فيديو بالمطبخ وسلطة المعكرونة بالخضار المشوية والبستو

 

الي اكتر من شهر مش حاطة وصفات على المدونة بس فعليا متابعيني على الانستجرام واليوتيوب بيعرفوا اني عملت حوالي 20 حلقة من برنامج رمضاني وكل الوصفات ممكن تلاقوها على قناتي باليوتيوب.

مش رح اكذب عليكم بس النفسية مش بزيادة هالايام ولاسباب كتيرة احدها اكيد الاحداث والتطورات الاخيرة بفلسطين بس كمان في اسباب شخصية اكيد متعلقة باني لساتني مش قادرة اقول اني تجاوزت محنتي الاخيرة والصراحة مش عارفة اذا ممكن اتجاوزها ابدا... بحس انه في اشياء بالدنيا كتير ممكن ننساها بس بوضعي النسيان مش صعب بل يكاد يكون مستحيل

على الصعيد الصحي حاسة حالي بحالة خمول كبيرة واضطريت اني اروح على الدكتور قبل كم يوم لاشوف وضع الفيتامينات واللي انا متأكدة رح يكون تحت الصفر.... الله بيعين والله يهونها

فيديو اليوم لزيز لاني فعليا عم بحاول استفيد من الاشياء اللي موجودة عني بالفريزر بالذات ورح احكي عن الموضوع اكتر بالفيديو

من وصفات الفيديو عملت سلطة معكرونة بالبستو بتشهي

سلطة معكرونة وخضار مشوية بالبستو

المقادير:

باكيت معكرونة حوالي 350 غم زنبركية مسلوقة ومصفاة

مجموعة من الخضار مثل البروكاي والبصل والفليفلة الملونة مرشوشة بزيت ويتون وملح وفلفل اسود ومشوية بالفرن

كوب بستو

1/2 كوب جبنة بارمزان مبشورة

ممكن اضافة الجبنة الموزريلا الميني الطابات (اختياري)

الطريقة:

تخلط المكونات معا وتقدم باردة وممكن اضافة المزيد من الاجبان او البستو حسب الرغبة