Pistachio Panna Cotta with Strawberry Collie

كيفكم يا حلوين بتمنى اموركم تمام مع موضوع الحجر بالبيت وبدي اعتذر بشدة لاتي ماحطيت اي بوستات مؤخرا والسبب نوعا ما هو اكتر من واحد...

الوضع العام وشعور الواحد انه ايديه مربطين وهاد مربوط بالسبب التاني وهو قعدة الشعب بالبيت والصراحة انه ما عم بلحق بين تنظيف وغسيل وادير بالي على هارون وطبعا لانه وضعه خاص فهو مش زي الاولاد\ بعمره ممكن اتركه...ففعليا انا وخالد ماخدين شفتات مشان اقدر الحق على امور البيت والاصعب بالموضوع هو اني حاطة ببالي انجز اشياء وبالرغم من وجود وقت كبيييير الا انه بيروح وانا مش عاملة كل شي بدي اباه بس الحمد لله المهم انه احنا بخير واتمنى انكم بخير كمان

اذا بتابعوني على الانستغرام حاولت احط وصفات اساسية زي اللبن واللبنة والخبز بالخمبرة وبالبيكنج باودر وبدونهم كمان مشان الناس اولها وللاسف مو مجهزين حالهم منيح وهاد الاشي خلاني استغرب جد لانه الموضوع ما اجى فجأة وموضوع القعدة بالبيت كان دايما يلوح بالافق واجى تدريجي بعدين صار الزامي ولصدمتي في ناس ما عندها حتى طحين... اتمنى انكم كنتوا وما زلتو مجهزين حالكم واتمنى انه الناس تصير على قدر من الوعي شوي مشان ما نوقع بالمصايب اللي واقعة فيها الدول التانية.... الله يهدينا بس...

فلوغ اليوم سريع وفيو تغطية لبعض اعمال التخلص من الكراكيب اللي كانت بشهر 3 والحقيقة الشعور حلو كتير مش بس لانك بتتخلصي من وزن زايد وبتكسبي مساحات جديدة بالبيت لا وكمان لانك بتصيري تكتشفي اشياء ناسيتيها تماما ... مثل خزانة الحمام عندي...وعدت حالي ما اصرف قرش على كريم او سامبو او مستحضر...وضعي صعب...بشتري وبكوم وما بستعمل...مأساة

وبما انه قرب رمضان فان شاء الله رح يكون في وصفات خاصة للشهر الفضيل الكم خص نص ووصفات للكل على اليوتيوب...بتمنى انكم اتابعوا القناة

وصفة اليوم هي لحلو رائع وبيبرد على القلب وبنكهة الفستق الحلبي واللي مناسب جدا لرمضان

باناكوتا الفستق الحلبي مع صوص الفراولة

المقادير:

للباناكوتا:
2 كوب حليب
2 كوب كريما
1/2 كوب سكر

1/4 كوب زبدة لبفستق الحلبي

1/4 كوب قستق حلبي محمص ومطحون ناعم

1/2 4 ملاعق صغيرة جيلاتين بقري بودرة او باكيتين اذا استعملتوا الباكيتات
2 ملعقة طعام ماء بارد
رشة هيل بسيطة او فانيلا
للصوص:
كوب فراولة طازجة او مفرزة مطحونة بالخلاط
1/4 كوب سكر بودرة

1/4 كوب جلو فراولة

الطريقة:
يوضع الحليب والكريما والسكر وزبدة الفستق والفستق في قدر على النار ويحرك السكر ليذوب ثم تضاف الفانيلا او الهيل ويسخن المزيج دون ان يغلي ويرفع
في هذه الاثناء يذاب الجيلاتين بالماء ويترك دقيقة (رح يجمد ما تقلقي) يوضع بالمايكويف 1/2- دقيقة ليذوب ويصبح سائل لزج ويضاف لخليط الحليب الساخن ويحرك لنتأكد انه ذاب
تسكب بكاسات وتوضع فوقها صوص الفراولة توضع بالثلاجة على الاقل 4 ساعات

للصوص: تخلط المقادير معا بدون الجلو وتسخن بالمايكرويف ويذاب الجلو فيها 

والف صحة