديو تبعها على رؤيا؟

طيب وزاد عندك لحمة وحابة تجددي اطباق فيها شو ممكن تعملي؟

شو رايكم بالكاساديا؟
بواقي شاورما
بواقي بندورة وبصل
جبنة شدر وموزريلا
خبز تورتيلا
احشيه وحطيها بمقلاة غير لاصقة مع شوية زبدة لتسيح الجبنة واستمتعي مع صوص طحينة على جنب؟

طيب مين جربت البيتزا؟

بواقي شاورما
صوص الطحينة بدل صوص البيتزا
جبنة موزريلا
بوافي البصل والبندورة
عجينة البيتزا (الوصفة هون)


وشو رايكم بالفتة؟

طبقة 1: خبز مقلي او محمص بيتسقسق بشوية مرقة
طبقة 2: رز اصفر سادة
طبقة 3: بواقي شاورما

طبقة 4: بواقي بندورة وبصل وبقدونس

طبقة 5 صوص لبن مسنون بالقوم ومعلقتين طحينة

اسهل من هيك ما في..

دايما فكروا برة الصندوق وشو ممكن تعملوا ببواقي الاكل اكلات جديدة وابعتولي بحب اسمع منكم