Pickling 101 & Green Beans Makdous

الي فترة مشغولة ورح تشوفوا الفلوغ هلا وتعرفوا بشو بس كمان وضعنا الصحي ما كان باحسن حالاته الحمد لله...بالنسبة للجدول الشهري ما مشي مثل ما لازم بس مو اخر الدنيا...ما بتصدقوا الروتين اليومي بس اديش روعة...يعني نصيحتي اذا ما قدرتي تنجزي اشي بالجدول بس الروتين اليومي بيكون ممتاز وممكن تجربي تنجزي اشياء من اعمال الاسبوع والشهر واللي لو ما تمت هاد الاسبوع في الاسبوع اللي وراه والشهر اللي وراه فما تحبطي وتزعلي بس الروتين اليومي سحر بكل ما تعني الكلمة من معنى واللي بتشتغل لو صحيت ابكر بنص ساعة كل يوم بتطلع من البيت وهو في احسن خال وممكن تنجز نصه قبل النوم بانها تحرص ما يكون في جلي مو مجلي او مضبوب وكاونترات المطبخ نظيفة وتمسح غبر غرفة القعدة والازاز...نص ساعة بالليل ونص ساعة الصبح لم القمامة وضب التخوت ومسح سريع للازاز والغبر بيكون الوضع روعة بس ترجعي من الشغل...وقتها ممكن تحطي 1/4 ساعة لكل حمام (اهم شي يتنظف) والمطبخ وممكن تكنيس البيت وعلى الويكند بتنظفي عميق...

بعض النصائح:

- استثمري بمنفضة غبر بتنجز المهمة بشكل كويس واسرع

- فكري بنص ساعة بالليل قبل النوم ونص ساعة الصبح لروتين اليوم

- خلي الاولاد يساعدوا اذا امكن (اعملي نظام جوائز)

- فكري بموضوع الطبخ مرة بالاسبوع (بتتعبي يوم وبترتاحي طول الاسبوع) في بوستات قديمة بهاد البموضوع او ممكن تطبخي بفكرة مرة بالشهر على الاقل بتجهزي اللحمة وتحضري بعض الصواني

- لو ما قدرتي تنجزي اشي مش مشكلة بترجعي بتعمليه الاسبوع الجاي او لما تقدري...تموتيش حالك

ونيجي للمخلل...كتير انطلب مني فقلت نخصص اله بوست طبعا في وصفات كتير على المدونة خليني احطلكم بعض الروابط

مخلل اللفت 

مخلل سريع

مخلل الفجل السريع (بيشهي)

اهم النصائح لنجاح المخلل

- غلي الماء واذابة الملح وهو ساخن وتركه يبرد

- الملح الخشن بس (ملح الطعام ما بعطي نتائج جيدة)

- تعقيم المرتبانات قبل التعبئة (اما غلي او تعريضها للحرارة اذا بتتحمل الفرن شوي او ضع فوهتها قريب من لهب الغاز لتشوفي غبش جواتها) 

- استخدمي مرتبانات الضغط او نوع جيد محكم الاغلاق وانا بفضل الزجاج صحي اكتر وما بتفاعل مع الاحماض

- اختاري الخضار بافضل حالاتها مشان تكون النتيجة ممتازة

- مشكلة التعفن على وجة المخلل يمكن حلها بوضع ورقة خبز على الوجة بحيث تضمني انه تكون الخضار مغمورة تحت المي
- يفضل تخزين المرتبانات المفتوحة بالثلاجة

القاعدة الذهبية لاي نوع مخلل

لكل

كوب ماء

ملعقة طعام ملح خشن

لكل مرتبان وسط

فنجان قهوة خل

ملعقة طعام سكر

اضافات ممكنة

حبوب الماسترد

الشبت

الثوم الحب

شرائح ليمون

الشمندر لاعطاء لون لمخلل اللفت والزهرة والملفوف ) حبة صغيرة مقطعة شرائح (مغسولة ومش مطبوخة طبعا لكل مرتبان)
فلفل حار اما ناشف او اخضر وممكن شطة للي بيحبوا الحار

انا عملت مخلل بيبي خيار ولفت وملفوف احر (ما ضفت شمندر ...اللون من الملفوف) وزهرة مع شمندر ومخلل خضار (جزر وخيار وفليفلة ملونة وزهرة)

وهلا اشي تاني بشهي وهو مكدوس الفاصوليا...يعني اللي جعبالها مكدوس وفش باذنجان كويس....نعمل مكدوس فاصوليا وطعهة روعة وانا كلفته بكمية من الجوز...

مكدوس الفاصوليا
المقادير:
كيلو فاصوليا مقطعة (يفضل بلدية) وتسلق 3/4 سلقة
راس ثوم صغير مهروس
1/2 حبة فليفلة حمراء كبيرة
كوب جوز
ملح خشن
زيت زيتون
شطة (اختياري...انا ما حطيت)

الطريقة:
تطحن الفليفلة والجوز خشن
تخلط المكونات كلها ما عدا زيت الزستونوترش بملعقة ونصف ملح خشن وتوضع بمصفاة لينزل الماء منها
بعدين حطيتها بالمرتبان وقلبته على وجه بشكل مايل لينزل باقي المي بالثلاجة يوم كامل لتأكدت ما في سوائل
حطيت عليه زيت عمر وتركته اسبوع وبعدين استمتعي