Smores cake from mix; cooking from pantry challenge

 

وبدأنا شهر جديد ومش مصدقة انه صرنا بشهر 9 من هاي السنة اللي يا رب تمر على خير...سنة غريبة جدا ولا الناس اللي غريبة ولا الزمن اللي صار اغرب والله الواحد بطل عارف.... 

ما علينا وعدتكم اوثق اخر 10 ايام من تحدي الطبخ من المونة بشهر 8 وهي التوثيق للي طبخته كامل بالفيديو بتمنى يعجبكم ويعطيكم كم فكرة لزيزة

وصفة الدجاج سهلة كتير وذكرت النقعة بالفيديو

وصفة المعكرونة

وصفة المقلوبة 

فيديو عمل القالب للمقلوبة بهاد الرابط

وصفة اللازانيا

وبصراحة والحمد لله لسة في عندي اشياء ممكن امشيها لاول شهر 9 فرح استمر بالتحدي كمان اسبوع اذا قدرت باقل قدر ممكن من المشتريات...واكيد رح اوثقلكم اياها بفيديو

بحب اقولكم كمان اني اعدت ترتيب الثلاجة واللي ما شاف الفيديو ممكن يشوفه هون

وهي صورة للثلاجة بعد الترتيب

مهم اذكر انه كتير من المشروبات اللي انتو شايفينها بالثلاجة كانت من مشترياتنا ايام التحضير للحجر وبالتالي فعليا ما اشتريت اشي الا اللي ورجيتكم اياه بشهر 8

وصفة اليوم سهلة وبرضه بتعتمد بشكل اساسي على الاشياء اللي عندي اصلا واذا متذكرين شريت من كارفور 2 كيك مكس الواحد ب 49 قرش بس وعملت واحد منهم سمورز كيك

سمورز كيك

المقادير:

كيكة شوكولاتة محضرة كما تحبين (من خليط جاهز او وصفتك المفضلة واللي بيحب يشوف وصفة لزيزة ممكن بروح على رابط كعكة الشوكولاتة بالمدونة)

2/3 كوب كريما طبخ او خفق سائلة

كوب شوكولاتة شيبس او مفرومة (غامقة او حليب) حسب الرغبة

بسكوت مكسر حوالي 2/3 كوب

1/3 كوب شوكولاتة مفرومة (اختياري)

كوب مارشملو ميني

الطريقة:

تسخن الكريما مع الشوكولاتة بالمايكرويف او لوحدها وتضاف الشوكولاتة بعد ان تسخن وتبدأ الفقاعات بالظهور من الجوانب على الكريما (لا تغلى)

تحرك جيدا لتذوب تماما

نقوم بعمل ثقوب بعود خشب بالكيكة ونسقيها بالجناش (صوص الشوكولاتة)

تترك لتبرد بالثلاجة قليلا ويضاف البسكوت والمارشملو الشوكولاتة

يمكن تسليط التورتش (المسدس الناري...الاسم بيضحك بالعربي...مو عارفة اله اسم تاني)  على المارشملو ليتحمر قليلا وهاي خطوة اختيارية على المارشملو (شاهدوا الفيديو)