Eggplants Fans with Kufta

 شهر 8 اجى وقررت اخوض فيو تحدي الطبخ من المونة للمرة التانية هاي السنة...بالعادة بخوض هاد التحدي 3 مرات بالسنة ...كل 4 اشهر تقريبا حسب مخزون المونة عندي وشعوري بانه اللي موجود ممتاز وممكن من خلاله اعمل وجبات ممتازة لعيلتي بدون ما اضطر اشتري كتير اغراض...حكيت قبل هيك عن الموضوع وقلت انه اللي بده يخوض هاي التجربة لازم قبل يكون عامل حسابه بانه يبني مخزون المونة عنده شوي شوي ويعتمدعلى العروض مشان يستفيد وما يصرف كتير..

الروابط لموضوع بناء المونة وكيف يتم وشو بالعادة بيكون فيه بالمونة بتلاقوها على هاد الرابط

هاليومين رح انزل بوست عن ادائي باول 10 ايام من شهر 8 وشو المنيو كانت بناءا على اللي عندي وموثقة بفيديو لليوتيوب كمان

بوست اليوم هو فكرة سريعة وتغيير بالشكل...هو اكلة مستوحاة من المطبخ التركي بين الداوود باشا مع باذنجان...يعني اشي لزيز وزاكي وشكله حلو ومختلف ...الشكل بصراحة بين الاخطبوط الصغير وبين المروحة بس احسن خلينا على المروحة هههههه

مراوح الباذنجان بالكفتة

المقادير:

باذنجان طويل ورفيع (انا استخدمت البتيري) مقطع بالطول بدون ازالة القمع مشان يضل محتفظ بشكلة ومرشوش ملح لتطلع المي وبعدين قليته بزيت غزير

للكفتة (اي خلطة بتحبوها) انا حطيت لحمة مفرومة وبصل وبهارات مشكلة وقرفة وملح وفلفل اسود عملتها اصابع صغيرة وشويتها بالفرن

للصوص: بندورة مفرومة وبصل وثوم وفليفلة سبكتها على النار وحطيت الها رب بندورة وشوية سكر وملح وماجي ودبس رمان

الطريقة:

حطيت الصوص بالصواني

لفيت الكفتة بالباذنجان مثل الفيديو

وحطيته فوق الصوص وشويته بالفرن حوالي 20 دقيقة على 180

تقدم مع الارزوممكن تدخنوها بفحمة اذا حبيتوا

طريقة التدخين (بنحمي فحمة صغيرة على النالر لتصير مجمرة (حمراء) وبعدين بنحطها بصحن صغير بيتحمل الحرارة وبنحطها بصينية الكفتة او الاشي اللي بدنا ندخنه وبنحط فوقها نقطة زيت ورح يبدأ الدخان بالخروج فورا وبنكون محضرين ورق قصدير جنبنا لنغطي الطبق ونحبس الدخنة وبتكرها شوي لتاخد الطعم