Falafel

كل سنة وانتو بالف خير...باقي يومين للعيد والحمدلله السنة العيد جاي بوقت صعب لا فيو زيارات ولا عادات العيد التقليدية بس معلش مو غلط الانسان يتأقلم ويجدد ويغير بعاداته حسب الظروف..... ولانه العيد عنا فيو حجر 3 ايام وما في لا روحة ولا طلعة ومعناته ما في فطور من برة اول يوم العيد حبيت اشارككم وبناءا على طلبكم وصفة الفلافل

خليني اعترف اني وانا صغيرة ما كنت احبه ابدا يمكن لاني كنت اذوق طعم الكربونة او لانه كان يكون حار...بس لما كبرنا وتغربنا الامور تغيرت تماما

والفلافل من اشهر الاكل الشعبي بمنطقة الشرق الاوسط والحقيقة انه طعمه بيختلف من منطقة للثانية...يعني بالاردن غير الشام غير لبنان وغير الطعمية المصرية اللي باذن الله رح اعملها لانها كتير طيبة بس ما بتشبه الفلافل تبعنا....في وصفات قائمة تماما على الفول المجروش او المدشوش زي ما بيقولوا بمصر ووصفات قائمة على الحمص بس ووصفات على الخلط بين التنين....شو ما اخترتوا الوصفة فعليا واحدة....كيلو حبوب ناشفة  منقوعة قبل بليلة لتنفش مع بقدونس وكزبرة وبصل وثوم بينطحنوا وبعدين بنضيف البهارات ...الملح والكربونات تضاف قبل القلي مباشرة

ببلاد الشام ازكى ساندويشة بالدنيا هي ساندويشة الفلافل وبتتاكل مع سلطة طحينية او فلافل وحمص ومخللات ....وبنحب كتير الفلافل المحشي ببصل مذبل مع الزيت والسماق...

الفلافل انا بعملها كمية وبحطها بالفريزر زي ما رح تشوفو بالفيديو

من اهم عوامل نجاح الفلافل

-          استخدام حبوب ناشفة (معلب ما بينفع)

-          عدم اضافة الملح والكربونات الا وقت القلي

-          القلي بزيت غزير وحامي

-          عدم الاكثار من الحبات اثناء القلي

-          استخدام نوع كربونات جيد مثل Arm & Hammer or Parade مشان ما تلسع بالطعم

-          عدم الضغط على حبات الفلافل اثناء التشكيل ليكون نافش وجيد

الفلافل البيتية

المقادير:

كيلو حمص ناشف ينقع قبل بليلة بالماء ويصفى

½ 1 ضمة كزبرة

½ 1 ضمة بقدونس

بصلة كبيرة مقطعة مكعبات

6-7 اسنان ثوم

ملعقة كبية ممتلئة كزبرة ناشفة

ملعقة كبيرة ممتلئة كمون

فلفل احمر حار (حسب الرغبة)

للقلي

½ 1 كوب عجينة فلافل

1/2 ملعقة صغيرة كربونات (غير ممتلئة)

ملح

زيت غزير للقلي

اختياري (سمسم)

للحشوة في حال عمل فلافل محشية

بصلة متوسطة مفرومة ناعم تقلب بالقليل من الزيت وترش بالملح والسماق لتذبل وتبرد قبل الحشي

الطريقة:

تطحن كل مقادير العجينة ما عدا البهارات بماكينة فرم اللحم او مطحنة الطعام

تضاف البهارات فقط وتخلط

تبكت باكياس نسحب منها الهواء وتوضع بالفريزر

عند الرغبة بالقلي نأخذ الكمية المذكورة اعلاه ونضيف الملح والكربونات ونشكلها كما بالفيديو ونقليها على حرارة وسط الى عالية

يقدم مع صوص الطحينة والحمص والمخللات والخبز الساخن