Feta, cucumber summer pasta salad

 سبق وحكيت كتير عن موضوع بناء الخزين وكيف يتم وشو الاشياء اللي لازم تعملوها وتستغلوها لتحققوا هاد الهدف واللي بيستاهل لانه بيخدم كتير اغراض:

1- التوفير لانك بتشتري الاشياء على العروض وبالتالي ما بتدفعي السعر الكامل بالايام العادية

2- توفير الجهد بدل ما تضلي رايجة جاي على السوبرماركت...وجود مخزون عندك بيساعد بتقليل مرات الذهاب للسوبرماركت وبالتالي توفير وقت وجهد واكيد فلوس لانه كل ما ندخل السوبرماركت الا نشتري اشي مو لازم

3-بتلاقيه وقت الطوارئ واللي بتشمل العزايم المفاجئة، الظروف الاستثنائية مثل الحظر اللي صار ومثل لا سمح الله تسريح من العمل (على الاقل ما بتقلقي لفترة على الاكل والمصروف لانك مرتبة امورك دايما)، حد مرض وتعبان وما في وقت للتسوق...الخ

والاشي الروعة فعليا هي قدرتك كل فترة لو كل 6 اشهر تعملي تحدي الطبخ من المونة واللي رح يوفر بلاوي هداك الشهر...

بالنسبة الي ميزانيتي لشهر 8 هي 100 دينار شاملة مواد التنظيف والاكل...

نشوف شو عملت وشو طبخت بالفيديو

وبسبب الحر الفترة الماضية السلطات اللي بتحسوها وجبة كاملة تعتبر اشي راتع زي سلطة الخيار والفيتا والمعكرونة

سلطة المعكرونة بالفيتا والخيار

المقادير:

كيس معكرونة زنبرك مسلوق

150 غم جبنة فيتا نوع جيد وبيحافظ على شكلة

2-3 حبات خيار مقطع

ضمة جرجير مفرومة

1/4 ضمة نعنع مفرومة

ممكن اعشاب تانية مثل الشبت او البقدونس او الكزبرة

للصوص:

حبة ثوم مهروس

عصير ليمون

زيت زيتون

يشر ليمونة

ملح

للوجة : رمان وممكن زيتون اسود او اخضر

الطريقة:

تخلط مكونات السلطة معا

نضيف الصوص حسب الرغبة

تزين بالرمان