شوربة فريكة ولازانيا وجائزة شهر 12

يوم حافل من الصبح وملئ بالنشاط...بحب انتهز الفرصة واشكركم من كل قلبي لكل كلامكم الحلو واللطيف على صفحتي على الفيسبوك واللي اكيد بتعطيني الدفعة للتقدم للامام...

ندخل بالمفيد...قائمة الطلبات عم بتكوم يوم بعد يوم...هههه وانا اكيد سعيدة بكل طلباتكم وبتمنى اني اقدر البيها بشهر 12...بس بالاول خليني احكيلكم عن الجائزة اللطيفة اللي رح تكون من نصيب الشخص الاكثر تعليقا على المدونة والشروط هي:
1. ان يكون مسجل كعضو وهاد الشي مهم عشان يقدر يعلق ويطلع اسمه
2. ان يعلق على بوستات المدونة ولازم يكون التعليق ذا محتوى له معنى,,,يعني مش يحك تالاتلاتلاتل....هههههه مثلا..
3. يحسب اكثر من تعليق على نفس البوست بانه تعليق واحد
4. رح اعلن عن الفائز/ة يوم الاربعاء 12/31 ان شاء الله...فشدوا همتكم

الجائزة هي:
ستاند كب كيك ل 41 كب كيك
باكيت اكواب كب كيك ورقية
15 كيس كريما بلاستيك
طقم اكواب معيارية
ملعقة زينة
عبوتين للكريما مع فوهات تزيين نوع كون ريكون
طقم مساكات


بتمنى تلاقوها لطيفة وتعجبكم...ويالله نشوف مين الرابح معنا هاد الشهر باذن الله

اما وصفات اليوم فانطلب مني شوربة الفريكة وكمان اللازانيا...وبعرف كتير منكم بيعملوهم بس للي طلبوا هي طريقتي

شوربة الفريكة رائعة جدا ووالدي بيسميها ملكة الشوربات...انا عملتها بالدجاج بس ممكن باللحم قطع صغيرة

شوربة الفريكة بالدجاج
المقادير:
ملعقة كبيرة زيت
بصلة صغيرة مفرومة ناعم
كوب فريكة ناعمة مغسولة
2 صدر دجاج مسلوق ومفسخ
مرق دجاج (حوالي 5 اكواب)
1/2 ملعقة صغيرة هيل
ملح
فلفل اسود

الطريقة:
يوضع الزيت في طنجرة الضغط وتضاف البصلة وتقلب لتذبل وتصبح شفافة
تضاف الفريكة والهيل والدجاج والملح والفلفل الاسود وتقلب
يضاف المرق وتغلق وتترك على نار عالية لتبدأ بالصفير ثم تخفض الى نار هادئة 1/2 ساعة وترفع وتترك لتبرد تماما قبل فتح الطنجرة (ممكن عملها بطنجرة عادية وستأخذ وقت اطول
في حال قلت كمية المرق ممكن اضافة الماء وتعديل الملح حسب الرغبة
وصحتين



اللازانيا من الاطباق المحببة جدا الي وزمان بتذكر كيف كانت مكلفة جدا (وما زالت) وكيف مرات كنا ناكلها انا وصاحبتي ايمان (سلامي الها) بليتل سيزر ونكون في قمة الاستمتاع بعد يوم طويل بالجامعة...عادة نطلع اول الشهر بس نقبض المصروف اما على ليتل سيزر او على تشيلي هاوس اللي قبال البوابة الرئيسية بالجامعة الاردنية...بعدين نقضيها ساندويشات بطاطا وحلوم لانه نكون طجينا مبلغ بالشبرقة اول الشهر...

المهم نرجع لللازانيا...في انواع كتير من اطباق اللازانيا ونوع اليوم هو اللي منعرفه اكتر اشي واللي اسمه بولونيز

صوص البولونيز اللي رح نستعملها للازانيا ممكن طبخها وتقديمها مع الاسباجيتي...رائعة

لازانيا بولونيز
المقادير:
12 شريحة لازانيا وانا بحب باريلا وفيكم تستعملو النوع اللي ما بده سلق وهو اريح بس اغلى او النوع اللي بده سلق وبينسلق كل 3 سوا بطنجرة مي مغلية وبس يستوي بقيمهم وبصفتهم على صينية وبسلق الباقي وهيك مشان ما يلزقوا ببعض . اذا استعملتو النوع اللي ما بده سلق خلص مثل ما هو واذا ما بدكم تسلقوا بس زودوا المرق بالصوص وغطوا وجه اللازانيا قبل وضع الجبنة بالالمنيوم عشان تستوي وبعد 1/2 ساعة بترفعوه وبتحطوا الجبنة وبتخلوها تسيح

