وجباتنا باسبوع ووصفة الكشري السريع ووصفات اخرى

 كيفكم يا حلوين...

فيديو اليوم نوع جديد من الفيديوهات حابة اني اعمله مرة بالشهر على قناتي على اليوتيوب اخدكم معي بوجبات لاسبوع كامل نشوف مع بعض شو عملت خلال الاسبوع من وجبات بالعادة رئيسية وممكن حلو

وزي ما شفتو الوجبات اللي غطيتها بهاد الفيديو اشي منها معروف زي محشي الكوسا واشي منها سريع زي الكشري بتويست سريع واشي منها استخدام بواقي زي بيتزا التاكو واشي باستخدام اشياء جاهزة مثل الباي والكيك واشي بطريقة تقديم لزيزة زي صينية التاكو وهكذا...

وصفات اليوم بالفيديو كانت كالتالي:

اليوم الاول:

ساندويشات فيلادلفيا ستيك باللحم المفروم والطريقة جدا سهلة...

لحمة مفرومة حطيت معها بصل مكرمل وفطر وشوية ورستشير صوص وملح وفلفل اسود واستخدمت شوربة الفطر اللي فرزتها معكم برمضان وحشيت الساندوشات مع جبنة ودهنتها بزبدة بالثوم وخبزتها على 350 مغطاة حوالي 20 دقيقة وممكن تحمروا وجهها 5 دقايق

اليوم الثاني عملت كشري سريع وبيشهي

الكشري السريع

المقادير:
2 بصلة كبيرة

كوب زيت

نص كوب شعيرية
كوب أرز
نص كوب معكرونة صغيرة (انا استخدمت صدف)
ربع كوب عدس بني يفضل حبة كبيرة( منقوع قبلها بساعتين )
نص كوب اسباجيتي مكسرة 

ملح

ملعقة كبيرة كمون

بودرة ماجي طبيعية

لصلصة البندورة:
بصلة مفرومة ناعم جدا
٢ ثوم مهروس
2 ملعقة كبيرة معجون بندورة
2 حبة بندورة مطحونة

معلقة ك ( ملح .. كمون .. كزبرة ناشفة.. شطة اختياري )
معلقة صغيرة سكر
معلقتين كبار خل

للدقة :
٢ ثوم مهروس
معلقة ص ملح
ملعقة كبيرة من كل من الكمون والكزبرة

٣ معالق كبيرة خل
معلقة كبيرة عصير ليمون
3/4 كوب ماء

الطريقة :
نقطع البصل شرايح رفيعة ويفضل البصل النهدي ورشيته بالطحين
نحمي الزيت زنقلي البصل دفعات ليتحمر ويرفع

ناخد زيت من زيت قلي البصل ..
نحمر فيه الشعيرية ونضيف الرز المغسول والمنقوع ونقلب ثم يضاف العدس ونقلب دقيقة

نضيف الكمون والملح وبودرة الماجي الطبيعية والمعكرونة
.
نضيف ماء مغلي ليغمر الخليط بحوالي عقدة اصبع (سم ونص) 

تخفض الحرارة عندما تغلي وتغطى لتنضج

الصلصة :
ناخد المزيد من زيت قلي البصل  ونضيف البصلة والثوم مع معجون البندورة ونقلبهم جيدا  علي النار مع إضافة البهارات
ثم يضاف الخل

والبندورة ونتركها تتسبك لمدة نص ساعة على نار هادئة .

الدقة :

معلقة زيت بسيطة من زيت قلي البصل ونضيف الثوم والبهارات ونقلب بدون ان يتغير لون الثوم ثم نضيف الخل والليمون والماء ونتركها تغلي دقيقتين ونتركها تبرد قبل التقديم

وعملت بهاد اليوم بيتزا التفاح والوصفة هون

اليوم الثالث كان عندي بواقي وعملت رولات بيتزا استخدمت فيها عجينتي المعتمدة والحشوة زي ما بتحبوا وانا بدي امشي تيركي عندي...طريقة العمل بالفيديو والعجينة هون 

اليوم الرابع عملت تاكو بيشهي... لحمة مفرومة وعليها البهارات اللي عملتها معكم بالفيديو السابق (وصفة بهارات التاكو بتلاقوها هون)

وجنبه كل الاشياء زي البندورة والخس والجواكامولي (وصفتها هون) واستخدمت الافوكادو المفرز

اليوم الخامس كان عندي بواقي وكنا معزومين فعملت سلطة بالمفتول سلقته مثل المعكرونة وحطيت بقدونس ونعنع مفروم وبصل اخضير وشمندر وجبنة فيتا والصوص ملح وليمون وزيت زيتون...بتشهي

وعملت كعكة بالليمون عبارة عن كيكة بيضاء باستخدام خليط الكيك الجاهز وبس بردت سقيتها بجلو ليمون ساخن بعدين خفقت حوالي 1/2 1 كوب كريما خفق مع باكيت بودينج الليمون السريع وممكن بداله تستخدمو جلو بس النكهة والقوم رح يتختلفوا شوي 

اليوم السادس عملت اكلة بالدجاج والبطاطا واندومي وهدول رح يكونوا بفيديوهين خاصيين قريبا باذن الله

اليوم السابع

عملت كوسا محشي وبيتزا تاكو باستحدام بواقي لحم التاكو وسلطة لب الكوسا بالنعنع وشوربة بواقي المحشي.

بتمنى يكون البوست اعجبكم واعطاكم افكار...بحب اسمع منكم وشكرا للمتابعة