وصفة من كتاب جوليا تشايلد: بيف برونيون منمق بطريقة شرقية

 

كتير منكم طلبوا مني نستمر بعمل التحديات المختلفة مثل تحدي تنظيف المطبخ كله الشهر الماضي بحيث ما نقضي اكثر من 1/3 ساعة كل يوم لنغطي مهمة من المهمات اللي قسمناها على مدار الشهر... بشهر 2 ومع انه صار مارق 8 ايام منه الا انه وبالتأكيد ممكن نبدأ تحدي تاني بيناسبكم...

هاد الشهر عم بحاول اني اطبخ من المونة واني اخلص اد ما اقدر اشياء من الفريزر مشان افضيه استعدادا لتفريز اشياء جديدة خاصة لشهر رمضان الكريم

وعشان اقدر اعمل هاد الاشي كان لازم اعمل جرد لمحتويات الفريزرات اللي عندي مشان اعرف شو الاكلات اللي ممكن اني اعملها

الحمد لله رب العالمين عندي كتير اشياء صدقا ما بحتاج اشتري اشي بشهر 2 وخليني استعرضها معكم

لحم مفروم: من اروع وارخص اللحوم اللي ممكن تكون عندكم بالفريزر لانها بتدخل باكلات كتير من المعكرونة للصواني (كفتة، فطيرة الراعي...الخ)

رح اشارككم بكم وصفة باللحم المفروم باذن الله هاد الشهر

دجاج وعندي عدة قطع من افخاذ لصدور واللي برضه سهل تدخل باكلات كتيرة

لحم قطع راس عصفور مطبوخ (اكلتين) وعندي بازيلا وجزر مفرز فهي على الاقل طبخة بازيلا

لحم بعظمه لطبخة ورق دوالي ولطبخة منسف وعندي منسف بالمونة وخبز شراك بالفريزر

روبيان وحبار(ناوية اعمل اشي لدرس طبخ فيه)

سجق بيتي بتلاقوا الوصفة هون

فخدة خروف

لحم للكبة 

خضاروفواكة : عندي بروكلي وفليفلة ملونة وفليفلة حمراء مشوية وسبانخ وكوسا (رح استعملها لشوربة وحلويات) وكرفس وبازيلا وجزر وقرع مشوي ومهروس وبطاطا فرايز وبيريز وموز

في كمان ساندويشات عملتها لوقت الحاجة

واشياء جاهزة مثل: طبخة ششبرك، كبة يقطين، اصابع موزريلا، دجاج نجتس 

وبالثلاجة حاليا عندي

بندورة (كمية كبيرة رح اعمل منها صوص)

ليمون (رح اعصره وافرز لرمضان)

باذنجان

ملفوف

وبالمونة في بصل وبطاطا وبطاطا حلوة وثوم وشمندر 

وطبعا حبوب ومعكرونة ومعلبات واساسيات مثل الحليب والسكر والطحين والخميرة والكاكاو بالمونة

نعمة نعمة نعمة الحمد لله رب العالمين 

التحدي اللي حابة اخوضه وابتداءا من اليوم هو اني اشوف اديش ممكن اصمد بدون شراء شيء وبوعدكم اشارككم فيه وطبعا كل اللي عم بعمله مشان اقدر ارجع اعيد بناء مونة الفريزر بعدين واستهلك اللي عندي

ورح اخصص 50 دينار لشراء اي عروض لا نفوت

مين حابب يجرب؟ خبروني بالتعليقات

بوست اليوم فيو فيديو ليوم من حياتي ...نقول فيديو تحفيزي... بتمنى يعجبكم وفيو عملت طبق بيشهي وهو يخنة اللحم على طريقة الشيف الامريكية جوليا تشايلد واللي اشهر من نار على علم

طبعا الوصفة الاساسية فيها نبيذ وفيها بيكون وانا استغنيت عنهم وعملت بعض التعديلات البسيطة لتتناسب الوصفة معنا

يخنة اللحم

المقادير:

كيلو ونصف لحم عجل او بيف قطع كبيرة 

4 ملاعق طعام زبدة

2 ملعقة طعام زيت زيتون

ملح وفلفل اسود

بصلة وسط مفرومة ناعم

3 سن ثوم مدقوق

جزرتين مقشرين ومقطعين مكعبات كبيرة (ممكن جزر بيبي)

1/2 كيلو بصل صغير (يقشر بوضعه بماء ساخن 5 دقائق)

(يمكن اضافة البطاطا ولكن جمال الوصفة انه بترتكز على البيف وبيتقدم مع البطاطا المهروسة)

ملعقة طعام رب البندورة

1/4 كوب طحين

1/2 ملعقة صغيرة زعتر

ورقة غار 

5 اكواب مرق دجاج (او بيف)

علبة فطر طازج مقطعة شرائح 

الطريقة:

(استخدمت طنجرة الضغط الكهربائية واخدت 1/2 ساعة بعد الاغلاق لنضج اللحم قبل اضافة بقية المقادير ولكن الطريقة ادناه بطنجرة عادية)

تنشف قطع اللحم جيدا بورق المطبخ

نضع 2 ملعقة طعام زبدة وزيت الزيتون في قدر على النار

يحمر اللحم على دفعات ليأخذ لون بني جميل ويرفع

نضع البصل المفروم ونقلب دقيقة

نضيف الجزر والثوم وورق الغار والزعتر ونقلب ونضيف الملح والفلفل

يعاد اللحم للقدر ونضع الطحين ونقلب عدة دقائق

نضيف رب البندورة ونقلب دقيقة

نضيف مرق اللحم ونعدل الملح وعندما تغلي نخفض الحرارة وتترك لتطبخ لينضج اللحم تماما (ممكن تحتاج ساعتين الى 3 ساعات) ويجب تحريكها واضافة الماء المغلي اذا لزم الامر ويمكن اكمال الطهي بالفرن اذا سمح القدر بذلك

مهم لفت الانتباه الى عدم اضافة البصل الصغير من البداية لانه ذاب تماما لذا انصح باضافته اخر ساعة من الطهي

ولاني استخدمت طنجرة الضغط الكهربائية فقد اغلقت الطنجرة بمجرد اضافة المرق الساخن وضبطت الوقت 1/2 ساعة

نأخذ بقية الزبدة ونقلب الفطر ليصبح ذهبي خفيف ويضاف للحم

تترك لتغلي على نار هادئة ويمكن تعديل السماكة باضافة القليل من النشا المحلول بالماء اذا كانت سائلة او ترك جزء من السائل ليتبخر او زيادة الماء اذا كانت سميكة جدا مع تعديل الملح والفلفل 

تقدم مع البطاطا المهروسة