للصوص:
      4 ملاعق طعام زيت زيتون
      2 ملعقة طعام زبدة
 بصلة كبيرة مفرومة ناعم
 ½ كيلو لحم بقري مفروم ناعم
 3 سن ثوم مدقوق
 اصبع كرفس مفروم ناعم
 حبة جزر مفرومة ناعم
 2 علبة بندورة مفرومة ناعم
 علبة معجون بندورة صغيرة
 كوب مرق دجاج + ½ كوب ماء مغلي
 ورقة غار و طرف قطعة جبنة البارمزان الجزء اليابس من الطرف     
 ملعقة صغيرة زعتر ناشف
 ملعقة صغيرة بيزل (حبق ناشف)
 ½ ملعقة صغيرة فلفل احمر ناشف
 ملعقة صغيرة تايم  Thyme اختياري    
ملعقة صغيرة سكر
 ملح وفلفل اسود
1/2 كوب حليب

للبشاميل:
3 ملعقة طعام زبدة
ملعقة طعام طحين
3 كوب حليب
رشة جوزة الطيب
ملح ، فلفل اسود

2 كوب جبنة موزريلا
كوب شدر
1/2 كوب بارمزان
  
  الطريقة:
للصوص 

        يوضع الزيت والزبدة في قدر على نار متوسطة و تضاف البصلة وتقلب حتى تصبح طرية ثم يضاف اللحم حتى ينضج ويملح ويرش بالفلفل الاسود ثم الثوم والكرفس والجزر وتقلب جيدا
       تضاف البندورة ومعجون الطماطم والمرق وورق الغار والاعشاب والسكر وتترك حتى تغلي ثم تخفض الحرارة وتترك لتغلي على نار خفيفة حتى تتسبك حوالي نصف ساعة مع التحريك من حين لآخر. يضاف ½ كوب الحليب وتحرك وتترك لتتسبك ¼ ساعة.
       ترفع ورقة الغار وقطعة الجبنة.

تخلط الاجبان سوية

يحضر البشاميل باذابة الزبدة وتحميص الطحين ثم الحليب والبهارات وعندما تغلي ستسمك ويرفع

مرحلة التجهيز:
يوضع القليل من صوص البولونيز بقاع الصينية ونبدأ بالترتيب التالي:
تصف 3 اوراق لازانيا
صوص
بشاميل
القليل من خليط الاجبان
ونكرر لننتهي بالجبنة

توضع في فرن على 180 لمدة 1/2 ساعة والف صحة





Comments

  1. راااااااااااااااااااائع

    ReplyDelete
  2. This comment has been removed by the author.

    ReplyDelete
  3. ياااا رب تكووووووون من نصيبي

    ReplyDelete
  4. emanàabed@yahoo.comDecember 2, 2014 at 2:17 PM

    يسلم هديات يارب شكلها بشهى انا من عشاق الازانيا والمجعنات لشكل عام

    ReplyDelete
  5. بنفع اغير ترتيب الطبقات؟ انا بحط صوص البشاميل اول و بعدين اللازانيا و بعدين صوص بشاميل و فوقها خلطة البولونيز و فوقها الاجبان و هكذا....

    ReplyDelete
    Replies
    1. بثينة علي درويشDecember 3, 2014 at 6:00 AM

      تسلميلي شيف منال

      Delete
  6. يسلمو ايديكي 👍👍👍

    ReplyDelete
  7. منال انتي مبدعة سوء كنت على رؤيا او بمدونتك او على الفيس رح اظل اتابعك وين ما كنت يسلموا ايديكي وصفات بتجنن

    ReplyDelete
  8. شكرا الك كتييير لتوضيح وصفة اللزانيا وطريقة تطبيقها

    ReplyDelete
  9. وشكرا كتير لتوضيح متى وقت وضع الجنبة
    انا دائما بحطها فوق المعكروونة مباشر ة وبتنشف وما بتنقسم معي اللزانيا قطع
    بس اكييد رح اجرب طريقتك بالخطوووات
    لانو انا من عشاااق اللزانيا

    ReplyDelete
  10. كتييير بتشهي ...انا بحب باريلا كمان وما بسلقها

    ReplyDelete
  11. حبيت طريقة الفريكة يسلمو اديكي
    واللزانيا بتشهي ...♡♥

    ReplyDelete
  12. Eslmo adeke btft7 alnfs

    ReplyDelete
  13. يسلم ايديكي انتي عن جد طيبة ورائعة

    ReplyDelete
  14. انا شكلي مو شاطرة بالتكنولوجيا امبارح قعدت حوالي ساعة ونص احاول اشترك بشكل رسمي عصفحتك ويطلع اسمي بس شكلو مو زابط

