Turkish Semolina Dessert with Ricotta filling

12 يوم بدو من الشهر وللاسف هاد اول بوست بس كنت مشغووولة زي المجانين الفترة الاخيرة باكثر من شغلة بس لعله خير...

ما رح اطول كتير بس عندي مجمل اشياء احكيها ومنها اني لم انجح تماما بالشهر الماضي بتحدي الطبخ من المونة وصرفت بحدود ال 200 دينار مش 150 بس لسة ممتاز ...

البوست الجاي باذن الله رح احط هدية الشهر والفائزة فيها منكم حسب القرعة الاكترونية...

حابة كتير بشهر 12 اعمل اكلات للفريزر لانها رح تسعفني بما انه في اهل رح يجوا على الاكيد بهديك الفترة فبدي يكون عندي اشياء بالفريزر تحل ازمة فعلى الاغلب رح اعمل فيديو لقناتي لليوتيوب وفيديو خاص الكم ...ربنا ييسر

فلوغ اليوم هو تكملة لديكورات الخريف وهي لحيط بالممر عندي كان منطقة ميتة تماما...

اللي عملته هو

استخدمت رفوف من جولي شيك الهم عندي الف سنة بس دهنتهم

اشتريت النش من ايكيا ب 11 دينار!!!! جد ومش سيل يعني مش عارفة حق شو بالزبط :)

السلات اللي جوة الهم فترة عندي من الشخشير

الاكسسوارات اغلبها عندي من اول

الفريمات عملتها معكم بالفلوغ وعرفتوا قصتها

الكوشينز جداد من امازون

بقدر اقول بالمجمل كلف بحدود ال 50 دينار...مش بطال خاصة اني رح اضل اغير الديكورات ..يعني البنش والسلات والرفوف رح يضلوا.... والصراحة لسة بدي اضيف كلمات حلوة تلزيق جبتها من جولي شيك على الجزء الثاني من الحيط بس يخلص بكون غيرت الديكور بالمرة وبورجيكم كله...

وصفة اليوم هي لحلو اكلته مع خالد بتركيا بيشهي...زكاوته دافي وجواته بوظة.... ذكرني بالمأمونية الحلبية...اللي بده وصفتها يضغط الرابط...

بس بما اني ما بدي اعمله بالبوظة وعندي جبنة ريكوتا بالثلاجة قررت اخلط ريكوتا وقشطة للحشوة واخليه بارد لياخد شكل قالب السيليكون...وصفة الريكوتا المنزلية بتلاقوها على المدونة على الرابط التالي

البسبوسة التركية بالسميد والجبنة

المقادير:

4 ملاعق طعام زبدة

كوب سميد ناعم

كوب سكر

نصف كوب ماء

كوب حليب

رشة فانيلا

رشة قرفة

للحشوة:

2 ملعقة طعام ريكوتا

1/2 علبة قشطة

الطريقة:

بمقلاة نحمص السميد بالزبدة ليصبح لونه ذهبي فاتح

نضيف السكر والماء والحليب وبقة المكونات ما عدا الحشوة ونقلب وترفع

بقوالب السيليكون نوزع 1/2 الكمية على القوالب (لنا عملت 6 من هاد الحجم) 

بعدين الحشوة

بعين الكية المتبقيو من السميد ونرصها

نغطيها ببلاستيك ونضعها بالثلاجة عدة ساعات

نقلبها وتقدم مع رشة الفستق الحلبي والقطر

بتشهي سخنة كمان :)