نجرسكو

اليوم 31 ايار وهاد يعني انه اليوم الاخير من تحدي الطبخ من المونة وكتير مبسوطة بالتتحدي ونجاحه لاسباب كتيرة اهمها:

1-      التوفير ثم التوفير ثم التوفير ورح تشوفوا بالفيديو اديه صرفت على الاكل بشهر 5 بس باستخدام اللي عندي بالمونة والفريزر والتفكير برة الصندوق بوجبات غنية وممتازة وطبعا هاد ما كان ممكن لو ما بمشي على اسلوب بناء الخزين واللي بيحب يعرف عنه اكتر ممكن يروح على هاد الرابط

2-      استغلال الاشياء اللي عندي قبل ما تخرب واستهلاكها شعور ولا اروع لانه خلينا نعترف كلنا للاسف بنكب اشياء خلصت مدتها لانه احنا ناسيينها

3-      التفكير برة الصندوق بوجبات لزيزة ومنوعة وخاصة برمضان وتقديم هاد الحكي لعيلتي

4-      تنظيف المونة والفريزرات والثلاجة وفتح صفحة جديدة وبداية جديدة شعور جميل جدا

مهم كتير احكي انه سبب صرف هالمبلغ القليل هاد الشهر هو وجود كتير اشياء عندي من قبل وكمان التموين اللي عملته قبل الحجر فهاد ساعد كتير بالتوفير وسعيدة اني اقول انه لسة عندي مواد اساسية مثل الزيت والسكر والطحين والخميرة وكيس ارز بسمتي مش مفتوح (تحفة) بعتتلي اياه متابعة كلها زوق لانه زوجها الوكيل

ونيجي للوصفات فمن الوصفات اللي عملتها بهاي الايام كانت المعجنات بالطريقة اللي شفتوها بالفيديو وممكن تستخدموا اي حشوة بتحبوها

 الرابط للعجينة

الحشوات اللي استعملتها

1-      جبنة بيضاء

2-      سبانخ مقلب مع زيت وفطر وثوم من الفريزر وزدت عليه جبنة كريمية وشدر

3-      روست بيف من الفريزر مقلب مع زيت وبصل وفليفلة  وحطيت اجبان

4-      حشوة انشلادا _دجاج مع جبنة) من الفريزر

ممكن تحطوا لحم مفروم وممكن بيتزا...اللي بدكم اياه

اما الوصفة اللزيزة لمعكرونة النجرسكو فهي اكلة مشهورة بمصر بتنعمل بالدجاج والبشاميل  واستغليت فيها صدر دجاج وضفت ذرة ليبرك وكمان اخر ½ باكيت معكرونة فتتوتشيني عندي

نجرسكو

المقادير

250 غم معكرونة (انا استخدمت فتوتشيني)

صدر دجاج مفروم مكعبات صغيرة

ملعقة طعام زبدة

بصلة صغيرة مفرومة ناعم

2 سن ثوم مهروس

ملح وفلفل اسود

½ علبة ذرة كبيرة (ممكن استخدام اي خضار)

ملعقة صغيرة بودرة مرق الدجاج

للبشاميل

3 ملاعق طعام زبدة

3 ملاعق طعام طحين

2 كوب حليب

كوب كريما

ملعقة صغيرة بودرة مرق الدجاج

ملح وفلفل اسود وممكن رشة جوزة الطيب

ممكن اضافة شريحتين جبن لتعزيز النكهة

جبنة موزريلا للوجه حوالي كوب

الطريقة:

نقلب الدجاج بالزبدة ونرشه بالملح والفلفل الاسود

نضيف البصل ونقلب ليذبل

نضيف الثوم والذرة وبودرة مرق الدجاج

نحضر البشاميل بتحميص الطحين بالزبدة ثم تضاف بقية المكونات ويجرك ليغلي

نسكب المعكرونة بصحن بايركس ثم نضع الحشوة ثم البشاميل ثم الجبنة

تخبز على 180 من 25-30 دقيقة