    ReplyDelete
  15. بينفع الريحان اللي بنزرع باحواض المنازل يستخدم للطبخ بس هو ورقته عريضة

    ReplyDelete
    Replies
    1. لا لانه كتير عطري مش زي الايطالي

      Delete
  16. مرحبا ست منال
    كيف يمكنني أسجل بالمدونة بحيث من اعمل تعليق يطلع الاسم؟؟؟

    ReplyDelete
  17. يسلموا هالايدين..
    بس عندي سؤالين، طريقة الفريكة نفس اللي بعملها، بس ما بحط الدجاج المسلوق من الاول بحطه بعد ما تستوي الفريكة وبتركه يتسبك معها، لأني بحس انه راح ينهري من الطبخ اولا سلق وبعدين مع الشوربة في طنجرة الضغط، ولا شو رأيك؟

    اللازانيا من أطباقي المفضلة ايضا، فكرتك بالأول غلطانة انك حاطة حليب مع الصوص بس رجعت تأكدت انك مش غلطانة، شو فائدة اضافة الحليب اذا ممكن اعرف؟

    وتقبلي تحياتي

    ReplyDelete
    Replies
    1. اهلا سميرة طبعا بيصير وانا ما بلاقيه بينهري لاني بحطه تفسيخ كبير شوي زي ما شفتي بالصورة بس طبعا ممكن...اما الحليب فهو بيعطي عمق وطعم زاكي زبيخفف من حدة البندورة مع السكر وهاي طريقة صوص البولونيز....بس ممكن تستغني عنه اذا ما حبيتي :)

      Delete
  18. يسلموا ايديكي شكلها بتشهي

    ReplyDelete
  19. يسلمو هدايا حلوة ....وان شاءالله افوز بس عشان تكون ذكرى منك يا منال...جد انك انسانه رائعه وطيوبة

    ReplyDelete
    Replies
    1. ان شاء الله بس حبيت اذكرك انه التعليقات المحسوبة هي التعليقات على بوستات المدونة هون مش على جوجل لاني شفتك معلقة كتير (يسلموا هالايدين :) بس على جوجل... شروط المسابقة انها تكون على نفس المدونة وبالتوفيق...لسة في وقت كتير.. بدنا تتحمسوا

      Delete
  20. يسلمو ايديكي كتير حبيت اسلوبك ومدونتك كتير حلوه ومفيده ووصفاتك رائعة

    ReplyDelete
  21. انا من عشاق المعكرونة .. بكل اشكالها وخصوصا مع مضاعفة كميات الجبنة لانها بتزكيها .. اما شوربة الفريكة بنصح عملها بالفريكة البلدية طعمها خرافي خصوصا المطبوخة بلبن مش بمرقة

    ReplyDelete
  22. على فكرة انا اسمي بلقيس بس هذا حساب زوجي

    ReplyDelete
  23. يعطيكي ألف عافية ست منال على الاكلات الطيبه انا من محبي الفريكة واللازانيا . انا امبارح عملت كعكة لفافة القرفة من وصفاتك طلعت بتشهي . ♡♡ مارينا عماري

    ReplyDelete
  24. شكلهم بشهي يسلمو اديكي

    ReplyDelete
  25. رائعه منال الله يعطيكي الف عافية

    ReplyDelete
  26. مبارح عملت شوربة الفريكه ودعيتلك ☺

    ReplyDelete
  27. شكرا الكم يا حلوين :)

    ReplyDelete
  28. رح جربها قريبا .. الفريكه اكلتي المفضله.. يسلمو منول.

    ReplyDelete
  29. اطيب اشي شوربة الفريكة بالشتاء يسلمو منال

    ReplyDelete
  30. بمووووت باللزانيا وصفتك رائعة ،رح اطبخها هاليومين ان شاء الله

    ReplyDelete
  31. بموت باللزانيا ودايما بعملها

    ReplyDelete
  32. وصفات رائعة ماشاءالله ، شوربة الفريكة شوربة معتبرة ومافي حدا مابحبها ودايما من زكاوتها بتخلص بسرعة :( ، واللازانيا عجبتني طريقتك كتير وغنية بالجبنة انا بالعادة بحط بس موتزريلا وبارمزان بس دايما اول طبقة من الازانيا بتنحرق عندي مع انو بحط تنتين فوق بعض وبدهن الصينية مابعرف شو الحل ؟

    ReplyDelete
  33. عشان هيك ديما انا كتبت بتحطي شوي من الصوص بالقاع بعدين اللازانيا

    ReplyDelete

  34. عملتهم على طريقتك شوربة الفريك و اللازانيا يسلمو ايديكي بشهي 💕

    ReplyDelete

Post a Comment

Popular Posts