Four Jar Salads that you can make ahead and enjoy all week

 وما زال الجو حار بعمان بالرغم من اقتراب موعد الاعتدال الخريفي ب 23 ايلول... وعشان هيك حبيت اني لسة استغل الاجواء واشارككم فكرة تحضير مسبقة لسلطات مشهية بتنفع لغداء بالشغل او المدرسة...هاي السلطات بتتميز بانها مشبعة جدا وشهية وبتنفع اكيد كصحن سلطة عادي

فكرة انه تعملي سلطة بمرتبان او تبروير هي فكرة مبدعة بصراحة واكيد مش من اختراعي بس هي فكرة ممتازة 

1- بتاخدي غدا بيتي مرتب ومفيد ومشهي معك او حتى وانتي بالبيت واذا بالشغل كتار من زملائك رح يحسدوكي عليه (اسالوني انا كيف كانوا يطلعوا علي بالمكتب وهمه يتشهونوا ههههههه)

2- يمكن تحضيرها مسبقا (انا بحضرها اول الاسبوع لكل الاسبوع وبتحافظ على حالها ممتاز وبس تشوفوا الفيديو بتعرفوا كيف...

3- طريقة ممتازة للاستفادة من بواقي الاشياء زي المهكرونة المسلوقة او الرز البايت او المعلبات

الاشياء اللي بتلزمك لتحضير هاي السلطات هي

- اكيد المكونات (واللي ممكن تغيري فيها للي بيناسبك)

- مرتبانات زجاج او تبرويرات زجاج ونصيحتي الزجاج لانه بيضاين احسن (في حال بدك تبعتيها مه اولادك على المدرسة استعملي البلاستيك الخاص بالطعام بس حاولي تحضريها قبل بليلة لافضل النتائج مش من اول الاسبوع)

وبس...سهل وبسيط وممتع وكل افراد عيلتك رح يكونوا ممتنين وانتي كمان رح تكوني ممتنة لحالك وانتي بتاكليها بدل شراء اشياء مكلفة من برة

نظرة سريعة على الفيديو رح تشوفوا اني وبكل السلطات كان عندي 5 عناصر اساسية

1- كربوهيدرات (برغل خشن، معكرونة، رز وممكن كينوا وكسكس وبرغل ناعم وفريكة وقمح...الخ

2- نوع بروتين سواء نباتي او حيواني (تونا، عدس، فاصوليا حمراء، جبنة فيتا....وممكن طبها انواع تانية مثل الدجاج واللحم والحمص وانواع اخرى من البقوليات وممكن انواع تانية من الاجبان...ونوعي وممكن تبدلي وتستغني عن اشياء ممكن ما تحبيها او غير متوفرة او في حساسيات معينة منها)

3- خضار سواء طازجة او معلبة او مخللة (بندورة، خيار، زيتون، جزر، فليفلة، ذرة، بصل...ممكن ملفوف ، بروكلي، بازيلا....الخ

4- ورقيات لاعطاء نكهة ومنظر واكيد قيمة غذائية عالية (جرجير، سبانخ، بقدونس، نعنع، زعتر، خس، كيل...الخ

5- الصوص واللي بنصح لما تخططي لهاد النوع من السلطات تكوني ذكية بانك تعملي واحدة اساسية وغيري بالبهارات للحصول على انواع مختلفة مناسبة لاغلب السلطات (مثلا ليمون وزيت او خل وزيت وطبعا ملح وبعدين بتضيفي المنكهات مثل الاعشاب او البهارات او الثوم او الفلفل الحار او جبنة البارمزان...الخ)

في فيديو اليوم حكيت باخر الفيديو عن بعض التكات اللي رح تساعدك وتخلي العملية اسهل من السهولة

1- التحضير المسبق

قرري شو السلطات اللي بدك تعمليها واشتري اغراضها وحاولي تكوني ذكية بانه تستفيدي من كل شي بتشتريه (يعني اشتريتي علبة ذرة ممكن تستعمليها باكتر من سلطة... وهكذا) وحضري كل الاشياء اللي بدها طبخ قبل بيوم زي طبخ الكينوا او البرغل او الفريكة او الرز ولانه لازم تكون باردة لما بنحطها بالسلطة ففعلبا طبخها قبل بيوم اشي جدا مهم واريح واضمن) والتحضير المسبق يشمل الصوصات والنرتبانات او التبرويرات اللي بدك تستعمليها

2- قاعدة اساسية بالتحضير انه اذا استعملتي مرتبان لو اشي بيدخل هو الصوص بعدين نوع الكربوهيدرات مشان الحوامض اللي بالصوص ما تخرب الخضار وتأثر على لونها واذا حبيتي ممكن انه تحطي الصوص على جنب )

3- قطعي الخضار كبير والورقيات مزع باليد مش فرم ليضل شكلها فريش وانا استعملت البندورة الكرزية الصغيرة بدون تقطيع مشان ما تنزل ميتها بالسلطة وبالتالي ضمان جودة احسن

4- في حال قررتي اضافة اي نوع خبز محمص او بصل مقرمش او شيبس خليه بكيس على جنب ويضاف عند الاكل ليضل محافظ على حاله

وخلينا نشوف الفيديو واللي عملت فيه 4 سلطات

تركية بالبرغل

مكوناتها برغل مطبوخ، عدس مسلوق، خيار، بندورة، زيتون اخضر، بقدونس، رمان، نعنع، وممكن جرجير

الصوص:

1/4 كوب رب بندورة

1/4 كوب ماء

2 ملعقة طعام دبس رمان

1/2 ملعقة طعام دبس فليفلة (اختياري)

ملح

عصير ليمونة

مكسيكية بالرز ومرة بالمعكرونة

استعملت الرز بواحدة والتانية عملتها بالمعكرونة

فاصوليا حمراء قلبتها مع بصلة وزيت زيتون وبهارات كمون وكزبرة ناشفة وبابريكا، ذرة، صلصة (بندورة، بصل، فلفل و كزبرة وعصير ليمون وزيت وملح)، زيتون اسود، كزبرة خضراء وشرحة ليمون

الصوص

عصير ليمون وزيت زيتون (كميات متساوية او كمية زيت اكتر شوي للي ما بيحبوا الحامض) رشة كمون وبابريكا وحبة ثوم مهروس

يونانية بالمعكرونة

استخدمت المعكرونة والبندورة والخيار والزيتون الاسود والجبنة الفيتا والبصل الاخضر والجرجير والفليفلة الملونة والصوص عبارة عن عصير ليمون وزيت وملح ورشة اوريغنو

سلطة تونا ومعكرونة

واستخدمت فيها المعكرونة والتونا والجزر البشور والفيفلة الملونة والزيتون والذرة وممكن جرجير او خس وبقدونس والصوص هي صوص اساسية من عصير الليمون وزيت الزيتون والملح 

ملاحظة : اللي عند حساسية من القمح ممكن اكيد معكرونة جلوتين فري او ما يستعملها وبدالها خس او نوع ورقيات

بتمنى تجربوهم والف صحة وهنا مقدما

وبالنسبة لطريقة الاكل عادي بتفرغوها بصحن وانجوي :)